امریکہ میں 9 سالہ ہند نژاد لڑکی دنیا کی سب سے ہونہار طالبہ بن گئی

ہندوستانی غیر ملکی سرزمین پر مسلسل اپنا پرچم لہرا رہے ہیں۔ امریکہ میں بھی ہندوستانی نئے ریکارڈ قائم کر رہے ہیں۔ ادھر امریکہ میں نو سالہ ہندوستانی نژاد طالبہ پریشا چکرورتی نے تاریخ رقم کر دی ہے۔ پریشا کو دنیا کی سب سے زیادہ ہونہار طالب علموں کی فہرست میں شامل کیا گیا   ہے۔

حال ہی میں امریکہ میں منعقد ہونے والے قابلیت کے مقابلے میں، پریشا نے 90 ممالک کے 16000 طلباء کو شکست دے کر یہ اعزاز حاصل کیا۔ نیو ز پورٹل ’آج تک‘ پر شائع خبر کے مطابق جان ہاپکنز سینٹر فار ٹیلنٹڈ یوتھ کی اس فہرست میں پریشا کو 16 ہزار سے زائد طلباء کے گریڈ لیول ٹیسٹ کے نتائج کا جائزہ لینے کے بعد سب سے زیادہ ہونہار طالب علموں کی فہرست میں شامل کیا گیا۔

واضح رہے کہ جان ہاپکنز سینٹر ہر سال ہونہار طلباء کے لیے ایسی فہرست جاری کرتا ہے۔ جان ہاپکنز نے یہ فہرست 90 ممالک کے 16,000 سے زائد طلباء کی گریڈ لیول کے ٹیسٹوں میں کارکردگی کی بنیاد پر مرتب کی ہے۔ پریشا نے اسکالسٹک اسسمنٹ ٹیسٹ (SAT)، امریکن کالج ٹیسٹنگ اور اسکول اور کالج کی قابلیت ٹیسٹ میں شاندار نمبر حاصل کیا۔

پریشا فریمونٹ، کیلیفورنیا کی رہائشی ہے۔ وہ وہاں  وارم اسپرنگ ایلیمنٹری اسکول میں تیسری جماعت کی طالبہ ہے۔ 2023 میں، اس نے امریکہ کے مشکل ترین مقابلوں میں سے ایک، جانز ہاپکنز سینٹر فار ٹیلنٹڈ یوتھ (JH-CTY) میں حصہ لیا۔

اس ٹائٹل پر پریشا کے والدین نے اپنی بیٹی کی کامیابی پر خوشی کا اظہار کرتے ہوئے کہا کہ وہ پریشا کی کامیابی پر بہت خوش ہیں۔ اسے ہمیشہ سیکھنے کا شوق رہا ہے۔ وہ ایک ذہین طالبہ ہے۔ ہم اسے آگے بڑھتے دیکھنا چاہتے ہیں۔ اس سے قبل 13 سالہ ہندوستانی نژاد امریکی طالبہ نتاشا پیریانایاگم کو مسلسل دوسرے سال اس فہرست میں شامل کیا گیا تھا۔