بہار کےبعد اب امریکہ میں بھی اعلان، جیتنے پر سبھی لوگوں کو مفت ملے گی کورونا ویکسین

انتخابات کہیں بھی ہوں چاہے بہار میں اسمبلی انتخابات ہوں یا پھر امریکہ کے صدارتی انتخابات لیکن کورونا کی ویکسین کاذکر دونوں جگہ خوب ہو رہاہے۔ بہار میں بھی بی جے پی نےوعدہ کیا ہےکہ ان کےاتحاد کی حکومت بننےپر وہ بہار میں کورونا کی ویکسین مفت فراہم کریں گے۔امریکہ میں بھی ڈیموکریٹس کے صدارتی امیدوار جوبائڈن نے کہا ہے کہ ان کی حکومت تشکیل ہونے پر امریکی شہریوں کو کورونا کی ویکسین مفت فراہم کی جائےگی۔

امریکی ڈیموکریٹک پارٹی کی جانب سے صدر کے عہدے کےانتخابات کے امیدوار جو بائڈن نے جمعہ کو کہا کہ اگر وہ الیکشن جیت جاتے ہیں تو سبھی شہریوں کو کورونا کا مفت میں ٹیکا مہیا کرایا جائےگا۔ مسٹر بائڈن نے ولمنگٹن،ڈیلاور میں ایک تقریر میں کہا،’’ہمارے پاس جب محفوظ اور موثر ٹیکا ہوگا تو وہ سبھی کےلئے مفت ہوگا۔ آپ کے پاس بیمہ ہو یا نہ ہو کوئی فرق نہیں پڑتا۔‘‘ انہوں نے کورونا وائرس کی وبا کے سلسلے میں صدر ڈونلڈ ٹرمپ کے بیان کوپوری طرح غلط بتایا جس میں کہا گیا ہےکہ انہوں نے ’وائرس سے لڑنا چھوڑ دیا‘‘ ہے۔

تین نومبر کو ہونے والے الیکشن میں صدر کے عہدے کے اہم دعوے دار اور سابق نائب صدر مسٹر بائڈن نے یہ دعوی مسٹر ٹرمپ کے ساتھ ہوئی آمنے سامنے کی بحث کے عین ایک دن بعد کیا ہے جس سے ووٹروں کی بڑی تعداد ان کے ساتھ آسکتی ہے۔

مسٹر بائڈن نے کہا،’’کووڈ 19 نے حال کی تاریخ میں ہمارے سامنے آنے والی کسی بھی چیز کو بونا کردیا ہے،اور اس کے سست ہونے کا اشارہ نظر نہیں آرہا ہے۔یہ وائرس 223,000 سے زیادہ لوگوں کو مار چکا ہے۔ یہ تقریباً ہر ملک کی جانب بڑھ رہا ہے۔‘‘

77سالہ بائڈن نے کہا،’’ہم اس بحران میں آٹھ مہینے سے زیادہ وقت سے جوجھ رہےہیں جبکہ صدر کے پاس ابھی بھی کوئی منصوبہ نہیں ہے۔‘‘

واضح رہے کہ مسٹر ٹرمپ نے پچھلی رات بحث کے دوران ، ایک ویکسن کے بارے میں گھمنڈ سے اتراتے ہوئے کہا تھا کہ یہ ایک ہفتے کے اندر آرہی ہے ۔حالانکہ انہوں نے ماڈریٹر کے ٹوکنے پر پیچھے ہٹتے ہوئے کہا کہ ان کا یہ جملہ ’گارنٹی‘نہیں مانا جاسکتا۔ (یو این آئی کے انپٹس کےساتھ)