اہم خبریں LIVE: فیفا عالمی کپ میں نیدرلینڈ نے امریکہ کا خواب توڑ دیا، 1-3 سے شکست دے کر کوارٹر فائنل میں پہنچا

فٹبال عالمی کپ میں آج سے ناک آؤٹ مقابلے شروع ہو گئے۔ پہلے پری کوارٹرفائنل میں نیدرلینڈ نے امریکہ 1-3 سے شکست دے کر اس کا خواب چکناچور کر دیا۔ اس جیت کے ساتھ نیدرلینڈ کوارٹر فائنل میں پہنچ گیا۔ وہاں اس کا مقابلہ ارجنٹائنا یا آسٹریلیا سے ہوگا۔ نیدرلینڈ کی ٹیم 2014 کے بعد کوارٹر فائنل میں پہنچی ہے۔ وہ 2018 میں کوالیفائی نہیں کر پائی تھی۔ نیدرلینڈ کی ٹیم مجموعی طور پر ساتویں بار کوارٹر فائنل میں پہنچنے میں کامیاب ہوئی ہے۔

کیرالہ کی جیلوں میں قیدیوں کی چھوٹ کے نئے اصولوں کو تنقید کا نشانہ بناتے ہوئے کانگریس نے ہفتہ کے روز الزام عائد کیا کہ یہ قدم ریاست کے وزیر اعلیٰ پینارائی وجین کے ذریعہ اپنی پارٹی کے ایسے کارکنان کو آزاد کرنے کی ایک کوشش ہے جو سیاسی قتل معاملوں میں شامل ہونے کی وجہ سے جیل میں ہیں۔ 23 نومبر کو وجین کابینہ کے ذریعہ منظور کیے گئے اصولوں کے مطابق تاحیات جیل کی سزا کاٹ رہے لوگوں کو چھوڑ کر سیاسی قیدیوں کو پابندی سے ہٹا دیا گیا ہے۔ اس سے قتل کی سازش تیار کرنے، متعلقہ جرائم اور قتل کی کوشش کے لیے جیل میں بند سیاسی قیدی اپنی سزا میں چھوٹ کے اہل ہو جائیں گے۔

گجرات اسمبلی انتخاب کے دوسرے مرحلہ کی ووٹنگ کے لیے انتخابی تشہیر ہفتہ کی شام 5 بجے ختم ہو گئی۔ انتخابی تشہیر کے آخری دن امیدوار اور سیاسی پارٹیوں نے ووٹروں کو متوجہ کرنے کی بھرپور کوشش کی۔ اسمبلی انتخاب کے دوسرے مرحلہ میں ریاست کی 182 اسمبلی سیٹوں میں سے 93 سیٹوں کے لیے ووٹ ڈالے جائیں گے۔

دہلی کی کڑکڑڈومہ عدالت نے جواہر لال نہرو یونیورسٹی (جے این یو) کے سابق طالب علم عمر خالد اور خالد سیفی کو شمال مشرقی دہلی میں فروری 2020 کے فسادات سے متعلق ایک کیس میں بری کر دیا ہے۔ تاہم وہ فی الحال جیل میں ہی قید رہیں گے کیوں کہ ان پر پولیس کی جانب سے یو اے پی اے کے تحت بھی کارروائی کی گئی ہے۔

حیدرآباد یونیورسٹی کے اس پروفیسر کو پولیس نے حراست میں لے لیا ہے کہ جس پر یہاں تعلیم حاصل کر رہی تھائی لینڈ سے تعلق رکھنے والی طالبہ کے ساتھ جنسی استحصال کرنے کا الزام ہے۔ اس واقعہ کے خلاف یونیورسٹی طلبا کی جانب سے احتجاجی مظاہرہ کئے جانے کی بھی اطلاع ہے۔

بنگلہ دیش کے خلاف اتوار سے شروع ہونے والی ونڈے سیریز سے قبل ٹیم انڈیا کو بڑا جھٹکا لگا ہے۔ ٹیم کے 'میچ ونر' اور تجربہ کار کھلاڑی محمد سمیع چوٹ کی وجہ سے سیریز سے باہر ہو گئے ہیں۔ سیریز کا پہلا مقابلہ 4 دسمبر کو ڈھاکہ میں کھیلا جائے گا۔