عراق کے شاپنگ مال میں لگی شدید آگ، 50 لوگوں کی زندہ جل کر موت، کئی افراد زخمی

 عراق سے ایک دردناک خبر سامنے آئی ہے۔ یہاں ایک شاپنگ مال میں شدید آگ لگنے سے 50 لوگوں کی زندہ جل کر موت ہو گئی۔ نیوز ایجنسی اے ایف پی کے مطابق یہ حادثہ عراق کے الکوٹ کے ایک سپر مارکیٹ میں ہوا۔ وائرل تصویروں میں دیکھا جا سکتا ہے کہ عمارت کے بڑے حصے میں آگ لگی ہوئی ہے اور دھوئیں کا غبار نکل رہا ہے۔

حادثے سے جڑا ایک ویڈیو بھی سوشل میڈیا پلیٹ فارم پر وائرل ہو رہا ہے جس میں پانچ منزلہ عمارت آگ کے شعلوں میں گھری ہوئی دکھائی دے رہی ہے جبکہ فائر بریگیڈ کی ٹیم آگ پر قابو پانے کی جدوجہد کر رہی ہے۔ واسط صوبہ کے گورنر محمد المیاہی نے سرکاری آئی این اے نیوز ایجنسی کو بتایا، ’’ایک بڑے شاپنگ مال میں لگی اس آگ میں مرنے والوں کی تعداد تقریباً 50 ہو گئی ہے۔‘‘

حالانکہ آگ لگنے کی صحیح وجہ ابھی سامنے نہیں آ سکی ہے لیکن آئی این اے کے مطابق گورنر نے کہا ہے کہ جانچ کے ابتدائی نتیجے 48 گھنٹوں کے اندر جاری کیے جائیں گے۔

گورنر محمد المیاہی نے بتایا کہ آگ ایک ہائپر مارکیٹ اور ایک ریستوراں میں لگی۔ جب آگ لگی، تب کئی لوگ کھانا کھا رہے تھے اور خریداری کر رہے تھے۔ گورنر نے بتایا کہ فائر بریگیڈ اہلکاروں نے کئی لوگوں کو بچایا اور آگ بجھائی۔ اس دردناک حادثے کی وجہ سے پورے ملک میں تین دنوں کے سوگ کا اعلان کیا گیا ہے۔ آئی این اے کی رپورٹ کے مطابق گورنر محمد ال میاہی نے عمارت اور مال کے مالک کے خلاف مقدمہ دائر کر دیا ہے۔

موصولہ اطلاع کے مطابق بڑی تعداد میں ایمبولنس کے ذریعہ جائے حادثہ سے لاشوں اور زخمیوں کو لے جایا گیا۔ بغداد سے 160 کلومیٹر جنوب-مشرق میں واقع شہر کا ایک اسپتال حادثہ متاثرین سے بھر چکا ہے۔ اے ایف پی کے مطابق مال 5 دن پہلے ہی کھلا تھا۔ شروعاتی جانچ سے پتہ چلا کہ آگ عمارت کی پہلی منزل پر لگی تھی۔

واضح رہے کہ اس سے پہلے 2023 میں عراق میں ایک شادی تقریب کے دوران بڑا حادثہ ہو گیا تھا۔ حادثے میں خوفناک آگ لگ گئی تھی جس میں 100 لوگوں کی موت ہو گئی تھی جبکہ 150 افراد زخمی ہوئے تھے۔