ہندوستان فیصلہ لینے میں اہل، امریکی ٹیرف کا ہند-روس رشتے پر کوئی اثر نہیں، روسی وزیر خارجہ کا اہم بیان

روسی وزیر خارجہ سرگئی لاوروف نے امریکہ کے ذریعہ لگائے گئے 50 فیصد ٹیرف کے باوجود روس کے ساتھ تیل تجارت پر ہندوستان کے رخ کی پُر زور حمایت کی ہے۔ انہوں نے کہا کہ ہندوستان ایسے معاملوں پر خود فیصلہ کرنے میں پوری طرح اہل ہے۔ لاوروف نے ہندوستان کے وزیر خارجہ ایس جے شنکر کی ستائش کرتے ہوئے ہندوستان کی ’خود اعتمادی‘ کی تعریف کی۔

لاوروف نے کہا کہ جے شنکر کے ساتھ اپنی مستقل بات چیت میں وہ کبھی بھی تیل اور تجارت کا معاملہ نہیں اٹھاتے کیونکہ ہندوستان ان فیصلوں کو خود کرنے میں پوری طرح سے اہل ہے۔ انہوں نے کہا کہ ہند۔روس رشتے پر امریکی ٹیرف کا کوئی اثر نہیں پڑے گا۔

اس دوران لاوروف نے جے شنکر کے ایک بیان کا حوالہ دیا، جس میں انہوں نے کہا تھا کہ اگر امریکہ تیل فروخت کرنا چاہتا ہے تو ہندوستان اپنی شرائط پر چرچا کرے گا، لیکن روس یا دیگر ملکوں سے ہندوستان کیا خریدتا ہے، وہ اس کا اپنا معاملہ ہے اور اس کا ہند۔امریکہ ایجنڈے سے کوئی لینا دینا نہیں ہے۔ لاوروف نے اس ردعمل کو بہت ہی درست بتاتے ہوئے کہا کہ یہ ظاہر ہے کہ ہندوستان، ترکی کی طرح عزت و توقیر رکھتا ہے۔

دراصل روسی وزیر خارجہ لاوروف یو این جی اے کے 80ویں سیشن سے خطاب کر رہے تھے۔ اس دوران انہوں نے یہ بھی تصدیق کی کہ روسی صدر ولادیمیر پوتن اس سال دسمبر میں ہندوستان کا دورہ کرنے کا منصوبہ بنا رہے ہیں۔ انہوں نے ہند-روس تعلقات کی مضبوطی پر زور دیتے ہوئے کہا کہ دونوں ملکوں کا دوطرفہ ایجنڈا بہت ہی وسیع ہے۔

روسی وزیر خارجہ کی یہ حمایت ایسے وقت میں آئی ہے جب ہندوستان اور امریکہ کے درمیان تجارتی بات چیت چل رہی ہے اور ٹرمپ انتظامیہ نے ہندوستان پر 50 فیصد ٹیرف نافذ کر دیا ہے۔ اس ٹیرف میں 25 فیصد اضافی پابندی روس کے ساتھ تیل تجارت کی وجہ سے لگائی گئی ہے۔

لاوروف نے کہا کہ ہندوستان اور روس کے درمیان تعلقات عام شراکت داری نہیں ہے بلکہ یہ مراعات یافتہ اسٹریٹیجک پارٹنر شپ ہے۔ انہوں نے یہ بھی بتایا کہ ہندوستان اور روس کے درمیان مستقل بات چیت ہوتی رہتی ہے اور وزیر خارجہ ایس جے شنکر اس سال روس کا دورہ کریں گے وہیں وہ خود ہندوستان کا دورہ کرنے والے ہیں۔