دہلی سمیت شمالی ہند میں پھر آندھی طوفان کا اثر، کئی افراد ہلاک

دہلی سمیت شمالی ہندوستان کے کئی حصوں میں جمعہ کی شب آندھی طوفان میں کئی افراد کی جان چلی گئی اور معمولات زندگی بری طرح متاثر ہوئی۔ اترپردیش میں آندھی طوفان اور بارش کی وجہ سے 5 افراد کے جان بحق ہونے کی خبر ہے۔

اتر پردیش کے مراد آباد ضلع میں 2 لوگوں کی موت ہوئی ہے۔ امروہہ میں ایک، سنبھل میں ایک اور رامپور میں بھی ایک شخص کی جان چلی گئی ہے۔ وہیں دہلی کے علی پور علاقہ میں بجلی کا کھمبا گرنے سے ایک بائیک سوار کی موت واقع ہو گئی۔ یوپی میں آندھی طوفان سے جگہ جگہ بجلی کے کھمبوں کے ساتھ درخت بھی زمیں دوز ہو گئے۔

مغربی بنگال کے کئی اضلاع میں لگاتار ہو رہی بارش سے معمولات زندگی متاثر ہے۔ کئی اضلاع میں بارش کے دوران بجلی گرنے اور دیوار منہدم ہو جانے کی وجہ سے 9 لوگوں کے مرنے کی خبر ہے، وہیں 12 افراد زخمی بھی ہوئے ہیں۔ محکمہ ڈیزازٹر منیجمنٹ کے مطابق ہوگلی ضلع میں بجلی گرنے سے 4 لوگوں کی جان چلی گئی۔ بیربھوم ضلع میں بجلی گرنے سے ایک شخص ہلاک ہوا ہے۔ مغربی بردھمان ضلع کے کٹوا اور منگل کوٹ میں دیوار گرنے سے 2 افراد کی جان چلی گئی۔

اتراکھنڈ کے اترکاشی، ٹہری اور پوڑی میں بادل پھٹنے کے واقعات سمانے آئے ہیں۔ بادل پھٹنے کی وجہ سے چار دھام یاترا پر گئے ہزاروں یاتری پھنس گئے پوڑی ضلع میں 3 مقامات پر 3 بادل پھٹنے کی خبر ہے۔ وہیں ٹہری کے گھنسالی میں بادل پھٹنے کے بعد زور دار بارش بھی ہوئی۔