اہم خبریں LIVE: دہلی میں تھم نہیں رہا کورونا، 24 گھنٹے میں 2495 نئے کیسز، 7 اموات

دہلی میں کورونا کی تیز رفتاری جاری ہے۔ گزشتہ 24 گھنٹے میں راجدھانی میں کورونا کے 2495 نئے معاملے سامنے آئے ہیں۔ فکر انگیز بات یہ ہے کہ اموات کی تعداد میں بھی اضافہ ہوا ہے۔ گزشتہ 24 گھنٹے میں سات افراد کی اس وائرس کی وجہ سے موت ہو چکی ہے۔ دہلی میں انفیکشن کی شرح اس وقت 15.41 فیصد بتائی جا رہی ہے۔

بی جے پی سے اتحاد توڑنے کے بعد نتیش کمار نے مہاگٹھ بندھن میں شامل ہونے کا فیصلہ جیسے ہی کیا، اس بات کو لے کر قیاس آرائیاں شروع ہو گئیں کہ وہ ایک بار پھر وزیر اعلیٰ بنیں گے تو ان کی حلف برداری کب ہوگی۔ اس سلسلے میں خبریں سامنے آ رہی ہیں کہ دن اور وقت کا تعین ہو چکا ہے۔ حلف برداری کے لیے کل یعنی 10 اگست کو 2 بجے کا وقت طے کیا گیا ہے۔ ساتھ ہی اس موقع پر نائب وزیر اعلیٰ (تیجسوی یادو) بھی اپنے عہدہ کا حلف لیں گے۔ یہ جانکاری آر جے ڈی کے آفیشیل ٹوئٹر ہینڈل پر دی گئی ہے۔ قابل ذکر ہے کہ سات پارٹیوں کے تعاون سے بہار میں مہاگٹھ بندھن کی حکومت تشکیل ہونے والی ہے اور بی جے پی بہار میں بالکل الگ تھلگ پڑ گئی ہے۔

جنتا دل یو لیڈر نتیش کمار نے بی جے پی سے اتحاد توڑ کر ایک بار پھر آر جے ڈی اور کانگریس سے ہاتھ ملانے کا اعلان کر دیا ہے۔ جلد ہی مہاگٹھ بندھن حکومت کی تشکیل ہوگی، لیکن اس درمیان آر جے ڈی ذرائع سے خبر سامنے آئی ہے کہ نتیش کمار نے تیجسوی یادو سے پرانی باتیں بھولنے کی گزارش کی ہے۔ خبر رساں ایجنسی اے این آئی نے اپنے ایک ٹوئٹ میں آر جے ڈی ذرائع کے حوالے سے لکھا ہے کہ ’’جنتا دل یو لیڈر نتیش کمار نے آر جے ڈی کے تیجسوی یادو سے کہا، 2017 میں جو ہوا اسے بھول جائیں اور ایک نیا باب شروع کریں۔‘‘

این ڈی اے سے تعلقات ختم کرنے کے اور گورنر کو اپنا استعفی پیش کرنے کے بعد بعد نتیش کمار رابڑی دیوی سے ملاقات کے لئے ان کی رہائش گاہ پر پہنچ گئے ہیں۔ اس سے یقینی ہو گیا ہے کہ وہ مہا گٹھ بندھن میں شامل ہونے جا رہے ہیں۔ اس سے پہلے مہاگٹھ بندھن کے کئی لیڈران کہہ چکے ہیں کہ اگر نتیش کمار این ڈی اے سے تعلقات توڑ لیتے ہیں تو ان کا خیرمقدم کیا جائے گا۔

بہار کے وزیر اعلیٰ نتیش کمار نے آج گورنر پھاگو سنگھ سے راج بھون میں ملاقات کی اور انہیں اپنا استعفیٰ سونپ دیا۔ استعفی دینے کے بعد انہوں نے کہا کہ ان کی پارٹی کے تمام ارکان پارلیمنٹ اور ارکان اسمبلی نے متفقہ طور پر فیصلہ لیا ہے کہ ہمیں این ڈی اے کا ساتھ چھوڑ دینا چاہئے۔ قبل ازیں میڈیا رپورٹ میں کہا گیا تھا کہ پارٹی کے اجلاس کے دوران نتیش کمار نے کہا تھا کہ بی جے پی ان کی پارٹی کو توڑنے کی کوشش کر رہی ہے۔ انہوں نے کہا تھا کہ کوئی ان کی پارٹی کو کسی بھی طرح سے توڑے یہ مناسب نہیں ہے۔ نتیش کمار اب مہا گٹھ بندھن کے ساتھ مل کر حکومت سازی کر سکتے ہیں۔

وزیر اعظم نریندر مودی نے یوم عاشورہ کے موقع پر حضرت امام حسینؑ کی قربانی، سچائی سے وابستگی اور ناانصافی کے خلاف جدوجہد کو یاد کیا۔ انہوں نے ٹوئٹ کیا ’’آج کا دن حضرت امام حسین کی قربانیوں کو یاد کرنے کا دن ہے۔ انہیں سچائی کے ساتھ ان کی غیر متزلزل وابستگی اور ناانصافی کے خلاف جدوجہد کے لیے یاد کیا جاتا ہے۔ وہ مساوات اور بھائی چارے کو بھی بہت اہمیت دیتے تھے۔‘‘

بہار میں چل رہے سیاسی گھمسان کے درمیان گورنر پھاگو چوہان نے وزیر اعلیٰ نتیش کمار کو ملاقات کے لئے شام 4 بجے کا وقت دیا ہے۔ دریں اثنا، وزیر اعلیٰ کی رہائش گاہ کے باہر بڑی تعداد میں پولیس اہلکاروں کی تعیناتی کی گئی ہے۔

کئی دنوں کی کشمکش کے بعد آج مہاراشٹر کی ایکناتھ شندے اور دیویندر فڈنویس کی مخلوط حکومت کی کابینہ کی توسیع عمل میں آئی۔ مہاراشٹر کے گورنر نے بی جے پی اور شیو سینا کے شندے دھڑے سے 9-9 وزرا کو حل دلایا۔

بہار میں چل رہی سیاسی ہلچل کے دوران وزیر اعلیٰ نتیش کمار نے گورنر پھاگو سنگھ چوہان سے ملاقات کا وقت مانگا ہے۔ کئی دنوں سے یہ قیاس آرائیاں چل رہی ہیں کہ بہار کی بی جے پی - جے ڈی یو کی مخلوط حکومت گرنے جا رہی ہے۔ ادھر، آر جے ڈی، بی جے پی، اور جے ڈی یو تمام سیاسی جماعتوں کے اجلاس جاری ہیں۔ نتیش کمار آج دوپہر 12 بجے سے ایک بجے کے درمیان گورنر سے ملاقات کا وقت مانگا ہے۔

خبر رساں ایجنسی اے این آئی نے پولیس ذرائع کے حوالہ سے اطلاع دی ہے کہ بی جے پی کے لیڈر شری کانت تیاگی کو نوئیڈا کے قریب سے گرفتار کر لیا گیا ہے۔ تیاگی پر نوئیڈا کی گرینڈ اومیکس سوسائٹی میں خاتون سے بدسلوکی کرنے کا الزام ہے۔ کچھ روز قبل اس کی خاتون کو نازیبا الفاظ کہنے والی ویڈیو وائرل ہو گئی تھی۔ جس کے بعد شری کانت کے خلاف کئی ایف آئی آر درج کی گئیں اور وہ تبھی سے فرار چل رہا تھا۔

مہاراشٹر کی بی جے پی اور ایکناتھ شندے دھڑے کی مخلوط حکومت کی کابینہ کی آج توسیع ہو رہی ہے۔ پارٹی کی جانب فہرست جاری کر کے بتایا گیا ہے کہ 18 وزرا حلف لینے جا رہے ہیں۔ اس فہرست میں شیو سینا کے لیڈر عبدالستار کا نام بھی شامل ہے۔ سیلوڈ، اورنگ آباد سے رکن اسمبلی ادھو ٹھاکرے حکومت میں بھی وزیر تھے۔

بہار میں نتیش کمار کی قیاد والی این ڈی اے حکومت پر خطرے کے بادل منڈلا رہے ہیں۔ دریں اثنا، آر جے ڈی کے تمام ارکان اسمبلی اور لیڈران لالو پرساد یادو کی رہائش گاہ پر پہنچ گئے ہیں۔ یہاں 11 بجے اہم اجلاس منعقد ہونے جا رہا ہے۔ آر جے ڈی کے ساتھ لیفٹ فرنٹ کے ارکان اسمبلی بھی لالو کی رہائش پر نظر آ رہے ہیں۔ ادھر، جے ڈی یو نے بھی اپنے ارکان اسمبلی کا اجلاس طلب کیا ہے۔