اہم خبر: کرناٹک میں جمہوریت ذبح ہوئی، یَدی یورپا کی حلف برداری پر کانگریس کا تبصرہ

بی جے پی کے لیڈر بی ایس یدی یورپا نے ایک مرتبہ پھر سے کرناٹک کے وزیر اعلیٰ کا حلف لے لیا ہے۔ اس پر کانگریس پارٹی کی طرف سے بی جے پی کی سخت مذمت کی گئی ہے۔ کانگریس نے کہا ہے کہ کارناٹک میں جمہوریت کو ذبح کیا گیا ہے۔

کرناٹک کانگریس کی طرف سے بی ایس یدی یورپا کی حلف بارداری سے قبل ٹوئٹ کر کے ان پر حملہ بولا گیا۔ ٹوئٹ میں لکھا گیا ہے، ’’بدعنوانی کے آئیکان اور جیل میں سزا کاٹ چکے بی ایس یدی یورپا ایک مرتبہ پھر ہارس ٹریڈنگ کا استعمال کر کے اقتدار میں واپسی کر رہے ہیں۔ کرناٹک کے لوگوں کو یدی یورپا کی 2008-2011 والی مدت کار یاد ہے، جس کے آخر میں انہیں جیل جانا پڑا تھا۔‘‘ کانگریس نے مزید کہا کہ کرناٹک میں تارخ کو دوہرایا جا رہا ہے۔

ایک دوسرے ٹوئٹ میں کانگریس نے لکھا، ’’کرناٹک میں جمہوریت کو ذبح کیا جا رہا ہے۔ یدی یورپا کے پاس اگر خاطر خواہ تعداد نہیں ہے تو وہ حکومت سازی کا دعوی کس طرح پیش کر سکتے ہیں! گونر جو کہ آئین کے محافظ ہیں انہوں نے اس کی اجازت کیوں دی؟ قانون کی بالادستی کہاں ہے!‘‘

کرناٹک بی جے پی کے صدر بی ایس یدی یورپا نے چوتھی مرتبہ کرناٹک کے وزیر اعلیٰ کے طور پر حلف لے لیا ہے۔ راج بھون میں منعقدہ حلف برداری تقریب کے دوران انہیں گورنر وجو بھائی والا نے عہدے اور رازداری کا حلف دلوایا۔ گورنر نے انہیں ایک ہفتہ کے اندر اکثریت ثابت کرنے کو کہا ہے۔

کابل: افغانستان کے دو صوبوں میں سکیورٹی فورسز اور جنگجووں کے درمیان جھڑپوں میں 15 جنگجو ہلاک ہوگئے جبکہ اس حملے میں سات پولیس اہلکاروں کی بھی موت ہو گئی ہے۔ حکام نے ان جھڑپوں کی تصدیق کرتے ہوئے جمعہ کو بتایا کہ اس حملے میں سات پولیس اہلکاروں کی بھی موت ہو گئی ہے۔ غزنی کی صوبائی حکومت کے ترجمان حارف نوری نے بتایا کہ طالبان نے خوگياني ضلع کے ایک پولیس اسٹیشن پر حملہ کر دیا جس میں تین پولیس اہلکاروں کی موت جبکہ چار دہشت گرد ہلاک ہوگئے۔ اس کے علاوہ جنوبی قندھار صوبے میں ایک سیکورٹی چوکی پر طالبان کے جنگجووں نے حملہ کر دیا۔ اس حملے میں چار پولیس اہلکاروں کی موت ہو گئی۔ پولیس کی جوابی کارروائی میں 11 طالبان کے جنگجو ہلاک ہوئے۔ان حملوں میں چار دہشت گرد زخمی بھی ہوئے ہیں۔

پاکستان کے تیز گیندباز محمد عامر نے ٹیسٹ کرکٹ سے ریٹائرمنٹ کا اعلان کر دیا ہے۔ خبروں کے مطابق پاکستان کے لیے 36 ٹیسٹ کھیلنے والے محمد عامر نے محدود اوور کے کھیل پر توجہ دینے کے لیے ٹیسٹ کرکٹ کو الوداع کہنے کا فیصلہ کیا ہے۔ عامر نے 2009 میں ٹیسٹ میچ میں قدم رکھا تھا۔ میچ فکسنگ میں 5 سال کی سزا ملنے کے بعد عامر نے 2016 میں ٹیسٹ کرکٹ سے ہی واپسی کی تھی۔ عامر ٹیسٹ کرکٹ میں زیادہ کامیاب نہیں رہے۔

احمد آباد کے غوطہ رہائشی علاقہ میں عمارت میں لگی زبردست آگ کے بعد اندر پھنسے سبھی لوگوں کو محفوظ باہر نکال لیا گیا ہے۔ یہ آگ پانچویں منزل پر لگی تھی۔ آگ کی خبر ملنے کے بعد دمکل کی کئی گاڑیاں موقع پر پہنچ گئیں اور راحت رسانی کا کام شروع کر دیا۔

پنجاب کے لدھیانہ واقع منڈین کلاں میں ایک فیکٹری میں دھماکہ ہونے کی خبریں موصول ہو رہی ہیں۔ اس دھماکہ میں ایک شخص ہلاک ہو گیا جب کہ کم از کم 10 افراد زخمی ہو گئے ہیں۔ زخمیوں کو قریب کے اسپتال میں علاج کے لیے داخل کرایا گیا ہے۔

لوک سبھا میں آج اعظم خان کے اس متنازعہ بیان پر زبردست ہنگامہ ہوا جو انھوں نے 25 جولائی کو ایوان کی کارروائی چلا رہی رما دیوی پر کیا تھا۔ آج اس بیان پر خواتین اراکین نے اپنی بات رکھی اور اعظم خان کے خلاف سخت کارروائی کا مطالبہ کیا۔ لوک سبھا میں موجود مرد اراکین نے بھی سماجوادی پارٹی لیڈر اعظم خان کے خلاف کارروائی کا مطالبہ کیا تاکہ آئندہ سے کوئی اس طرح کی زبان کسی خاتون کے لیے استعمال نہ کر سکے۔

سپریم کورٹ نے موب لنچنگ کے معاملے میں مرکزی وزیر داخلہ کو نوٹس جاری کی اہے۔ عدالت میں مفاد عامہ عرضی داخل کر 2018 میں سپریم کورٹ کے ذریعہ اس معاملے میں دیے گئے ایک فیصلہ کو ٹھیک سے نافذ کرانے کا مطالبہ کیا گیا ہے۔ اسی عرضی پر سماعت کرتے ہوئے عدالت عظمیٰ نے آج مرکزی وزارت داخلہ کو نوٹس جاری کیا ہے۔ مودی حکومت کے لیے یہ نوٹس کسی جھٹکا سے کم نہیں ہے۔

کرناٹک میں حکومت بنانے کے لیے ریاست کے بی جے پی صدر بی ایس یدی یورپا نے گورنر سے آج صبح ملاقات کی۔ گورنر سے مل کر انھوں نے حکومت سازی کا دعویٰ پیش کر دیا ہے۔ میڈیا ذرائع کے مطابق یدی یورپا نے یہ اعلان بھی کیا ہے کہ وہ آج شام 6 بجے وزیر اعلیٰ عہدہ کا حلف لیں گے۔

سماجوادی پارٹی کے رکن پارلیمنٹ روی پرکاش ورما نے راجیہ سبھا میں موب لنچنگ کو روکنے کے لیے قانون بنانے کے مطالبے کو لے کر وقفہ صفر نوٹس دیا ہے۔