پاناما کے وزیر خارجہ 5 روزہ دورے پر ہندوستان پہنچ گئے، کئی اعلیٰ سطحی اجلاسوں میں لیں گے حصہ

جمہوریہ پاناما کے وزیر خارجہ جیویر ایڈوارڈو مارٹنیز-آچا واسکیز اتوار (19 جولائی) کو 5 روزہ دورے پر ہندوستان پہنچ گئے۔ ان کے اس دورے کا مقصد دونوں ممالک کے درمیان باہمی تعلقات کو مزید مضبوط بنانا ہے۔ وزارت خارجہ کے ترجمان رندھیر جیسوال نے ان کا استقبال کیا۔ انہوں نے سوشل میڈیا پلیٹ فارم ’ایکس‘ پر لکھاکہ ’’پاناما کے وزیر خارجہ جیویر ایڈوارڈو مارٹنیز-آچا واسکیز کا نئی دہلی آمد پر دلی خیر مقدم ہے۔ ہندوستان اور پاناما کے درمیان قریبی شراکت داری ہے، جو مشترکہ اقدار، باہمی مفادات اور خیر سگالی پر مبنی ہے۔‘‘

واضح رہے کہ پاناما کے وزیر خارجہ کا ہندوستان دورہ 19 سے 23 جولائی تک ہوگا، جو تجارت، کامرس، کنیکٹیویٹی اور سفارتی تعاون میں ہندوستان اور پاناما کے درمیان بڑھتے ہوئے روابط کو ظاہر کرتا ہے۔ وزارت خارجہ کی جانب سے شیئر کی گئی معلومات کے مطابق پاناما کے وزیر خارجہ نئی دہلی میں قیام کریں گے اور اس دوران وہ ہندوستان کے اعلیٰ رہنماؤں کے ساتھ کئی اعلیٰ سطحی اجلاسوں میں شرکت کریں گے۔

پیر کے روز مارٹنیز-آچا کی نئی پارلیمنٹ بلڈنگ میں وزیر تجارت و صنعت پیوش گوئل سے ملاقات کا شیڈول ہے، تاکہ دونوں ممالک کے مابین تجارت اور اقتصادی تعاون کو بڑھانے پر تبادلہ خیال کیا جا سکے۔ بعد ازاں، وہ حیدرآباد ہاؤس میں وزیر خارجہ ڈاکٹر ایس جے شنکر کے ساتھ وفد کی سطح پر مذاکرات کریں گے، جہاں فریقین سے ہندوستان-پاناما تعلقات کے تمام پہلوؤں کا جائزہ لینے اور باہمی مفاد کے شعبوں میں تعاون کی نئی راہیں تلاش کرنے کی امید ہے۔

منگل کے روز پاناما کے وزیر خارجہ نئی دہلی میں سرکاری پروگراموں میں حصہ لیں گے اور بدھ کو ٹرانسپورٹ بھون میں بندرگاہوں، جہاز رانی اور آبی گزرگاہوں کے مرکزی وزیر سربانند سونووال سے ملاقات کریں گے۔ اس گفتگو میں بحری تعاون، لاجسٹکس، پورٹ ڈویلپمنٹ اور دونوں ممالک کے مابین کنیکٹیویٹی کو مضبوط بنانے پر توجہ مرکوز رہنے کی امید ہے۔ وہ جمعرات کو اپنا دورہ مکمل کر کے ہندوستان سے روانہ ہوں گے۔ یہ دورہ ایسے وقت میں ہو رہا ہے جب دونوں ممالک کے درمیان سفارتی تعلقات مسلسل مضبوط ہو رہے ہیں۔ رواں ماہ کے آغاز میں پاناما میں ہندوستان کے سفیر سمیت سیٹھ نے وزیر خارجہ مارٹنیز-آچا سے ملاقات کی تھی اور ہندوستان-پاناما دوطرفہ شراکت داری کو مزید گہرا اور مضبوط کرنے کے طریقوں پر تبادلۂ خیال کیا تھا۔

پاناما میں واقع ہندوستانی سفارت خانے نے سوشل میڈیا پلیٹ فارم ’ایکس‘ پر ملاقات کی معلومات شیئر کرتے ہوئے بتایا کہ ہندوستان کے سفیر سمیت سیٹھ نے پاناما کے وزیر خارجہ جیویر مارٹنیز-آچا کو ہندوستان-پاناما دوستی کی علامت کے طور پر ’سیریمونیئل انڈیا-پاناما فلیگ پن‘ پیش کیا۔ دونوں رہنماؤں نے دوطرفہ تعاون کو مزید مستحکم کرنے اور دونوں ممالک کے مابین طویل عرصے سے قائم دوستانہ تعلقات کو نئی مضبوطی دینے پر بھی تبادلۂ خیال کیا۔

قابل ذکر ہے کہ ہندوستان اور پاناما کے تعلقات مشترکہ جمہوری اقدار، باہمی احترام اور تجارت، سرمایہ کاری، بحری امور، کنیکٹیویٹی اور کثیر جہتی فورمز پر بڑھتے ہوئے تعاون پر مبنی ہیں۔ وزیر خارجہ جیویر مارٹنیز-آچا کا یہ دورہ دونوں ممالک کے تعلقات کو نئی رفتار دینے اور مختلف اہم شعبوں میں تعاون کے نئے مواقع کی راہ ہموار کرنے والا مانا جا رہا ہے۔