روہنگیا نسل کشی تنازعہ: میانمار نے بین الاقوامی عدالت کا فیصلہ مسترد کیا، سلامتی کونسل کا اجلاس بلانے کی تیاری میں فرانس!

’رائٹرز‘ کی رپورٹ کے مطابق فرانس کی وزارت خارجہ نے کہا ہے کہ میانمار کی جانب سے انٹرنیشنل کورٹ آف جسٹس کے فیصلے کو مسترد کیے جانے کے بعد وہ اقوام متحدہ کی سلامتی کونسل کا اجلاس بلانے کا مطالبہ کرے گی۔

<div class="paragraphs"><p>سلامتی کونسل (فائل)، تصویر آئی اے این ایس</p></div>
i

میانمار میں روہنگیا نسل کشی کا تنازعہ تھمنے کا نام نہیں لے رہا ہے۔ انٹرنیشنل کورٹ آف جسٹس (آئی سی جے) کی جانب سے 2017 میں روہنگیا مسلمانوں کے خلاف ہونے والی نسل کشی کا ذمہ دار میانمار کو ٹھہراتے ہوئے فیصلہ سنائے جانے کے چند ہی روز بعد میانمار نے اسے تسلیم کرنے سے انکار کر دیا ہے۔ فرانس کی وزارت خارجہ اب اقوام متحدہ کی سلامتی کونسل (یو این ایس سی) کا اجلاس بلانے کی تیاری کر رہی ہے۔ فرانس اس معاملے کو سلامتی کونسل میں لے جانے کی تیاری کر رہا ہے اور عدالت کے فیصلے کو تسلیم نہ کرنے پر میانمار کے خلاف کارروائی کا مطالبہ کر رہا ہے۔

’رائٹرز‘ کی رپورٹ کے مطابق فرانس کی وزارت خارجہ نے کہا ہے کہ میانمار کی جانب سے آئی سی جے کے فیصلے کو مسترد کیے جانے کے بعد وہ اقوام متحدہ کی سلامتی کونسل کا اجلاس بلانے کا مطالبہ کرے گی۔ وزارت نے اس بات پر زور دیا کہ آئی سی جے کے فیصلے حتمی ہوتے ہیں اور متعلقہ فریقوں پر ان کی پابندی لازم ہے۔ بین الاقوامی قانون کے مطابق ان فیصلوں پر عمل درآمد بھی ہونا چاہیے۔


فرانس نے اقوام متحدہ کے منشور کا بھی حوالہ دیا، جس کے تحت اگر کسی تنازعہ کا کوئی فریق آئی سی جے کے فیصلے پر عمل نہیں کرتا تو سلامتی کونسل اس فیصلے پر عمل درآمد کے لیے اقدامات کر سکتی ہے۔ اقوام متحدہ کے منشور کی دفعہ 94 کے تحت تمام رکن ممالک کے لیے ان مقدمات میں بین الاقوامی عدالت انصاف کے فیصلوں پر عمل کرنا لازمی ہے جن میں وہ فریق ہوں۔

دفعہ 94(2) میں یہ بھی التزام ہے کہ اگر کوئی فریق عدالت کے فیصلے کے تحت اپنی ذمہ داریاں پوری کرنے میں ناکام رہتا ہے تو دوسرا فریق اقوام متحدہ کی سلامتی کونسل سے رجوع کر سکتا ہے۔ اس معاملے میں گامبیا نے میانمار کے خلاف نسل کشی کا مقدمہ دائر کیا تھا۔ لہٰذا اگر میانمار فیصلے پر عمل نہیں کرتا تو گامبیا سلامتی کونسل سے مداخلت کی درخواست کر سکتا ہے۔ اس کے بعد سلامتی کونسل فیصلے پر عمل درآمد کے لیے سفارشات پیش کر سکتی ہے یا کوئی قدم اٹھانے کا فیصلہ کر سکتی ہے۔


اس سے قبل 1986 میں نکاراگوا نے سلامتی کونسل سے مداخلت کی درخواست کی تھی، کیونکہ امریکہ نے آئی سی جے کے ایک فیصلے کو تسلیم کرنے سے انکار کر دیا تھا۔ اس فیصلے میں کہا گیا تھا کہ امریکہ نے نکاراگوا کے خلاف اپنی فوجی سرگرمیوں کے ذریعے بین الاقوامی قانون کی خلاف ورزی کی ہے۔ حالانکہ امریکہ نے فیصلے پر عمل درآمد کا مطالبہ کرنے والی ایک قرارداد کے مسودے کو ویٹو کر دیا، جس کے باعث مزید کوئی کارروائی نہیں ہو سکی۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔