اہم خبریں: آئی پی ایل-21 کے پہلے مقابلے میں آخری گیند پر جیتا بنگلور، ممبئی مایوس

آئی پی ایل 2021 کا پہلا مقابلہ آج ممبئی انڈینس اور رائل چیلنجرس بنگلور کے درمیان کھیلا گیا۔ بنگلور کے کپتان وراٹ کوہلی نے ٹاس جیت کر پہلے گیندبازی کا فیصلہ کیا تھا اور روہت شرما کی کپتانی والی ممبئی انڈینس نے 20 اوور میں 159 رن بنائے۔ جواب میں بنگلور کی ٹیم ایک وقت دباؤ میں آ گئی تھی جب کوہلی، میکسویل اور شہباز کا وکٹ جلدی جلدی گر گیا۔ لیکن ایک بار پھر اے بی ڈیویلیرس نے اپنی اہمیت ثابت کی اور 47 رن کی تیز طرار اننگ کھیل کر بنگلور کی امیدیں روشن کر دیں۔ وہ 19.4 اوور میں آؤٹ ہوئے جب بنگلور کو جیت کے لیے محض 2 رنوں کی ضرورت تھی۔ پانچویں اور چھٹی گیند پر ایک-ایک رن بنا کر بنگلور کے بلے بازوں نے اپنی ٹیم کو جیت سے ہمکنار کیا۔ اس دلچسپ مقابلے میں شکست کے بعد ممبئی انڈینس کے شیدائیوں کے چہرے پر مایوسی صاف دیکھنے کو ملی۔

دہلی میں سخت احتیاط کے درمیان بھی کورونا کے کیسز میں لگاتار اضافہ درج کیا جا رہا ہے۔ گزشتہ 24 گھنٹے میں 8521 نئے کیسز سامنے آئے ہیں اور 39 لوگوں کی موت بھی واقع ہو گئی ہے۔ گزشتہ 24 گھنٹے میں ایک لاکھ 9 ہزار سے زائد کورونا ٹیسٹ کرائے جانے کی باتیں بھی سامنے آئی ہیں۔

اچھی شروعات کے بعد آخر میں بلے بازوں کے جلدی جلدی آؤٹ ہونے کے سبب ممبئی انڈینس کی ٹیم 20 اوور میں 9 وکٹ کے نقصان پر 159 رن ہی بنا سکی۔ اس طرح آئی پی ایل 2021 کے پہلے میچ میں رائل چیلنجرس بنگلور کے سامنے جیت کے لیے 160 رن کا ہدف ہے۔ ممبئی کی جانب سے سب سے زیادہ 49 رن کرس لن نے بنائے جو آج آئی پی ایل میں ممبئی کی طرف سے اپنا پہلا میچ کھیل رہے تھے۔ بنگلور کی جانب سے ہرشل پٹیل نے سب سے زیادہ 5 وکٹ لیے اور اپنے آخری اوور میں ہی انھوں نے 3 وکٹ لے لیے۔

کورونا کے بڑھتے انفیکشن کو دیکھتے ہوئے بہار میں اسکول-کالج اور کوچنگ انسٹی کو جہاں 18 اپریل تک بند کرنے کا اعلان کر دیا گیا ہے، وہیں 30 اپریل تک سبھی مذہبی مقامات پر لوگوں کی آمد و رفت پر روک لگا دی گئی ہے۔ گویا کہ اب مندر اور مسجد کے دروازے لوگوں کے لیے بند ہو گئے ہیں۔ نتیش حکومت نے کورونا انفیکشن پر کنٹرول کے پیش نظر یہ قدم اٹھایا ہے۔ وزیر اعلیٰ نتیش کمار نے آج ہوئی ایک انتہائی اہم میٹنگ کے بعد یہ بھی فیصلہ لیا کہ آخری رسومات اور شادی کی تقریب میں 50 سے زائد لوگوں کی شرکت کی اجازت نہیں ہوگی۔

کورونا کے بڑھتے معاملوں کو دیکھتے ہوئے اڈیشہ حکومت نے ماسک نہ پہننے والوں کے لیے سخت جرمانہ کا التزام کیا ہے۔ موصولہ اطلاعات کے مطابق ماسک نہ پہننے پر پہلی اور دوسری بار 2000 روپے کا جرمانہ لگایا جائے گا اور اس کے بعد ماسک نہ پہننے والوں سے 5000 روپے جرمانہ کا حکم دیا گیا ہے۔

آئی پی ایل 2021 کا پہلا میچ آج چنئی کے میدان میں کھیلا جا رہا ہے۔ رائل چیلنجرس بنگلور کے کپتان وراٹ کوہلی نے ٹاس جیت کر ممبئی انڈینس کے کپتان روہت شرما کو بلے بازی کی دعوت دی ہے۔ یعنی 7.30 بجے ممبئی انڈین کی ٹیم بلے بازی کرتی ہوئی نظر آئے گی۔

مغربی بنگال کی وزیر اعلیٰ ممتا بنرجی لگاتار بی جے پی اور امت شاہ پر حملہ کر رہی ہیں۔ اپنے تازہ بیان میں انھوں نے امت شاہ پر الزام عائد کیا ہے کہ انھوں نے پولیس پر غیر اخلاقی کاموں میں ملوث ہونے کا دباؤ بنایا۔

ملکہ برطانیہ کے شوہر اور شہزادہ فلپ 99 برس کی عمر میں انتقال کر گئے۔ بکنگھم پیلس نے شہزادہ فلپ کے انتقال کی تصدیق کرتے ہوئے بتایا کہ ان کا انتقال آج صبح قلعہ ونڈسر میں ہوا۔ برطانوی میڈیا کے مطابق شہزادہ فلپ کی طبیعت کچھ عرصے سے خراب تھی اور انہیں رواں برس فروری میں اسپتال بھی منتقل کیا گیا تھا۔ شہزادہ فلپ بیماری اور عمر کی زیادتی کے باعث اگست 2017 میں شاہی ذمہ داریوں سے دستبردار ہو گئے تھے اور آخری بار انہیں جولائی 2020 میں عوامی طور پر دیکھا گیا تھا۔

جموں کشمیر نیشنل کانفرنس کے لیڈر اور سابق وزیر اعلیٰ عمر عبد اللہ کورونا وائرس سے متاثر پائے گئے ہیں۔ ان میں وبا کی علامات ظاہر نہیں ہو رہی ہیں، تاہم انہوں نے خود کو اپنی رہائش پر قرنطین کر لیا ہے۔

ملک کی دوسری ریاستوں کے ساتھ اتر پردیش میں بھی کورونا کی دوسری لہر مہلک ہوتی جا رہی ہے۔ اسی کے پیش نظر مرادآباد میں نائٹ کرفیو نافذ کرنے کا اعلان کیا گیا ہے۔ آج رات سے نافذ العمل ہونے والے حکم کے تحت رات 10 بجے صبح 6 بجے تک کرفیو نافذ رہے گا۔

ہندوستان کی طرف سے دنیا کے متعدد ممالک کو ویکسین بھیجے جانے پر کانگریس لیڈر راہل گاندھی نے سوال اٹھایا ہے۔ انہوں نے کہا پوچھا کہ آیا اپنے ملک کے باشندوں کو خطرے میں ڈال کر ویکسین کا ایکسپورٹ صحیح ہے! راہل گاندھی نے ٹوئٹر پر لکھا، ’’بڑھتے کورونا بحران میں ویکسین کی قلت ایک انتہائی گمبھیر مسئلہ ہے، تہوار نہیں۔ اپنے ملک کے لوگوں کو خظرے ڈال کر ویکسین ایکسپورٹ کرنا کیا صحیح ہے۔ مرکزی حکومت تمام ریاستوں کو بلاتفریق مدد کرے۔ ہم سب کو مل کر اس وبا کو ہرانا ہوگا۔‘‘

کانگریس کی جنرل سکریٹری پرینکا گاندھی نے کورونا کے دور میں بچوں پر امتحانات کا بوجھ ڈالنے پر تشویش کا اظہار کیا۔ انہوں نے کہا، ’’ایسے دور میں جب کورونا ہمارے ملک کو ایک بار لپیٹ میں لے رہا ہے، امتحانات کا اضافی دباؤ بچوں کی ذہنی صحت کو متاثر کر رہا ہے۔ ہمارے نظام تعلیم کو اپنے رویہ میں تبدیلی لانے اور محض بات کرنے کی بجائے بچوں کے ساتھ حساسیت اور ہمدردی کا اظہار کرنے کی ضرورت ہے۔‘‘

مٹھابھنگا سے ٹی ایم سی امیدوار گیریندرا ناتھ برمن پر اس وقت مبینہ طور پر بی جے پی کارکنان نے حملہ کر دیا جب وہ گزشتہ روز انتخابی مہم سے واپس لوٹ رہے تھے۔ ٹی ایم سی کارکن نے کہا، ’’بی جے پی کے غنڈوں نے ان پر حملہ کیا اور کار میں توڑ پھوڑ کی۔ ان کے سر پر چوٹ لگی ہے۔ ہم کارروائی کا مطالبہ کرتے ہیں۔‘‘

کیرلا کے وزیراعلی پنارائی وجین جمعرات کو کورونا سے متاثر پائے گئے۔اس سے قبل بدھ کو مسٹر وجین کی بیٹی وینا وجین کورونا سے متاثر پائی گئی تھیں۔
ایک سرکاری ریلیز میں بتایا گیا ہے کہ مسٹر وجین کو کوزی کوڈ کے سرکاری میڈیکل کالج اسپتال میں داخل کرایا گیا ہے۔ریلیز کے مطابق مسٹر وجین نے اپنی بیٹی کے کورونا سے متاثر پائے جانے کے بعد اپنی کورونا جانچ کرائی تھی۔ اس جانچ رپورٹ میں وزیراعلی بھی کورونا سے متاثر پائے گئے تھے۔