اسرائیل نے جنوبی لبنان میں رکھا قدم، حزب اللہ کے خلاف آئی ڈی ایف کا گراؤنڈ آپریشن شروع

ایک طرف اسرائیل نے ایران پر مسلسل حملے کر حالات کو بد سے بدتر کر دیا ہے، اور دوسری طرف اس نے لبنان میں گراؤنڈ آپریشن کی شروعات کر دی ہے۔ اسرائیل ڈیفنس فورس (آئی ڈی ایف) نے باضابطہ طور پر جنوبی لبنان میں حزب اللہ کے اہم ٹھکانوں پر ’محدود اور ہدف پر مبنی زمینی کارروائی‘ شروع کرنے کا اعلان کر دیا ہے۔ یہ اعلان خطہ میں موجود کشیدگی کو مزید بڑھانے والا ہے۔

قابل ذکر ہے کہ ایران کے خلاف اسرائیل اور امریکہ نے 28 فروری کو فوجی کارروائی شروع کی تھی۔ اس کے جواب میں ایران کے حمایت یافتہ گروپ حزب اللہ نے 2 مارچ کو حملہ کیا۔ اسرائیل کو نشانہ بناتے ہوئے اس نے راکٹ داغے، جس کے بعد اسرائیلی افواج نے لبنان میں دوسرا محاذ کھول دیا۔ اب اسرائیل نے حزب اللہ کے خلاف زمینی آپریشن شروع کرنے کا اعلان بھی کر دیا ہے، جس کے ذریعہ وہ اس تنظیم کو نیست و نابود کرنا چاہتا ہے۔

اس آپریشن کی جانکاری سوشل میڈیا پلیٹ فارم ’ایکس‘ پر دی گئی ہے۔ اپنے بیان میں آئی ڈی ایف نے کہا کہ یہ کارروائی ’فاروارڈ ڈیفنس ایریا‘ کو مضبوط بنانے کے مقصد سے کی جا رہی ہے۔ فوج کے مطابق یہ ابتدائی مرحلہ ایک وسیع دفاعی مہم کا حصہ ہے جس کا مقصد نیکسٹ لیول ڈیفنس قائم کرنا اور اسے مضبوط بنانا ہے۔ اس کے تحت علاقہ میں موجود عسکری ڈھانچوں کو تباہ کرنا اور فعال جنگجوؤں کو ختم کرنا شامل ہے۔

فوجی تعیناتی کے بارے میں مزید معلومات دیتے ہوئے آئی ڈی ایف کے سرکاری اکاؤنٹ نے بتایا کہ ’91ویں ڈویژن کی فوج‘ نے مقررہ دفاعی علاقہ کو وسعت دینے کے لیے مرکوز زمینی کارروائی شروع کر دی ہے۔ اس دفاعی علاقہ کی توسیع ’خطرات کو ختم کرنے‘ اور ’اسرائیل کے شمالی علاقوں کے رہائشیوں کے لیے اضافی حفاظتی حصار بنانے‘ کے لیے ضروری ہے۔

زمینی فوجیوں کے داخلہ سے قبل میدان جنگ کی تیاری کے لیے آئی ڈی ایف نے بتایا کہ اس نے توپ خانے اور فضائیہ کی مدد سے علاقے میں کئی عسکری ٹھکانوں پر حملے کیے۔ یہ کارروائیاں 146ویں ڈویژن کے ساتھ مل کر کی جا رہی ہیں اور ان کا بنیادی مقصد علاقہ گیلیلی کی بستیوں کی حفاظت کرنا ہے۔ اسرائیلی فوج نے یہ بھی کہا کہ وہ اسرائیلی شہریوں کو کسی بھی قسم کا نقصان نہیں ہونے دے گی اور جنوبی لبنان میں کارروائی جاری رہے گی۔

عبرانی زبان میں کی گیئ پوسٹ کے ساتھ کئی مناظر بھی شیئر کیے گئے جن میں نائٹ وژن فوٹیج اور ہائی کانٹراسٹ تصاویر شامل ہیں۔ ان تصاویر میں آئی ڈی ایف کے فوجیوں کو گھنے لبنانی علاقے میں سبز تھرمل رنگوں کے درمیان آگے بڑھتے ہوئے دیکھا جا سکتا ہے۔ سیکورٹی وجوہات کی بنا پر فوجیوں کے چہرے دھندلے کر دیے گئے ہیں۔ ایک تصویر میں ایک فوجی کسی عمارت کے اندر ہیڈ لیمپ کی روشنی میں تاروں یا آلات کی جانچ کرتا ہوا دکھائی دیتا ہے، جس سے ظاہر ہوتا ہے کہ مشن کا مقصد عسکری ڈھانچوں کو تلاش کر کے تباہ کرنا ہے۔ آئی ڈی ایف نے کہا کہ یہ کارروائی براہ راست حزب اللہ کے اس فیصلہ کے جواب میں ہے جس کے تحت اس نے مہم میں شامل ہو کر ایران کی حمایت یافتہ نیٹورک کے ساتھ کام شروع کیا۔

اسرائیلی افواج کی اس کارروائی کا امکان کافی عرصہ سے ظاہر کیا جا رہا تھا۔ میڈیا رپورٹس کے مطابق 2 مارچ کو حزب اللہ کے حملے کے بعد سے آئی ڈی ایف کی کارروائیوں میں اب تک 630 سے زیادہ لبنانی شہری ہلاک ہو چکے ہیں، جبکہ 1500 سے زیادہ زخمی ہوئے ہیں اور 80 ہزار سے زیادہ افراد بے گھر ہو چکے ہیں۔ ہلاک ہونے والوں میں بڑی تعداد بچوں کی بتائی جاتی ہے۔