پاکستان کا جھوٹ بے نقاب، جن 2 ایئربیس پر فتح-1 میزائل داغنے کا کیا دعویٰ وہ ہندوستان میں ہیں ہی نہیں

پاکستان میں ’جیو نیوز چینل‘ نے حال ہی میں ایک انٹرویو نشر کیا، جس میں ’آپریشن بنیان مرصوص‘ کے دوران فتح-1 میزائل داغنے والی لانچ ٹیم کے اراکین سے بات کی گئی۔ اس انٹرویو میں پاکستانی افسران نے دعویٰ کیا کہ ان کے میزائلوں نے ہندوستان کے 2 فوجی ٹھکانوں کو کامیابی سے نشانہ بنایا۔ لیکن اس دعوے پر سوال اٹھائے گئے ہیں، کیونکہ انہوں نے جن ایئربیسز کا ذکر کیا ہے وہ ہندوستان میں ہیں ہی نہیں۔

’جیو نیوز‘ نے ان افراد کا انٹرویو دکھایا جنہیں فتح-1 میزائل لانچ ٹیم کا حصہ بتایا گیا۔ اینکر نے ان سے براہ راست سوال کیا کہ فتح-1 میزائل اپنے طے شدہ اہداف پر صحیح طریقے سے گرا یا نہیں۔ اس پر کیپٹن منیب جمال نے جواب دیا – بالکل۔ ہمیں 2 اہداف سونپے گئے تھے – راجوری ایئربیس اور مامون ایئربیس۔ ہم نے دونوں کو کامیابی سے نشانہ بنایا۔ یہ انٹرویو پاکستان میں کافی دکھایا گیا، جس میں دعویٰ کیا گیا کہ میزائلوں نے اپنے اہداف کو درست طریقے سے نشانہ بنایا اور مشن کامیاب رہا۔ لیکن جیسے ہی یہ خبر سوشل میڈیا پر پھیلی لوگوں نے ان اہداف کی سچائی پر سوال کھڑے کر دیے۔

پاکستانی افسران کی جانب سے بتائے گئے دونوں ناموں پر سب سے بڑا سوال یہ ہے کہ ہندوستان میں راجوری ایئربیس اور مامون ایئربیس کے نام سے ہندوستانی فضائیہ کا کوئی ایئربیس موجود ہی نہیں ہے۔ راجوری جموں و کشمیر کا ایک ضلع ہے جہاں ہندوستانی فوج کے کچھ یونٹس تعینات ہیں، لیکن وہاں کوئی آپریشنل ایئرفورس بیس نہیں ہے۔ اسی طرح مامون پٹھان کوٹ کے پاس ایک فوجی چھاؤنی کا علاقہ ہے، جہاں بنیادی طور پر آرمی ہیڈکوارٹر اور دیگر یونٹس رہتے ہیں۔ وہاں پر بھی کوئی ایئربیس نہیں ہے۔ ماہرین کا کہنا ہے کہ پاکستانی ٹیم نے شاید مقامی فوجی ٹھکانوں کے ناموں کو غلط طریقے سے ایئربیس بتا دیا یا جان بوجھ کر تشہیر کے لیے غلط ناموں کا استعمال کیا۔

یہ دعویٰ سامنے آنے کے بعد سوشل میڈیا اور دفاعی ماہرین نے اسے جعلی ہدف والا دعویٰ قرار دیا۔ ہندوستان میں کئی اصل ایئربیس جیسے پٹھان کوٹ، جموں، سری نگر، اُدھم پور وغیرہ موجود ہیں، لیکن پاکستانی افسران ان میں سے کسی کا بھی صحیح نام نہیں لے پائے۔ اس واقعہ نے پاکستانی میڈیا اور فوج کے دعووں کی ساکھ پر پھر سے سوال کھڑے کر دیے ہیں۔ کئی لوگ اسے جنگ کے دوران اپنے عوام کا حوصلہ بڑھانے کے لیے کی گئی تشہیر مان رہے ہیں۔

قابل ذکر ہے کہ فتح-1 پاکستان کا سطح سے سطح پر مار کرنے والا گائیڈڈ میزائل ہے، جسے حالیہ سالوں میں تیار کیا گیا ہے۔ ’آپریشن بنیان مرصوص‘ کے دوران پاکستان نے ان میزائلوں کا استعمال ہندوستان کے فوجی ٹھکانوں پر کرنے کا دعویٰ کیا تھا۔ لیکن جب اہداف کے نام ہی غلط یا موجود نہ ہوں تو میزائل کی درستی اور مشن کی کامیابی پر شکوک و شبہات پیدا ہوتے ہیں۔ حالانکہ ہندوستانی افسران نے اب تک ان دعووں پر کوئی باضابطہ ردعمل نہیں دیا ہے، لیکن دفاعی حلقوں میں اسے پاکستانی پروپیگنڈے کا حصہ مانا جا رہا ہے۔