ٹرمپ کی دھمکی،میرا مواخذہ کیا گیا تو امریکی معیشت بیٹھ جائے گی

خبر رساں ادارے اے ایف پی نے امریکی صدر ڈونلڈ ٹرمپ کے حوالے سے بتایا ہے کہ اگر ان کا مواخذہ کیا گیا تو امریکی معیشت بیٹھ سکتی ہے۔ فوکس نیوز کے ایک پروگرام میں گفتگو کرتے ہوئے ٹرمپ نے مزید کہا، ’’میں آپ کو بتا دینا چاہتا ہوں کہ اگر میرا مواخذہ ہوا تو میرے خیال میں مارکیٹ کریش کر جائے گی۔ میرے خیال میں سب غریب ہو جائیں گے۔‘‘

امریکی صدر ٹرمپ نے کہا کہ مواخذے سے صورتحال مزید خراب ہی ہو گی۔ ان کے مطابق، ’’مجھے نہیں معلوم کہ آپ کسی ایسے شخص کا مواخذہ کریں، جس نے زبردست کام کیے ہیں۔‘‘

امریکی صدر نے یہ بیان ایک ایسے وقت میں دیا ہے، جب ان کے سابق ساتھی مائیکل کوہن نے وفاقی عدالت کے سامنے اعتراف کیا ہے کہ انہوں نے ٹرمپ کے کہنے پر ایک خاتون کو رقوم فراہم کی تھیں تاکہ وہ گزشتہ برس نومبر کے صدارتی انتخابات کی مہم کے دوران ٹرمپ کے ساتھ اپنے مبینہ تعلق کو عام نہ کرے۔

امریکی صدر کا کہنا ہے کہ اس خاتون کو یہ رقوم انتخابی مہم کے فنڈز سے نہیں دی گئی تھیں بلکہ انہوں نے یہ اپنی جیب سے ادا کی تھیں۔ ٹڑمپ کے مطابق کوہن کے یہ بیانات دراصل صرف اس لیے ہیں کہ انہیں کم سزا ملے۔

سیاسی مبصرین کا کہنا ہے کہ صدر ڈونلڈ ٹرمپ کے خلاف قانونی گھیرا تنگ ہوتا جا رہا ہے اور ایسے خطرے ہیں کہ ان کی صدارتی خطرے میں پڑ چکی ہے۔ تاہم ان کے مطابق ایسے امکانات کم ہی ہیں کہ نومبر کے وسط مدتی انتخابات سے قبل امریکی صدر ٹرمپ کا مواخذہ ہو سکتا ہے۔

واشنگٹن میں قائم نوسامین لاء فرم سے وابستہ وکیل کیٹ بیلنسکی کا کہنا ہے کہ فوری طور پر مواخذے کا خدشہ نہیں لیکن ٹرمپ اور ان کی انتخابی مہم کے لیے کچھ قانونی مسائل تو پیدا ہو چکے ہیں۔

کیٹ کے مطابق ایسا لگتا ہے کہ امریکی صدر ڈونلڈ ٹرمپ کے خلاف انہی الزامات کے تحت وفاقی الیکشن کمیشن کو ایک شکایت درج کرا دی جائے گی۔