’آبنائے ہرمز صرف ہمارے دشمن ممالک کے لیے بند ہے‘، ایرانی وزیر خارجہ عباس عراقچی کا بڑا بیان

آبنائے ہرمز پر ایران نے اپنا سخت کنٹرول رکھا ہوا ہے، جس سے ایل پی جی یا ایندھن سے بھری جہازوں کا ادھر سے گزر جوکھم بھرا ہوا ہے۔ کئی جہازوں پر حملے ہو چکے ہیں، اس لیے کسی بھی ملک کا جہاز آبنائے ہرمز سے بغیر ایران کی اجازت ملے گزرنے سے پرہیز کر رہا ہے۔ اس درمیان ایرانی وزیر کارجہ عباس عراقچی کا ایک انتہائی اہم بیان سامنے آیا ہے۔ انھوں نے کہا ہے کہ آبنائے ہرمز مکمل طور پر بند نہیں ہے، لیکن دشمن ممالک کے جہاز کو وہ گزرنے نہیں دے گا۔

قابل ذکر ہے کہ ایران نے پہلے ہی ہندوستان سمیت اپنے دوست ممالک کے کئی جہازوں کو آبنائے ہرمز سے بلارخنہ گزرنے دیا ہے۔ تازہ ترین خبروں کے مطابق ایران نے امریکہ کے سب سے قریبی ملک جاپان کو بھی بڑی راحت دینے کا اعلان کیا ہے۔ ایرانی وزیر خارجہ نے کہا ہے کہ جاپانی جہازوں کو آبنائے ہرمز سے گزرنے کی اجازت دی جائے گی۔ انھوں نے جاپانی ’کیوڈو نیوز‘ سے بات چیت میں کہا کہ ’’ہم نے آبنائے ہرمز کو بند نہیں کیا ہے۔ ہماری رائے میں یہ راستہ کھلا ہے۔ یہ صرف ہمارے دشمن ممالک، یعنی ہم پر حملہ کرنے والے ممالک کے جہازوں کے لیے بند ہے۔ دیگر ممالک کے جہاز یہاں سے گزر سکتے ہیں۔‘‘

اس سے قبل 21 مارچ کی صبح جرمنی، فرانس، جاپان سمیت 22 ممالک نے ایران سے حملہ روکنے اور آبنائے ہرمز کھولنے کی اپیل کی تھی۔ انھوں نے ایک مشترکہ بیان جاری کیا تھا، جس میں کہا تھا کہ ’’ایران کی کارروائیوں کا اثر دنیا کے سبھی حصوں کے لوگوں پر پڑے گا، خصوصاً سب سے کمزور طبقات پر۔‘‘ اس بیان میں ایران سے گزارش کی گئی تھی کہ وہ حالات کی سنگینی کو پیش نظر رکھتے ہوئے آبنائے ہرمز کو کھول دیں۔ اب ایرانی وزیر خارجہ کے تازہ بیان سے ظاہر ہو گیا ہے کہ ایران دوست ممالک کے جہازوں پر کسی طرح کی پابندی نہیں لگا رہا، بلکہ اسرائیل اور امریکہ سے قربت رکھنے والے ممالک کو کسی طرح کی نرمی نہیں دینا چاہتا۔

اس درمیان ایران کی ایک سرکاری میڈیا نے ایک اہم خبر شائع کی ہے۔ اس خبر میں فوجی ترجمان کے حوالہ سے کہا گیا ہے کہ امریکہ اور اسرائیل خلیج میں مسافر جہازوں کو نشانہ بنا رہے ہیں۔ اس تعلق سے ایرانی فوج نے نامعلوم طریقے سے جوابی کارروائی کی تنبیہ جاری کی ہے۔ اگر ایرانی فوج کے ترجمان کے دعووں میں صداقت ہے تو خلیج میں حالات مزید خراب ہو سکتے ہیں۔