ہندوستان سمیت 20 ممالک کو امریکہ نے دی بڑی راحت، خاص دواؤں پر نہیں لگے گا ٹیرف

امریکی ٹیرف کے حوالے سے ایک اہم خبر سامنے آئی ہے۔ ’امریکی کامرس ڈپارٹمنٹ‘ کے ذریعہ جاری اطلاع کے مطابق امریکہ ہندوستان سمیت 20 ممالک سے درآمد کی جانے والی کچھ مخصوص دواؤں اور اس سے متعلق انگریڈینٹس (مواد) پر کوئی ایڈ ویلورم (قیمت پر مبنی) ٹیرف عائد نہیں کرے گا۔ ان دواؤں کا استعمال نایاب بیماریوں کے علاج میں کیا جاتا ہے۔ ’امریکی کامرس ڈپارٹمنٹ‘ نے فیڈرل رجسٹر میں ان ممالک کی فہرست جاری کی ہے، جنہیں ان مخصوص دواؤں کے لیے صفر ٹیرف کی سہولت فراہم کرائی جائے گی۔ ہندوستان کے علاوہ اس فہرست میں ارجنٹائن، بنگلہ دیش، کمبوڈیا، ایکواڈور، ایل سلواڈور، یورپی یونین، گوئٹے مالا، انڈونیشیا، جاپان، اردن، ملائیشیا، شمالی مقدونیہ، جنوبی کوریا، سوئٹزرلینڈ، لیکٹنسٹائن، تائیوان، تھائی لینڈ، برطانیہ اور ویتنام شامل ہیں۔

نوٹس میں کہا گیا ہے کہ ان مقامات سے آنے والی اہل مصنوعات پر صفر فیصد ٹیرف لگایا جا سکتا ہے، کیونکہ امریکہ کے ساتھ ان کے موجودہ یا مستقبل کے ٹریڈ اور سیکورٹی فریم ورک ایگریمنٹ ہیں۔ ورلڈ کسٹمز آرگنائزیشن کے مطابق ’ایڈ ویلورم‘ ٹیرف، ٹیکس عائد ہونے والے سامان کی مانیٹری ویلیو کا ایک مقررہ فیصد ہوتا ہے۔ یہ قدم ایسے وقت میں اٹھایا گیا ہے، جب واشنگٹن 29 ستمبر سے کچھ پیٹنٹیڈ فارماسیوٹیکل امپورٹ اور ان سے متعلق انگریڈینٹس پر 100 فیصد ٹیرف لگانے کی تیاری کر رہا ہے۔ امریکی صدر ڈونالڈ ٹرمپ نے گھریلو مینوفیکچرنگ کو فروغ دینے کے ارادے سے 2 اپریل کو ایک منشور جاری کیا تھا۔ اس کے تحت ٹریڈ ایکسپینشن ایکٹ کی دفعہ 232 کے تحت پیٹنٹ حاصل شدہ دواؤں، بایولوجکس اور ان سے متعلق انگریڈینٹس پر 100 فیصد تک کسٹم ڈیوٹی عائد کرنے کا انتظام کیا گیا تھا۔

کچھ کمپنیوں کے لیے یہ ٹیکس 31 جولائی سے نافذ بھی ہو چکا ہے، اور باقی کمپنیوں پر یہ ٹیکس 29 ستمبر سے نافذ ہو رہا ہے۔ لیکن فیڈرل رجسٹر میں شائع تازہ فہرست کے مطابق ہندوستان جیسے اہم شراکت دار ممالک سے درآمد شدہ اہم طبی فارمولیشنز کو اس 100 فیصد ٹیکس سے مکمل طور پر باہر رکھا گیا ہے۔ امریکی انتظامیہ کی جانب سے جاری کردہ نوٹیفکیشن کے مطابق صفر فیصد ٹیرف کی شرح ان پروڈکٹس پر نافذ ہوگی، جن کا استعمال سنگین بیماریوں کے علاج، جیسے بانجھ پن کے علاج، سیل تھراپی، جین تھراپی، اینٹی باڈی-ڈرگ کنجوگیٹس اور جانوروں کی دواؤں میں ہوتا ہے۔ ان خصوصی دواؤں کی تیاری میں استعمال ہونے والے اہم کمپونینٹس کو بھی اس ٹیرف رعایت کے دائرے میں شامل کیا گیا ہے۔