امریکہ: ٹرمپ کی تصویر والا 1 ڈالر کا سکہ مارکیٹ میں دستیاب، 25 سکوں کا ایک رول خریدنے کے لیے خرچ کرنے ہوں گے 61 ڈالر

امریکہ کی آزادی کی 250ویں سالگرہ کے موقع پر امریکی ٹکسال نے صدر ڈونالڈ ٹرمپ کی تصویر والا خصوصی 1 ڈالر کا سکہ جاری کیا تھا، جسے 2 ستمبر سے مارکیٹ میں اتار دیا گیا ہے۔ یہ سکہ امریکہ کی آزادی کے 250 سال مکمل ہونے کے موقع پر تیار کیا گیا تھا۔ اس سکہ کی خاص بات یہ ہے کہ اس پر باحیات صدر کی تصویر نظر آ رہی ہے، جس کے متعلق امریکہ میں قانونی اور سیاسی بحث بھی شروع ہو گئی ہے۔ اس خاص سکہ کے سامنے والے حصے پر صدر ڈونالڈ ٹرمپ کی تصویر ہے۔ ساتھ ہی سکہ پر ’لبرٹی 2026-1776، اِن گاڈ وی ٹرسٹ‘ (آزادی 2026-1776، خدا میں ہمارا یقین) لکھا گیا ہے۔ سکہ کے دوسری طرف امریکی صدر کے سرکاری مہر کے ساتھ ’250‘ لکھا ہوا ہے، جو امریکہ کی آزادی کی 250ویں سالگرہ کو واضح کرتا ہے۔

سکہ کا رنگ سنہرا ہے لیکن اس میں اصلی سونے کا استعمال نہیں کیا گیا ہے۔ اسے مختلف دھاتوں کے مرکب سے تیار کیا گیا ہے، جس میں تانبا، زنک، مینگنیج اور نکل جیسی دھاتیں شامل ہیں۔ اس لیے اس کا گولڈ-فنش صرف اس کی بیرونی بناوٹ اور رنگ سے منسلک ہے۔ امریکی محکمہ خزانہ اور یو ایس منٹ کے مطابق یہ سکہ لیگل ٹینڈر ہے، یعنی اس کی سرکاری کرنسی کی قیمت 1 ڈالر ہے۔ حالانکہ اسے جمع کرنے والوں کے لیے عام قیمت سے زیادہ پر فروخت کیا جا رہا ہے۔ یو ایس منٹ کی فروخت میں 25 سکوں کے ایک رول کی قیمت 61 ڈالر رکھی گئی ہے، جبکہ 100 سکوں کے بیگ کی قیمت 154.50 ڈالر ہے۔ اس وجہ سے ان سکوں کی قیمت ان کی اصل کرنسی کی قیمت سے زیادہ ہو جاتی ہے۔

اس سکہ کو اس لیے بھی خاص مانا جا رہا ہے کیونکہ امریکی سکوں پر باحیات شخص کی تصویر کو لے کر طویل عرصے سے روایت اور قانونی حدود رہی ہیں۔ اس سے قبل 1926 میں امریکہ کی آزادی کی 150ویں سالگرہ کے موقع پر اس وقت کے صدر کیلون کولیج کی تصویر ایک یادگاری سکہ پر دکھائی گئی تھی۔ ٹرمپ کی تصویر والے نئے سکے کو اسی وجہ سے تقریباً ایک صدی بعد کی اہم مثال مانا جا رہا ہے۔

قابل ذکر ہے کہ سکہ والے معاملہ پر سب سے زیادہ بحث امریکی قانون کو لے کر ہے۔ عام طور پر امریکی کرنسی پر باحیات شخص کی تصویر لگانے پر روک سے متعلق قانونی نظام کا حوالہ دیا جاتا ہے۔ ناقدین نے اسی بنیاد پر ٹرمپ کی تصویر والے سکے پر سوالات اٹھائے ہیں۔ امریکی انتظامیہ اور محکمہ خزانہ کا کہنا ہے کہ یہ عام کرنسی نہیں بلکہ امریکہ کی 250ویں سالگرہ کے موقع پر جاری کیا گیا خصوصی یادگاری سکہ ہے۔ اس کے لیے ’سرکیولیٹنگ کلیکٹیبل کوائن ری ڈیزائن ایکٹ آف 2020‘ کو قانونی بنیاد بتایا گیا ہے۔ اس طرح ٹرمپ کی تصویر والا یہ 1 ڈالر کا سکہ صرف جمع کرنے والوں کے لیے جاری کیا گیا ایک خصوصی سکہ نہیں ہے بلکہ امریکہ کی کرنسی پر باحیات صدر کی تصویر کے متعلق چلنے والی پرانی بحث کو ایک بار پھر سامنے لے آیا ہے۔