اہم خبریں LIVE: مہاراشٹر میں کورونا کیسز میں پھر اضافہ، ادھو ٹھاکرے نے طلب کیا اجلاس

مہاراشٹر میں کورونا کے معاملے ایک مرتبہ پھر بڑھ رہے ہیں۔ جس کے پیش نظر وزیر اعلیٰ ادھو ٹھاکرنے نے کووڈ-19 ٹاسک فورس کا اجلاس طلب کر لیا ہے۔

کرشن کمار کناتھ عرف کے کے کی آخری رسومات ممبئی میں ادا کر دی گئی ہیں۔ ورسووا شمشان گھاٹ میں بیٹے نے کے کے کی چتا کو مکھاگنی دی۔ کے کے آخری سفر میں ان کے تمام مداحوں نے شرکت کی۔ اس دوران ان کے مداح کافی جذباتی نظر آئے۔ اس دوران بالی ووڈ سے وابستہ متعدد اہم شخصیات بھی موجود رہیں۔ خیال رہے کہ کے کے یکم جون کو کولکاتا میں ایک کنسرٹ کے بعد دل کا دورہ پڑنے سے انتقال کر گئے تھے۔

کانگریس کی صدر سونیا گاندھی کورونا سے متاثر پائی گئی ہیں۔ جس کے بعد انہوں نے خود کو آئسولیٹ کر لیا ہے۔ کانگریس لیڈر رندیپ سنگھ سرجے والا نے کہا، ’’کانگریس صدر سونیا گاندھی نے گزشتہ ایک ہفتہ کے دوران کئی پارٹی لیڈران اور کارکنان سے ملاقات کی، جن میں سے کئی ساتھی کورونا سے متاثر پائے گئے ہیں۔ کل شام سے سونیا گاندھی کو ہلکا بخار اور کورونا کی علامات ظاہر ہوئی ہیں۔ آج ٹیسٹ کرانے پر وہ کورونا پازیٹو پائی گئیں۔‘‘

کشمیر میں خونریزی کا سلسلہ بدستور جاری ہے۔ آج کولگام ضلع میں راجستھان سے تعلق رکھنے والے ایک بینک منیجر کو گولی مار کر قتل کر دیا گیا۔ ملی ٹینٹوں نے آرے موہن پورہ میں واقع علاقائی دیہاتی بینک کے منیجر وجے کمار کو اپنا نشانہ بنایا۔ وجے کمار کا تعلق راجستھان کے ہنومان گڑھ سے تھا۔

گلوکار کے کے کا جسد خاکی ان کی ممبئی میں واقع رہائش گاہ پر لایا گیا ہے۔ ان کی آخری رسومات آج ممبئی میں ہی ادا ہوں گی۔ خیال رہے کہ کے کے کولکاتا میں ایک کنسرٹ میں پرفارم کرنے کے دوران طبیعت بگڑنے کے بعد انتقال کر گئے تھے۔

مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا وائرس کے 3712 نئے کیسز درج کئے گئے۔ اس دوران 5 افراد کی جان چلی گئی، جبکہ 2584 افراد نے شفایابی حاصل کر لی۔ فی الحال ملک بھر کورونا کے 19509 کیسز فعال ہیں۔