اہم خبریں: یو پی کے وزیر اعلیٰ یوگی آدتیہ ناتھ نے عید الاضحیٰ پر مبارکباد پیش کی

اترپردیش کے وزیر اعلی یوگی آدتیہ ناتھ نے عید الاضحیٰ کے مبارک موقع پر ریاستی عوام کو دلی مبارکباد اور نیک خواہشات پیش کی ہیں۔ وزیر اعلی نے آج یہاں جاری ایک تہنیتی پیغام میں کہا کہ عید الاضحیٰ کا تہوار سبھی کو سماجی ہم آہنگی اور سماجی خیر سگالی کی ترغیب دیتا ہے۔ انہوں نے لوگوں سے کورونا انفیکشن کے مد نظر تمام احتیاط برتے ہوئے عید الاضحیٰ منانے کی اپیل کی۔

کولکتہ: نوبل انعام یافتہ ماہر اقتصادیات امرتیہ سین کا کورونا وائرس کا ٹیسٹ مثبت آیا ہے۔ ان کی عمر 89 سال ہے۔ امریتہ سین وبائی امراض کی وجہ سے اپنے آبائی گھر نہیں آسکے تھے۔ وہ اس ماہ ہی مغربی بنگال کے بیر بھوم ضلع میں بولپور-شانتی نکیتن میں میں واقع اپنے گھر آئے تھے جہاں ٹیسٹ کے بعد وہ کورونا سے متاثر پائے گئے ہیں۔ ذرائع نے ہفتہ کو یہ اطلاع دی۔ وزیر اعلیٰ ممتا بنرجی نے ٹوئٹ کیا کہ ''میں سین کی جلد صحت یابی کے لیے دعا گو ہوں۔ ہم سب آپ کی جلد صحت یابی کے لیے دعاگو ہیں۔"
ذرائع نے بتایا کہ نامور ماہر معاشیات ڈاکٹر کی نگرانی میں ہیں اور پیر کو ان کا ایک اور کووڈ ٹیسٹ ہوسکتا ہے۔

اپوزیشن کے مشترکہ صدارتی امیدوار یشونت سنہا نے کہا کہ منتخب ہونے پر میری اہم ترجیحات میں سے ایک حکومت سے کشمیر ایشو کو حل کرنے، امن، انصاف، جمہوریت، معمول کی حالت بحال کرنے، جموں و کشمیر کے تئیں دشمنانہ طرز کو ختم کرنے کے لیے ضروری قدم اٹھانے کی گزارش کرنا ہوگا۔

سماجوادی پارٹی کے نگراں اور اتر پردیش کے سابق وزیر اعلیٰ ملائم سنگھ یادو کی بیوی سادھنا گپتا کا انتقال ہو گیا ہے۔ گروگرام کے میدانتا اسپتال میں وہ زیر علاج تھیں۔ انھیں پھیپھڑوں میں انفیکشن کی شکایت تھی۔

سری لنکا میں معاشی بحران نے تشویش ناک شکل اختیار کر لی ہے۔ ملک کے حالات انتہائی خربا ہو رہے ہیں اور لوگ سڑکوں پر نکل کر حکومت کے خلاف مظاہرے کر رہے ہیں۔ اس درمیان خبریں سامنے آ رہی ہیں کہ سری لنکا کے صدر گوٹبایا راج پکشے فرار ہو گئے ہیں۔ اے ایف پی خبر رساں ایجنسی نے دفاعی ذرائع کے حوالہ سے بتایا ہے کہ مظاہرین نے صدر گوٹبایا راج پکشے کی رہائش کو گھیر لیا، جس کی وجہ سے وہ فرار ہو گئے۔

جموں و کشمیر میں امرناتھ غار کے پاس بادل پھٹنے کے بعد اب ڈوڈہ ضلع میں بھی بادل پھٹنے کا واقعہ پیش آیا ہے۔ ایک خبر رساں ایجنسی کے مطابق آج علی الصبح تقریباً 4 بجے مشرقی جموں میں ڈوڈہ ضلع کے ٹھتھری شہر میں بادل پھٹا ہے۔ راحت کی بات یہ ہے کہ اس میں کسی کے ہلاک ہونے کی اطلاع نہیں ہے۔ بادل پھٹنے کے سبب کچھ گھر اور گاڑیاں ملبہ میں دب گئے ہیں۔

امرناتھ غار کے پاس 8 جولائی کو بادل پھٹنے کا واقعہ پیش آیا تھا، اس میں اب تک 16 لوگ کی موت کی تصدیق ہو چکی ہے۔ آئی ٹی بی پی کے رابطہ عامہ افسر وویک کمار پانڈے کا کہنا ہے کہ مقامی انتظامیہ نے ہمیں مطلع کیا ہے کہ تقریباً 30 سے 40 لوگ اب بھی لاپتہ ہو سکتے ہیں۔ ہم آئی ٹی بی پی، ہندوستانی فوج، این ڈی آر ایف، ایس ڈی آر ایف اور جموں و کشمیر پولیس کے ساتھ مل کر کام کر رہے ہیں۔ غار والے علاقے سے ہمیں کئی گمشدہ لوگ مل سکتے ہیں۔

جاپان کے سابق وزیر اعظم شنزو آبے کے قتل کے بعد ہندوستان میں ایک دن کے لیے قومی غم منانے کا اعلان کیا گیا ہے۔ اس کے پیش نظر لال قلعہ اور راشٹرپتی بھون میں قومی پرچم کو نصف جھکایا گیا ہے۔ قابل ذکر ہے کہ شنزو آبے کا قتل 8 جولائی کو ایک شخص نے گولی مار کر کیا تھا۔