نیپال: ٹریکنگ کے دوران 6 ہندوستانی سیاح لاپتہ، شدید برف باری کے درمیان ریسکیو آپریشن جاری

نیپال کے ہمالیائی علاقے میں شدید برف باری کے بعد 6 ہندوستانی سیاح لاپتہ ہو گئے ہیں۔ ان میں 2 خواتین اور 4 مرد شامل ہیں۔ تمام سیاح نیپال کی گہری ترین جھیلوں میں سے ایک شے-فوکسونڈو کی ٹریکنگ کے لیے نکلے تھے۔ افسران نے خبر رساں ایجنسی ’اے این آئی‘ کو اس کی تصدیق کی ہے۔ موصولہ اطلاعات کے مطابق سیاح ڈولپو بدھ دیہی میونسپلٹی کے وارڈ نمبر 4 اور 8 سے جھیل کی طرف جا رہے تھے۔ انہیں آخری بار شے-فوکسونڈو دیہی میونسپلٹی کے وارڈ 4 اور 8 کے درمیان واقع نُملہ پاس اور باگلہ پاس کے علاقوں میں دیکھا گیا تھا۔

مقامی گائیڈوں کو خدشہ ہے کہ خلیج بنگال میں اٹھنے والے سمندری طوفان ’ارنب‘ کے اثر سے ہونے والی شدید برف باری کے باعث سیاح پہاڑوں میں پھنس گئے ہیں۔ بتایا جا رہا ہے کہ مقامی لوگوں نے انہیں خراب موسم اور پہاڑی درّوں میں خطرناک حالات کے پیش نظر آگے نہ بڑھنے کی وارننگ دی تھی۔ اس کے باوجود سیاحوں نے اپنا سفر جاری رکھا۔ خیال کیا جا رہا ہے کہ بلندی والے علاقے سے واپسی کے دوران وہ برف میں پھنس گئے۔ ڈولپا کی چیف ڈسٹرکٹ آفیسر جونو ہمال نے بتایا کہ سیاح فوکسونڈو جھیل کی طرف واپس لوٹتے وقت راستے میں پھنس گئے۔ انہوں نے کہا کہ آگے بڑھنے سے پہلے مقامی لوگوں نے انہیں موسم اور پہاڑی راستوں کے دشوار گزار حالات سے آگاہ کیا تھا۔

شے-فوکسونڈو دیہی میونسپلٹی کے صدر دھاوا سمڈوک گرونگ نے بتایا کہ پہاڑی درّوں میں موبائل نیٹورک نہیں ہوتا۔ اس وجہ سے لاپتہ سیاحوں سے رابطہ کرنا مشکل ہو رہا ہے۔ ان کے مطابق وارڈ 4 اور 8 کے درمیان موبائل فون سروس دستیاب نہیں ہے۔ ایسے میں سیاحوں کی موجودہ حالت اور ان کے ٹھکانے کے بارے میں معلومات حاصل کرنا ایک چیلنج بنا ہوا ہے۔

لاپتہ سیاحوں کی تلاش کے لیے انتظامیہ نے ریسکیو آپریشن شروع کر دیا ہے۔ تاہم شدید برف باری اور خراب موسم کے باعث بلندی والے علاقوں میں بچاؤ کی کارروائیاں متاثر ہو رہی ہیں۔ ڈولپا کے پولیس ڈپٹی سپرنٹنڈنٹ انیل راج گری نے بتایا کہ تازہ ترین معلومات کے مطابق تمام 6 ہندوستانی سیاحوں سے رابطہ نہیں ہو سکا ہے۔ انہوں نے کہا کہ انتظامیہ نے متعلقہ ایجنسی سے ریسکیو آپریشن میں مدد کے لیے ہیلی کاپٹر کا انتظام کرنے کی درخواست کی ہے۔ لاپتہ سیاحوں کا پتہ لگانے اور انہیں بحفاظت نکالنے کے لیے نیپالی فوج کی ایک ٹیم بھی تعینات کی گئی ہے۔ موبائل نیٹورک کی عدم دستیابی، شدید برف باری اور دشوار گزار پہاڑی راستوں کے باعث ریسکیو ٹیموں کو سیاحوں کی درست لوکیشن معلوم کرنے میں مشکلات پیش آ رہی ہیں۔

ضلعی انتظامیہ کے دفتر کے مطابق اپر ڈولپا پہنچنے والے سیاحوں کی تعداد 244 ہے۔ ان میں 149 نیپالی شہری، سارک ممالک کے 44 سیاح اور دیگر ممالک کے 51 سیاح شامل ہیں۔ موسم خراب ہونے کے پیش نظر ضلعی انتظامیہ نے سیاحوں کو خطرناک علاقوں میں جانے سے گریز کرنے اور محفوظ مقامات پر رہنے کا مشورہ دیا ہے۔