ٹک ٹاک اسٹار کھابے لیم بھی ٹرمپ کی سخت امیگریشن پالیسی کے شکار، امریکہ چھوڑنے پر ہوئے مجبور

امریکہ میں ڈونالڈ ٹرمپ حکومت نے ویزا کو لے کر قانون کافی سخت کر دیئے ہیں۔ اس فیصلے کا اثر عام لوگوں کے ساتھ ساتھ مشہور ہستیوں پر بھی پڑتا ہوا نظر آ رہا ہے۔ تازہ معاملے میں دنیا کے سب سے زیادہ فالوورس والے ٹک ٹاک اسٹار کھابے لیم کو بھی امریکہ چھوڑنا پڑا ہے۔ اطلاع کے مطابق لاس ویگاس میں مدت سے زیادہ رکنے پر امریکی امیگریشن افسروں نے انہیں حراست میں لے لیا۔

آئی سی ای نے تصدیق کی ہے کہ سینیگل میں پیدا ہوئے اور اٹلی کے شہری کھابے لیم، جن کا پورا نام سیرنگے کھابانے لیم ہے، جمعہ کو انہیں ہیری ریڈ انٹرنیشنل ایئر پورٹ پر حراست میں لیا گیا۔ لیم 30 اپریل کو امریکہ آئے تھے لیکن ان پر ویزا شرائط کی خلاف ورزی کرنے کا الزام ہے۔

حالانکہ آئی سی ای نے انہیں ان کی مرضی سے امریکہ چھوڑنے کی اجازت دی، جس سے ان کے خلاف باضابطہ بے دخلی (ڈپورٹیشن) کا حکم جاری نہیں کیا گیا۔ اس سے لیم کو یہ فائدہ ہوا کہ وہ مستقبل میں پھر امریکہ آ سکیں گے۔

25 سالہ کھابے لیم نے اس پورے واقعہ پر عوامی طور پر کوئی تبصرہ نہیں کیا ہے۔ ان کا امریکہ سے جانا ایسے وقت میں ہوا جب صدر ٹرمپ کی قیادت میں امریکہ میں امیگریشن ضابطوں کا سختی سے نفاذ کیا جا رہا ہے۔ حالیہ دنوں اس سختی کے خلاف لاس اینجلس سمیت کئی شہروں میں زبردست احتجاجی مظاہرے بھی ہوئے ہیں۔

واضح رہے کہ کھابے لیم نے کورونا وبا کے دوران اپنے ان ویڈیوز کے ذریعہ مقبولیت حاصل کی تھی جس میں وہ بغیر کچھ بولے عجیب اور پیچیدہ ’لائف ہیکس‘ پر مزاحیہ انداز میں رد عمل دیتے تھے۔ ان کے ٹک ٹاک پر 162 ملین سے زیادہ فالوورس ہیں۔

اپنی مقبولیت کی بنا پر کھابے لیم کئی بڑے برانڈس کے ساتھ معاہدہ کر چکے ہیں جن میں ہیوگو باس اور یونیسف گڈوِل ایمبیسڈر کے کردار شامل ہیں۔ حراست میں لیے جانے سے کچھ ہفتے پہلے ہی وہ نیویارک میں میٹ گالا میں نظر آئے تھے۔