ایران نے پھر آبنائے ہرمز میں 2 جہازوں پر کیا حملہ، امن معاہدہ خطرے میں!

آبنائے ہرمز میں ایک بار پھر کشیدگی بڑھ گئی ہے۔ امریکی حکام کے مطابق پیر کی شب ایران کی فوج نے اس راستہ سے گزرنے والے 2 تجارتی جہازوں پر میزائل داغے۔ یہ حملہ ایسے وقت میں ہوا ہے، جب امریکہ اور ایران کے درمیان آبنائے ہرمز میں حملہ روکنے کے لیے ہونے والا ایک ہفتہ کا معاہدہ ختم ہو چکا ہے۔ امریکی حکام کا کہنا ہے کہ اس حملہ سے امریکہ اور ایران کے درمیان تقریباً 3 ہفتہ قبل ہونے والی 14 نکاتی مفاہمتی یادداشت (ایم او یو) بھی خطرے میں پڑ گئی ہے۔ خیال کیا جا رہا ہے کہ اب امریکہ بھی ایران کے ٹھکانوں پر جوابی حملہ کر سکتا ہے۔

برطانیہ کی ’یو کے میری ٹائم ٹریڈ آپریشنز‘ (یو کے ایم ٹی او) نے بتایا کہ اسے پیر کے روز ایک رپورٹ موصول ہوئی، جس میں کہا گیا کہ عمان کے ساحل کے قریب جنوب کی جانب جانے والے ایک آئل ٹینکر پر کسی نامعلوم میزائل یا پروجیکٹائل سے حملہ کیا گیا، جس کے باعث جہاز میں آگ لگ گئی۔ ایک امریکی عہدیدار نے بتایا کہ دوسرے تجارتی جہاز کو بھی ایرانی میزائل نے نشانہ بنایا۔ دونوں جہازوں کو کافی نقصان پہنچا، تاہم خوش آئند بات یہ رہی کہ عملے کے کسی رکن کی ہلاکت یا زخمی ہونے کی اطلاع نہیں ملی ہے۔

اس سے قبل گزشتہ ہفتہ قطر کی راجدھانی دوحہ میں امریکہ اور ایران کے درمیان آبنائے ہرمز کے معاملے پر بالواسطہ مذاکرات ہوئے تھے۔ تاہم یہ بات چیت کسی بڑے نتیجے کے بغیر ختم ہو گئی۔ اس دوران ’دی وال اسٹریٹ جرنل‘ کی ایک رپورٹ میں دعویٰ کیا گیا ہے کہ حملے کا نشانہ بننے والے جہازوں میں قطر کا ایل این جی ٹینکر ’الرقیات‘ بھی شامل ہو سکتا ہے۔ یہ جہاز نقیلات کمپنی کا ہے، جو قطر کی ایل این جی شپنگ کمپنی ہے۔

رپورٹ میں ایک آڈیو ریکارڈنگ کا بھی ذکر کیا گیا ہے، جس میں مبینہ طور پر ایران کی اسلامک ریولوشنری گارڈ کور (آئی آر جی سی) جہازوں کو خبردار کرتی ہوئی سنائی دیتی ہے۔ آڈیو میں کہا جا رہا ہے کہ ان کے میزائل اور ڈرون حملے کے لیے تیار ہیں۔ ریڈیو پیغام کے مطابق الرقیات جہاز کے انجن روم کے اوپر بائیں جانب میزائل لگا، جس سے دھواں اٹھنے لگا اور آگ بھڑک گئی۔ تاہم جہاز پر موجود تمام عملہ محفوظ ہے۔