اتنا بڑا جھوٹ! اسرائیلی پی ایم او نے نیتن یاہو کے خفیہ یو اے ای دورہ کا کیا دعویٰ، یو اے ای کا صاف انکار

اسرائیل اور متحدہ عرب امارات (یو اے ای) کے درمیان ایک مبینہ ’خفیہ میٹنگ‘ کی خبر نے عالمی سطح پر ہلچل مچا دی ہے۔ عالمی سیاست میں گرمی اس لیے پیدا ہوئی، کیونکہ خفیہ میٹنگ کا دعویٰ اسرائیلی وزیر اعظم کے دفتر نے کیا ہے۔ جیسے ہی یہ خبر پھیلی، فوری طور پر یو اے ای نے ایک بیان جاری کر ایسے دعووں کو بے بنیاد ٹھہرا دیا۔ یعنی سفارتی سطح پر گھمسان شروع ہو گیا ہے۔

دراصل اسرائیلی وزیر اعظم کے دفتر نے دعویٰ کیا ہے کہ وزیر اعظم بنجامن نیتن یاہو نے ’آپریشن رورِنگ لاین‘ کے دوران خفیہ طریقے سے یو اے ای کا دورہ کر صدر شیخ محمد بن زاید النہیان سے ملاقات کی۔ اسرائیل اس ملاقات کو ایک بڑا دفاعی معاہدہ اور تاریخی کامیابی قرار دے رہا ہے، لیکن یو اے ای نے ان دعووں کو پوری طرح سے جھوٹ پر مبنی اور بے بنیاد بتاتے ہوئے خارج کر دیا ہے۔

اس مبینہ خفیہ دورے کی جانکاری سب سے پہلے بدھ کی دیر شب اسرائیلی وزیر اعظم دفتر کی طرف سے جاری ایک بیان سے ملی۔ اس کے فوراً بعد وزیر اعظم کے آفیشیل سوشل میڈیا ہینڈل سے دعویٰ کیا گیا کہ اس دورہ نے دونوں ممالک کے درمیان تعلقات کا ایک نیا باب کھول دیا ہے۔ اسرائیلی پی ایم او کا بیان سامنے آنے کے تقریباً 3.30 گھنٹے بعد ہی یو اے ای کی وزارت خارجہ نے ان دعووں کو سرے سے خارج کر دیا جن میں بنجامن نیتن یاہو کی صدر النہیان کے ساتھ مبینہ خفیہ ملاقات کی بات کہی گئی تھی۔ یو اے ای نے ایک آفیشیل بیان جاری کر واضح کیا کہ اسرائیل کے ساتھ اس کے تعلقات ’ابراہم معاہدہ‘ کے تحت پوری طرح شفاف ہیں اور خفیہ دورہ یا فوجی تعاون سے جڑی ایسی خبریں پوری طرح بے بنیاد و غیر منطقی ہیں۔ یو اے ای کے اس بیان کے بعد یہ سوال اٹھ رہا ہے کہ اسرائیل نے اتنا بڑا جھوٹ کیوں بولا؟ یا پھر یو اے ای کچھ چھپانے کی کوشش کر رہا ہے؟ کیا نیتن یاہو اور النہیان کی ملاقات ہوئی ہے؟

واضح رہے کہ گزشتہ کچھ سالوں میں یو اے ای مشرق وسطیٰ میں اسرائیل کے سب سے اہم شراکت دار کی شکل میں ابھرا ہے۔ ابراہم معاہدہ کے بعد دونوں ممالک کے درمیان تجارت، تکنیک، سیاحت اور خفیہ جانکاری شیئر کرنے کا دائرہ بڑھا ہے۔ ایسے میں نیتن یاہو کے تازہ خفیہ دورہ میں اگر ذرا بھی سچائی ہے، تو اس کا مطلب یہی ہے کہ اب دونوں ممالک ے درمیان بات چیت عام سفارتی تعلقات سے کہیں آگے نکل چکی ہے۔