سلامتی کونسل کی ہندوستان اور پاکستان سے امن کی اپیل، کشمیر ہمارا اندرونی معاملہ: ہندوستان

اقوام متحدہ کی سلامتی کونسل کے بند کمرے میں ہوئے مشاورتی اجلاس کے بعد ارکان ممالک نے ہندوستان اور پاکستان سے امن بنائے رکھنے کی اپیل کی ہے اور ایسے کسی بھی قدم سے بچنے کے لئے کہا ہے جس سے خطہ میں تناؤ پیدا ہو۔ بند کمرے کے اجلاس کے خاتمے کے بعد خبر رساں ایجنسی رائٹرز کے مطابق چین کے اقوام متحدہ میں سفیر نے اپنے رد عمل میں کہا کہ’ ’سکیورٹی کونسل کے ارکان کا عموماً خیال ہے کہ پاکستان اور ہندوستان کو کسی بھی یکطرفہ کارروائی سے باز رہنا چاہیے‘‘۔

واضح رہے اقوام متحدہ کی سلامتی کونسل کے بند کمرے میں ہوئے اس اجلاس میں اس مدے پر پاکستان کو چین کے علاوہ کسی بھی ملک کی حمایت نہیں ملی ۔ امریکہ اور روس نے کھل کر ہندوستانی موقف کی حمایت کی ۔پاکستان مودی حکومت کے اس فیصلے کے بعد پوری طرح بوکھلا گیا ہے جس کے بعد کشمیر اور لداخ یونین ٹیریٹریزبن گئی ہیں اور جموں و کشمیر سے آرٹیکل 370 اور 35 اے ہٹ گیا ہے ۔ پاکستان کی اس بوکھلاہٹ کا ساتھ دیتے ہوئے چین نے یہ مدا اقوام متحدہ کی سلامتی کونسل میں اٹھایا جس کے بعد کل سلامتی کونسل کا بند کمرے میں اجلاس ہوا۔ذرائع کے مطابق اس اجلاس میں 15 میں سے 14 ارکان ممالک نے ہندوستان کے موقف کی حمایت کی اور پاکستان کے موقف کی صرف چین کی جانب سے حمایت ملی۔

اقوام متحدہ میں ہندوستان کے سفیر سید اکبر الدین نے نہ صرف صحافیوں کے سوالوں کا جواب دیا بلکہ ہندوستان کا موقف رکھتے ہوئے کہا کہ آرٹیکل 370 ہٹایا جانا ہندوستان کا اندرونی معاملہ ہے اور صرف ہندوستان ہی یہ طے کر سکتا ہے کہ وہ اپنے اندرونی معاملات کیسے حل کرے گا۔ انہوں نے حکومت کے فیصلہ کا دفاع کرتے ہوئے کہا کہ کشمیر میں صورتحال ٹھیک ہے اور وہاں جو پابندیاں عائد ہیں ان کو بتدریج ختم کیا جا رہا ہے اور پیر سے اسکول اور کالج وغیر کھلنے جا رہے ہیں ۔انہوں نے کہا کہ کچھ لوگ جموں و کشمیر میں بدامنی پھیلانا چاہتے ہیں لیکن ہندوستان ان کے ان ارادوں کو کامیاب نہیں ہونے دے گا۔

اکبر الدین نے اپنے خطاب کے بعد صحافیوں سے چھ سوال لئے ار سوالوں کے جواب میں کہا کہ ہندوستان پاکستان سمیت ہر ملک سے اپنے مسائل بات چیت کے ذریعہ حل کرنے کے لئے تیار ہے لیکن پاکستان کے ساتھ کوئی بھی بات چیت جب ہی ممکن ہے جب پاکستان دہشت گردی کو لگام لگائے ۔انہوں نے کہا کہ ہندوستان شملہ معاہدہ پر قائم ہے لیکن پاکستان پہلے ہندوستان کے خلاف دہشت گردوں کی حمایت بند کرے۔