کینسر سے جنگ ہار گئے پنکج دھیر، 68 سال کی عمر میں لی آخری سانس، ٹی وی انڈسٹری میں غم کی لہر

دنیائے تفریح کو آج صبح مشہور و معروف اداکار پنکج دھیر کے انتقال کی بے حد تکلیف دہ خبر ملی۔ بی آر چوپڑا کے سیریل ’مہابھارت‘ میں ’کرن‘ کا یادگار کردار نبھا کر گھر گھر مشہور ہوئے پنکج نے 68 سال کی عمر میں آخری سانس لی۔ اچانک ان کے انتقال کی خبر نے ٹی وی انڈسٹری کے ساتھ ساتھ فلم انڈسٹری کو بھی غم میں مبتلا کر دیا ہے۔

مشہور و معروف اداکار فیروز نے پنکج دھیر کے انتقال کی تصدیق کرتے ہوئے اپنے گہرے رنج و غم کا اظہار کیا ہے۔ فیروز خان دراصل پنکج کے قریبی دوست تھے۔ انھوں نے ایک میڈیا ادارہ سے بات کرتے ہوئے کہا کہ ’’ہاں، یہ سچ ہے کہ وہ اب اس دنیا میں نہیں رہے۔ ذاتی طور پر میں بہت اچھے دوست سے محروم ہو گیا ہوں۔ وہ بہت پیارے انسان تھے۔ میں ابھی تک صدمے میں ہوں۔ مجھے نہیں پتہ کہ کیا بولنا چاہیے۔ وہ واقعی بہت اچھے تھے، اور اس سے زیادہ فی الحال میں کچھ نہیں بول سکتا۔‘‘

پنکج دھیر کے انتقال پر ’سِنٹا‘ (سی آئی این ٹی اے اے) کی طرف سے بھی ایک بیان جاری کر افسوس ظاہر کیا گیا ہے۔ بیان میں لکھا گیا ہے کہ ’’بے حد غم اور گہری تکلیف کے ساتھ ہم آپ کو مطلع کرتے ہیں کہ ہمارے ٹرسٹ کے سابق سربراہ اور سِنٹا کے سابق عزت مآب جنرل سکریٹری پنکج دھیر کا 15 اکتوبر 2025 کو انتقال ہو گیا۔‘‘ بیان میں یہ بھی جانکاری دی گئی ہے کہ پنکج دھیر کی آخری رسومات 15 اکتوبر کی شام 4.30 بجے پون ہنس کے بغل میں ویلے پارلے (مغرب)، ممبئی میں ادا کی جائے گی۔

بتایا جاتا ہے کہ پنکج دھیر کینسر میں مبتلا تھے۔ وہ اس بیماری سے لڑ کر جیت حاصل بھی کر چکے تھے، لیکن کچھ ماہ قبل کینسر نے دوبارہ جسم میں اپنی جگہ بنا لی۔ یہ پتہ چلنے کے بعد پنکج کو آئی سی یو میں داخل کرانا پڑا تھا اور اس کے بعد ان کی ایک بڑی سرجری ہوئی۔ وہ زندگی کی جنگ لڑتے رہے، لیکن آخر وہ یہ جنگ ہار گئے۔

پنکج دھیر کو ان کی شاندار اداکاری اور رعب دار آواز کے لیے جانا جاتا تھا، لیکن 1988 کے تاریخی سیریل ’مہابھارت‘ میں ادا کیے گئے کرن کے کردار کو انھوں نے زندہ و جاوید بنا دیا۔ ان کے اس کردار کو اتنی مقبولیت ملی کہ ملک کے کئی حصوں میں ان کے مجسمے کی پوجا بھی کی جانے لگی۔ انھوں نے ’سڑک‘، ’سولجر‘ اور ’بادشاہ‘ جیسی کی کامیاب فلموں میں بھی کام کیا اور ٹی وی انڈسٹری میں بھی مستقل سرگرم رہے۔