اہم خبر: ’گلی بوائے‘ فلم کو آسکر 2020 میں اینٹری ملی

ممبئی: زویا اختر کی ہدایت کاری میں بنی رنویر سنگھ اور عالیہ بھٹ کی اداکاری والی فلم ’گلی بوائے‘ کو آسکر2020میں اینٹری مل گئی ہے۔ اس فلم کو ہندستان کی طرف سے ’بیسٹ انٹرنیشنل فیچر فلم‘ کے زمرہ میں آسکر کے لئے بھیجا گیا ہے۔

فلمساز اور بالی ووڈ اداکار فرحان اختر نے ٹوئٹر پر فلم کے آسکر میں پہنچنے کا اعلان کیا۔ انہوں نے کہا کہ ’گلی بوائے‘ کو ہندستان کی طرف سے 92ویں آسکر کے لئے منتخب کیا گیا ہے۔ شکریہ فلم فیڈریشن اور زویا، ریما کاگتی، رنویر، عالیہ، سدھارتھ چترویدی اور فلم کے دیگر اراکین کو مبارکباد۔

اس فلم میں رنویر سنگھ نے مراد کا کردار ادا کیا ہے جو ممبئی کی جھگی میں رہنے والا رینپر ہے اور سماجی اقتصادی حالات سے اوپر اٹھ کر اسٹار بننا چاہتا ہے۔ یہ فلم اسٹریٹ رینپر ڈیوائن اور نیجی سے متاثر ہے۔ 14فروری 2019کو ریلیز ہوئی یہ فلم سپر ہٹ رہی تھی۔ خیال رہے کہ اتراکھنڈ کے ایک کسان کی زندگی پر مبنی ڈوکیومنٹری ’موتی باغ‘ بھی ڈوکیومنٹری زمرہ میں ہندستان کی اینٹری ہے۔

اتر پردیش کے کیرانہ سے سماجوادی پارٹی کے رکن اسمبلی ناہید حسن کی گرفتاری کے لئے پولس نے ان کی رہائش گاہ پر چھاپہ ماری حالانکہ وہ پولس کو گھر پر موجود نہیں مل سکے اور ان کی گرفتاری عمل میں نہیں آ سکی۔ ناہید حسن پر ایس ڈی ایم اور سی او کے ساتھ گاڑی چیکنگ کے دوران بدسلوکی کرنے کا الزام ہے۔

اطلاعات کے مطابق پولس 4 وارنٹ لے کر ناہید حسن کے گھر پر پہنچی تھی اور چھاپہ ماری ایک گھنٹہ تک چلتی رہی۔ انتظامیہ کا کہنا ہے کہ ناہید حسن کو تین مرتبہ موقع دیا گیا ہے لیکن اب تک گاڑی کے کاغذات انہوں نے جمع نہیں کرائے ہیں۔ یوپی پولس نے ناہید حسن کے خلاف غیر ضمانتی وارنٹ جاری کرائے ہیں۔

نئی دہلی: کانگریس کی جنرل سیکریٹری پرینکا گاندھی نے سنیچر کو حکومت پر نشانہ لگاتے ہوئے کہا کہ کسانوں کو بولنے نہیں دیا جارہا ہے۔پرینکا گاندھی نے کسانوں کی حمایت میں ایک ٹوئٹ کرتے ہوئے کہا کہ ’’کیا وجہ ہے کہ کسانوں کو دہلی آ کر اپنے مطالبہ کو اٹھانے سے روک دیا جاتا ہے؟ بی جے پی حکومت اپنی مہم میں کسانوں کی بھلائی کی بات کرتی رہتی ہے۔ پھر جب اتر پردیش کا کسان کہتا ہے کہ انہیں گنے کا بقایہ چاہئے، قرض معافی اور بجلی کے دام میں کٹوتی چاہئے تو انہیں بولنے کیوں نہیں دیا جاتا؟ واضح رہے کہ مغربی اترپردیش کے گنا کسانوں نے اپنی بقایہ جات کی ادائیگی کرنے کا مطالبہ کرتے ہوئے دہلی تک مارچ کیا ہے۔

راجستھان میں شری گنگا نگر-پاکستان بین الاقوامی سرحد کے 2 کلو میٹر کے دائرے میں دفعہ 144 نافذ کر دیا گیا ہے۔ یہ حکم ضلع کلکٹر شیو پرساد نکاتے نے جاری کیا ہے۔ یہ حکم 15 نومبر 2019 تک کے لیے ہے جو کہ شام 7 بجے سے صبح 7 بجے تک اثرانداز ہوگا۔

پرانی دہلی واقع تاریخی جامع مسجد کے نزدیک مشہور مینا بازار میں آج تجاوزات ہٹاؤ مہم چلائی گئی۔ یہ مہم کوتوالی کے سب ڈویژنل مجسٹریٹ گورو ساہنی کی قیادت میں چلائی گئی جس کی وجہ سے وہاں موجود دکانداروں میں افرا تفری کا ماحول پیدا ہو گیا۔

انتخابی کمیشن کے ذریعہ مہاراشٹر اور ہریانہ میں انتخاب کی تاریخوں کے اعلان کا کانگریس پارٹی نے استقبال کیا ہے۔ ساتھ ہی جھارکھنڈ میں ان دونوں ریاستوں کے ساتھ انتخاب نہیں کرائے جانے پر سوال کھڑے کیے ہیں۔ دہلی کانگریس ہیڈ کوارٹر میں پریس سے بات کرتے ہوئے پارٹی ترجمان پون کھیڑا نے کہا کہ مودی حکومت ایک ملک اور ایک انتخاب کی بات کرتی ہے، لیکن مہاراشٹر اور ہریانہ کے ساتھ حکومت نے جھارکھنڈ میں انتخاب کرانے کا فیصلہ نہیں لیا۔

آج ہزاروں کسان مودی حکومت کی وعدہ خلافی سے ناراض ہو کر سڑکوں پر اتر آئے ہیں۔ اتنی بڑی تعداد میں کسانوں کے احتجاج کی وجہ سے دہلی-یو پی سرحد پر زبردست جام کا نظارہ دیکھنے کو مل رہا ہے۔ اس جام کی وجہ سے لوگوں کو کافی پریشانیوں کا بھی سامنا ہے۔

انتخابی کمیشن نے کئی ریاستوں میں خالی اسمبلی سیٹوں پر ضمنی انتخاب کی تاریخ کا اعلان کر دیا ہے۔ اروناچل پردیش، بہار، چھتیس گڑھ، آسام، گجرات، ہماچل پردیش، کرناٹک، کیرالہ، مدھیہ پردیش، میگھالیہ، اڈیشہ، پڈوچیری، پنجاب، راجستھان، سکم، تمل ناڈو، تلنگانہ اور اتر پردیش کی 64 اسمبلی سیٹوں پر 21 اکتوبر کو ضمنی انتخاب ہوں گے اور اس کے نتائج 24 اکتوبر کو آ جائیں گے۔

چیف الیکشن کمشنر سنیل اروڑا نے پریس کانفرنس میں ہریانہ اور مہاراشٹر اسمبلی انتخابات کی تاریخوں کا اعلان کر دیا۔ انھوں نے میڈیا سے مخاطب ہوتے ہوئے کہا کہ 21 اکتوبر کو دونوں ہی ریاستوں میں پولنگ ہوگی جب کہ ووٹوں کی گنتی 24 اکتوبر کو ہوگی۔ الیکشن سے متعلق نوٹیفکیشن 27 ستمبر کو جاری کیے جائیں گے۔ سنیل اروڑا نے یہ بھی بتایا کہ 4 اکتوبر تک امیدوار نامزدگی کا پرچہ داخل کر سکیں گے جب کہ 7 اکتوبر تک نام واپس لے سکیں گے۔

ہزاروں کسانوں نے نوئیڈا کے سیکٹر 69 واقع ٹرانسپورٹ نگر سے دہلی پہنچ گیا ہے۔ اپنے مطالبات کو لے کر کسانوں کا یہ ہجوم دہلی پہنچا ہے اور مودی حکومت کے خلاف نعرے بھی لگا رہا ہے۔ کسانوں کے اس احتجاجی مظاہرہ کی وجہ سے دہلی کے لوگوں کو جام کا سامنا کرنا پڑ رہا ہے۔ کئی جگہ پر پولس نے ٹریفک جانے سے بچنے کے لیے بیریکیڈ وغیرہ بھی لگا رکھا ہے۔

الیکشن کمیشن آج 12 بجے پریس کانفرنس کرنے والی ہے۔ اس پریس کانفرنس پر لوگوں کی نظر ہے۔ امید کی جا رہی ہے کہ الیکشن کمیشن اس پریس کانفرنس کے دوران مہاراشٹر اور ہریانہ کے اسمبلی انتخابات کی تاریخوں کا اعلان کرے گی۔