اہم خبریں: ہندوستان نے سیریز جیتنے کے ساتھ کیا 2023 کا آغاز، سری لنکا کو 1-2 سے دی شکست

سری لنکا کے خلاف جاری تین میچوں کی ٹی-20 سیریز کے آخری میچ میں ہندوستان نے 91 رنوں سے جیت حاصل کر لی ہے۔ ہندوستان نے سری لنکا کو جیت کے لیے 229 رنوں کا ہدف دیا تھا، لیکن سری لنکا کی پوری ٹیم 16.4 اوور میں محض 137 رن بنا کر آؤٹ ہو گئی۔ سری لنکا کی طرف سے سب سے زیادہ 23-23 رن مینڈس اور دَسن شناکا نے بنائے۔ دھننجے ڈی سلوان نے 22 رن، اسالانکا نے 19 رن اور نسانکا نے 15 رن بنائے۔ باقی سبھی بلے باز پوری طرح ناکام رہے۔ ہندوستان کی طرف سے سب سے زیادہ 3 وکٹ عرشدیپ سنگھ نے 2.4 اوور میں 20 رن دے کر لیے۔ 2-2 وکٹ عمران ملک، ہاردک پانڈیا اور یجویندر چہل کو حاصل ہوئے، جبکہ ایک کوٹ اکشر پٹیل کو ملا۔ سوریہ کمار یادو کو ان کی طوفانی سنچری کے لیے مین آف دی میچ کا ایوارڈ دیا گیا۔

ہندوستان اور سری لنکا کے درمیان جاری ٹی-20 سیریز کا تیسرا اور آخری مقابلہ آج راجکوٹ میں کھیلا جا رہا ہے۔ ٹاس جیت کر ہندوستانی کپتان ہاردک پانڈیا نے پہلے بلے بازی کا فیصلہ کیا تھا جو پوری طرح درست ثابت ہوا ہے۔ مقررہ 20 اوورس میں ہندوستانی ٹیم نے 5 وکٹ کے نقصان پر 228 رن بنا لیے ہیں۔ یعنی سری لنکا کے خلاف جیت کے لیے 229 رنوں کا ہدف ہے۔ ہندوستان کی طرف سے سوریہ کمار یادو نے ایک بار پھر طوفانی اننگ کھیلتے ہوئے سنچری اسکور کرنے میں کامیابی حاصل کی۔ انھوں نے محض 51 گیندوں میں 9 چھکوں اور 7 چوکوں کی مدد سے ناٹ آؤٹ 112 رن بنائے۔ سلامی بلے باز شبھمن گل نے 36 گیندوں پر 46 رن اور راہل ترپاٹھی نے 16 گیندوں پر 35 رن کا تعاون کیا۔ آخر میں اکشر پٹیل بھی 9 گیندوں پر تیز طرار 21 رن بنا کر ناٹ آؤٹ رہے۔

بی سی سی آئی نے نئی سلیکشن کمیٹی کا اعلان کر دیا ہے۔ چیتن شرما کو ایک بار پھر چیف سلیکٹر بنایا گیا ہے۔ ان کے علاوہ شیو سندر داس، سبرتو بنرجی، سلل انکولا اور شری دھرن شرت کے نام پر مہر لگائی گئی ہے۔ بی سی سی آئی کو سلیکٹر عہدہ کے لیے 600 سے زیادہ لوگوں کی درخواستیں ملی تھیں۔ سلیکشن کمیٹی کا انتخاب کرکٹ مشاورتی کمیٹی نے کیا ہے۔ بی سی سی آئی نے اعلان کیا کہ چیتن شرما ایک بار پھر سے سلیکشن کمیٹی کے سربراہ ہوں گے۔

ممبئی کے ماہم میں واقع سینٹ مائیکل چرچ سے متصل قبرستان میں شرپسندوں کی جانب سے توڑ پھوڑ کی اطلاع ہے۔ رپورٹ کے مطابق یہاں موجود قبروں کے اوپر بنائے گئے متعدد صلیبوں کو توڑ دیا گیا ہے۔ قبرستان کی بے حرمتی سے کیتھولک برادری میں غم و غصہ پایا جاتا ہے، جب کہ ممبئی پولیس نے معاملے کی تحقیقات شروع کر دی ہیں۔

ادکارہ تونیشا شرما موت معاملہ میں گرفتار شدہ اداکار شیزان خان کی درخواست ضمانت پر سماعت آج ملتوی کر دی گئی۔ وسائی عدالت اب اس معاملہ پر 9 جنوری کو سماعت کرے گی۔

عام آدمی پارٹی لیڈر فوجا سنگھ سراری مے پنجاب کابینہ میں اپنے وزیر کے عہدے سے استعفی دے دیا ہے۔ انہوں نے کہاں کہ وہ ذاتی وجوہات کی بنا پر استعفی دے رہے ہیں۔ تاہم کچھ دن پہلے ان کے خلاف بدعنوانی کے الزامات عائد ہوئے تھے اور کانگریس نے ان کو ہٹائے جانے کا مطالبہ کرتے ہوئے احتجاج کیا تھا۔ امکان ظاہر کیا جا رہا ہے کہ پنجاب کابینہ میں اس کے بعد ردوبدل کی جا سکتی ہے۔

اے این آئی نے ذرائع کے حوالہ سے خبر دی ہے کہ سڑک حادثہ میں زخمی ہونے والے رشبھ پنت کے گھٹنے کا کل ممبئی کے ایک نجی اسپتال میں کامیاب آپریشن کیا گیا۔ ذرائع کا کہنا ہے کہ وہ طبی ماہرین کی ٹیم کی نگرانی میں ہیں اور تیزی سے صحت یاب ہو رہے ہیں۔

عام آدمی پارٹی لیڈران اور کارکنان نے آج دہلی میں ایل جی ہاؤس کے باہر احتجاج کیا۔ مظاہرین کا الزام ہے کہ انہوں نے ایم سی ڈی کے پریزائیڈنگ آفیسر کی تقرری غیر آئینی طریقہ سے کی ہے۔ گزشتہ روز ایم سی ڈی کے میئر انتخاب میں بھی زبردست ہنگامہ ہوا تھا، جس کے بعد ووٹنگ ملتوی کر دی گئی تھی۔ دریں اثنا، بی جے پی کی جانب سے بھی راج گھاٹ پر احتجاج کیا جا رہا ہے۔ بی جے پی کا الزام ہے کہ عآپ نے میئر انتخاب کی ووٹنگ سے قبل غنڈہ گردی کی۔

شمالی ہندوستان میں کڑاکے کی سردی کے درمیان شدید دھند کی وجہ سے متعدد ٹرینیں تاخیر کا شکار ہو رہی ہیں۔ ٹرینوں کے تاخیر سے چلنے کی وجہ سے مسافر پریشان ہیں، جبکہ انہیں اسٹیشن لینے کے لئے پہنچنے والے لوگوں کا انتظار ختم ہونے کا نام نہیں لے رہا۔