پرواز کرتے ہوئے مسافر طیارہ کا ٹائر نکل گیا، ایران میں بڑا حادثہ ہوتے ہوتے بچا

ایران میں ایک بڑا طیارہ حادثہ ہوتے ہوتے بچ گیا۔ تہران کی سپہران ایئرلائنز کے ایک بوئنگ 737 طیارے نے مشہد سے پرواز بھری تھی، لیکن اسے کچھ ہی دیر بعد واپس ایئرپورٹ پر لینڈ کرنا پڑا۔ طیارے کے پرواز بھرنے کے کچھ ہی دیر بعد ہوا میں ایک ٹائر الگ ہو گیا، جس کے بعد انجن میں خرابی آ گئی۔ طیارے کو حادثے سے بچانے کے لیے اسے دوبارہ مشہد ایئرپورٹ پر اتار لیا گیا۔

’سی این این‘ کی ایک رپورٹ کے مطابق پرواز کے دوران طیارے کا ایک ٹائر الگ ہو گیا تھا۔ یہ بھی دعویٰ کیا جا رہا ہے کہ ٹائر الگ ہونے سے پہلے پھٹ گیا تھا۔ اس کے بعد انجن میں خرابی آئی تو پورا طیارہ بری طرح کانپنے لگا۔ طیارے میں سوار مسافر بری طرح گھبرا گئے۔ طیارے کے کانپنے کی وجہ سے اس کے اندر چھت کا ایک حصہ ٹوٹ کر گرنے لگا۔ اس کے کئی ویڈیوز سوشل میڈیا پر وائرل ہو رہی ہیں۔

شمال مشرقی ایران کے مشہد سے یہ طیارہ کرمان شاہ کے لیے روانہ ہوا تھا، تبھی ٹیک آف کے فوراً بعد پائلٹس کو اس میں خرابی کا پتہ چلا۔ پائلٹس نے طیارے کا ٹائر نکلنے کے بعد فوراً مسافروں کو تکنیکی خرابی کی اطلاع دی۔ پرواز کے دوران طیارے میں کافی تیز جھٹکے لگنے لگے اور وہ زور زور سے ہلنے لگا۔ اس کے بعد طیارے کا رخ واپس مشہد ایئرپورٹ کی طرف موڑ دیا گیا۔

اچھی بات یہ ہے کہ طیارے میں سوار کسی بھی مسافر یا عملے کے رکن کو چوٹ نہیں آئی ہے۔ سبھی محفوظ ہیں، لیکن طیارے میں لگنے والے جھٹکوں کی وجہ سے اس کے اندر سامان رکھنے کے لیے بنائے گئے ڈبے کھل گئے تھے۔ اس معاملے پر اب تک ایئرپورٹ اتھارٹی یا ایئرلائن کی جانب سے کسی بھی طرح کا آفیشیل بیان سامنے نہیں آیا ہے۔