اسرائیل میں نیوکلیائی پلانٹ کے پاس سنائی دیں کئی راؤنڈ فائرنگ کی آوازیں!

فلسطینی تنظیم حماس کے ذریعہ اسرائیل پر کیے گئے حملے نے تشویشناک حالات پیدا کر دیے ہیں۔ اسرائیل نے بھی جنگ کا اعلان کر دیا ہے اور چند دنوں کی جنگ میں ہی تقریباً 2000 افراد کی ہلاکت کی خبریں سامنے آ چکی ہیں۔ اس درمیان کچھ میڈیا رپورٹس سے پتہ چلا ہے کہ اسرائیل کے ڈیمانا میں نیوکلیائی پلانٹ کے پاس گولی چلنے کی آوازیں سنائی دے رہی ہیں۔ یعنی جو اسرائیل حماس کو تباہ کرنے کا عزم کر چکا ہے، خود اس کے لیے پریشانیاں بڑھ سکتی ہیں۔

میڈیا رپورٹس میں امکان ظاہر کیا جا رہا ہے کہ ڈیمانا واقع نیوکلیئر پلانٹ پر یہ حملہ لبنان کی طرف سے کیا گیا ہے۔ اگر اس نیوکلیائی پلانٹ پر حماس یا لبنان کے حزب اللہ گرپ کا قبضہ ہو جاتا ہے تو دنیا کے لیے یہ کسی بڑے خطرے کا پیش خیمہ بن سکتا ہے۔ حالانکہ اس گولی باری کے بارے میں اسرائیل کی طرف سے کچھ بھی بیان سامنے نہیں آیا ہے۔

ایسی خبریں سامنے آ رہی ہیں کہ بدھ کے روز ڈیمونا واقع نیوکلیئر ریسرچ سنٹر کے پاس گولی باری ہوئی جس کے بعد سیکورٹی فورسز نے فوری طور پر محاذ سنبھال لیا۔ حالانکہ فائرنگ کرنے والے کون لوگ تھے، یہ ابھی تک صاف نہیں ہو سکا ہے۔ نیوکلیئر پلانٹ کے پاس ہونے والی اس گولی باری کو سیکورٹی کی ایک بڑی خامی تصور کیا جا رہا ہے۔

ایک میڈیا رپورٹ میں بتایا گیا ہے کہ ڈیمونا شہر میں روٹیم فیکٹری کے پاس بدھ کے روز گولی باری کی آواز سنائی دی۔ فیکٹری مینجمنٹ کی طرف سے کچھ ہی دیر میں فیکٹری کو خالی کرا لیا گیا۔ یہ وہی شہر ہے جہاں پر اسرائیل کا سب سے بڑا نیوکلیئر ریسرچ سنٹر ہے۔ سوشل میڈیا پر اس گولی باری کی خبر وائرل ہو گئی ہے، حالانکہ اسرائیل کی طرف سے اس طرح کے کسی بھی واقعہ کی تصدیق نہیں کی گئی ہے۔