اہم خبر: مہاراشٹر میں اندوہناک سڑک حادثہ، 4 افراد ہلاک، 11 زخمی

کولہا پور: مہاراشٹر کے کولہا پور ضلع کے رادھا نگری تحصیل میں گھوٹواڑے کے نزدیک ہوئے سڑک حادثے میں بد کو چار افراد کی مو ت ہوگئی اور 11دیگر زخمی ہوگئے۔ پولیس ذرائع کے مطابق ایم آئی ڈی سی کے 15ملازمین کو کروزر لے کرآرہا تھا تبھی یہ حادثہ ہوا۔ملازمین قصبہ تارلے گاؤں میں واقع ایم آئی ڈی سی جارہے تھے۔ گھوٹواڑے گاؤں میں مہادیو مندر کے نزدیک رادھانگری روڈ پر ایک ڈمپر کا ٹائر پھٹ گیا جس سے دوسری طرف سے آنے والےکروزر کی ڈمپر سے ٹکر ہوگئی۔اس حادثے میں دوافراد کی موت جائے وقوع پر ہی ہوگئی جبکہ دو افراد کی علاج کے دوران موت ہوگئی۔ زخمیوں کو چھترپتی پرمیلا راجے اسپتال میں داخل کرایاگیا ہے۔ہلاک شدگان میں کرشنا وٹھل گورو(28)ریشی کیش راجیندرپاٹل(23)،پرکاش ماروتی ایکاوڑے(45) اور ساتپا گورو(ڈرائیور)شامل ہیں۔پولیس نے معاملہ درج کرلیاہے۔

کرناٹک میں سیاسی بحران کے درمیان کانگریس لیڈران بنگلورو میں گورنر ہاؤس کے باہر مظاہرہ کر رہے تھے۔ پولس نے کانگریس کے سینئر لیڈر غلام نبی آزاد سمیت کانگریس کے کئی لیڈروں کو حراست میں لے لیا ہے۔

ممبئی میں کانگریس لیڈر ڈی کے شیو کمار کو پولس نے حراست میں لے لیا ہے۔ باغی اراکین اسمبلی سے ملنے کے لیے ڈی کے شیو کمار ممبئی کے ہوٹل پہنچے تھے۔ پولس نے علاقے میں دفعہ 144 لگا رکھا تھا۔

اتراکھنڈ کے خان پور سے بی جے پی رکن اسمبلی پرنب سنگھ چمپئن کا ایک ویڈیو سوشل میڈیا پر وائرل ہو رہا ہے۔ ویڈیو میں بی جے پی رکن اسمبلی ہتھیاروں کے ساتھ ’مجھ کو رانا جی معاف کرنا‘ گانے پر ٹھمکے لگاتے ہوئے نظر آ رہے ہیں۔ اس ویڈیو میں وہ گندی گندی گالی دیتے ہوئے اور شراب پیتے ہوئے بھی نظر آ رہے ہیں۔ قابل ذکر ہے کہ یہ وہی رکن اسمبلی ہیں جنھوں نے کچھ دن قبل ایک صحافی کو جان سے مارنے کی دھمکی دی تھی اور اس کی پٹائی بھی کر دی تھی۔

راجستھان کی گہلوکت حکومت نے بدھ کے روز بجٹ پیش کیا جس میں کسانوں کے لیے بڑی خوشخبری ہے۔ دراصل وزیر اعلیٰ اشوک گہلوت نے کسان فلاحی فنڈ بنائے جانے کا اعلان کر دیا ہے۔ اس فنڈ کے لیے کانگریس حکومت نے 1000 کروڑ روپے کا بجٹ بھی الاٹ کر دیا ہے۔ اس کے علاوہ ہر گرام پنچایت میں ’نندی گائے آشرے‘ کے قیام کا بھی فیصلہ لیا گیا ہے۔

راہل گاندھی کے لکھنؤ ائیر پورٹ پر پہنچنے کے بعد کانگریس لیڈروں نے ان کا زوردار استقبال کیا۔ یہاں سے وہ امیٹھی کے لیے روانہ ہوں گے۔ امیٹھی میں وہ کانگریس کے کارکنان کے ساتھ میٹنگ کریں گے۔

دمشق: شام کے مشرقی صوبے دیرالزور کے شہر دابلان میں بارودی سرنگ میں دھماکے ہونے سے منگل کو کم از کم 7 بچوں کی موت ہو گئی ہے۔ یہ اطلاع عالمی میڈیا کے مختلف ذرائع نے دی ہے۔ یہ بارودی سرنگیں آئی ایس کے دہشت گردوں نے شہر پر کنٹرول برقرار رکھنے کے لئے لگائی تھی۔ ان بارودی سرنگوں کو ہٹائے جانے کے دوران ان کی زد میں آکر بہت سے شہری بھی مارے جا چکے ہیں۔

کرناٹک کے بنگلورو کے پولیکیشی نگر میں زیر تعمیر عمارت منہدم ہو گئی۔ حادثہ میں ایک شخص کی موت ہو گئی ہے۔ اب تک 8 لوگوں کو عمارت کے ملبے سے باہر نکال کر اسپتال میں داخل کرایا گیا ہے۔ موقع پر ریسکیو آپریشن جاری ہے۔