"تمہاری والدہ  نے ملاقات کی جگہ منتخب کی ہے": وائٹ ہاؤس کی ترجمان کا طنزیہ جواب

وائٹ ہاؤس کی ترجمان کیرولین لیفٹ نے ایک پریس کانفرنس کے دوران نامہ نگار کے سوال پر ایسا طنزیہ جواب دیا جس سے ہال میں موجود صحافی دم بخود رہ گئے۔ایک رپورٹر نے ان سے پوچھا کہ امریکی صدر ڈونلڈ ٹرمپ اور روسی صدر ولادیمیر پوتن کی متوقع ملاقات کا مقام کس نے منتخب کیا؟ تو انہوں نے مسکراتے ہوئے جواب دیا" تمہاری والدہ نے"۔

واضح رہے کہ ڈونالڈ ٹرمپ نے جمعرات کو اعلان کیا تھا کہ وہ جلد ہی روسی صدر ولادیمیر پوتن سے ہنگری کے دارالحکومت بوداپسٹ میں ملاقات کریں گے۔ اس ملاقات میں یوکرین جنگ کے خاتمے پر بات چیت متوقع ہے۔

یہ انتخاب کئی حلقوں میں سوالات پیدا کر رہا ہے کیونکہ پوتن کو بین الاقوامی فوجداری عدالت نے مطلوب قرار دے رکھا ہے۔ تاہم خبر رساں ادارے ایسوسی ایٹڈ پریس کے مطابق ہنگری عدالت کے اس فیصلے پر عمل درآمد کا امکان کم ہے، کیونکہ ملک خود عدالت سے علیحدگی کے مرحلے میں ہے۔

جب ہفنگٹن پوسٹ نے وائٹ ہاؤس سے دریافت کیا کہ ملاقات کا مقام کس نے طے کیا تو ترجمان کیرولین لیفٹ نے دوبارہ جواب دیا: “تمہاری والدہ نے۔” وائٹ ہاؤس کے کمیونیکیشن ڈائریکٹر اسٹیفن چیونگ نے بھی یہی جملہ دہرایا۔

کیرولین لیفٹ نے بعد میں کہاکہ "مجھے ہنسی آتی ہے کہ تم خود کو صحافی سمجھتے ہو۔ تم ایک انتہا پسند بائیں بازو کے نمائندے ہو جنہیں کوئی سنجیدگی سے نہیں لیتا ، حتیٰ کہ تمہارے ساتھی صحافی بھی نہیں۔ بہتر ہے کہ تم اپنی گمراہ کن اور متعصب نوعیت کے سوالات مجھے بھیجنا بند کرو"۔ (بشکریہ نیوز پورٹل ’العربیہ ڈاٹ نیٹ،اردو‘)