روس کا 352 ڈرونز اور 16 میزائلوں سے یوکرین پر بڑا حملہ، 10 افراد ہلاک، کئی زخمی

 روس اور یوکرین کے درمیان جاری جنگ ختم ہونے کے آثار نظر نہیں آ رہے ہیں۔ اس درمیان روس نے ایک مرتبہ پھر یوکرین کی راجدھانی کیف پر ڈرونز اور میزائلوں کے ذریعہ شدید حملے کیے۔ اس حملے میں کم از کم 10 لوگوں کی موت اور دیگر کئی افراد کے زخمی ہونے کی خبر ہے۔ حملے کے بعد کئی عمارتوں میں آگ لگ گئی۔ راحت و بچاؤ ٹیم اور فائر بریگیڈ کے ملازمین نے اس پر قابو پانے کی کوشش کی اور ملبے میں پھنسے لوگوں کو باہر نکالا۔

کیف سے قریب 85 کلومیٹر جنوب مغرب میں برلا تسیرکوا شہر میں ایک شخص کی موت ہوئی ہے اور 8 دیگر زخمی ہوئے ہیں۔ ہنگامی خدمات نے بتایا کہ پیر کی صبح روس کے ڈرون اور میزائلوں نے کیف میں رہائشی علاقوں، اسپتالوں اور کھیل احاطوں کو نشانہ بنایا۔ سب سے زیادہ نقصان شیوچین کیوسکی صوبہ کو پہنچا ہے جہاں پانچ منزلہ ایک عمارت کا ایک حصہ منہدم ہو گیا ہے۔

کیف کے میئر وتالی کلتشکو نے بتایا کہ شیوچین کیوسکی صوبہ میں 6 لوگوں کی موت کی تصدیق ہوئی ہے۔ ایک حاملہ خاتون سمیت 10 لوگوں کو ایک نزدیکی عمارت سے بچایا گیا۔ حملے میں اس عمارت کو بھی نقصان پہنچا ہے۔

ایک بیان میں یوکرین کی فضائیہ کے حوالے سے بتایا گیا ہے کہ روس نے رات بھر میں کُل 352 دھماکہ خیز ڈرون اور ’ڈکوائے‘ سے حملہ کیا۔ روس نے 11 بیلسٹک میزائل اور 5 کروز میزائلیں بھی داغیں۔ حالانکہ فوج نے کہا کہ دفاعی نظام نے 339 ڈرونز اور 15 میزائلوں کو ہدف تک پہنچنے سے پہلے روک دیا۔

واضح رہے کہ یہ حملہ منگل کو یوکرین پر کیے گئے روس کے حملے کے تقریباً ایک ہفتہ کے بعد ہوا ہے۔ ایک ہفتہ پہلے کیے گئے روسی حملے میں کیف میں 28 لوگ مارے گئے تھے جن میں 23 لوگ ایک رہائشی عمارت میں ہلاک ہوئے تھے، جو میزائل حملے کے بعد منہدم ہو گئی تھی۔ یوکرین کے صدر ولادیمیر زیلنسکی نے اس حملے کو جنگ کی سب سے بڑی بمباری میں سے ایک بتایا تھا۔