اہم خبریں: صدارتی انتخاب 2022 کے پیش نظر بی جے پی نے دروپدی مرمو کو بنایا امیدوار

دروپدی مرمو کی فائل تصویر
دروپدی مرمو کی فائل تصویر
user

قومی آوازبیورو

21 Jun 2022, 9:45 PM

صدارتی انتخاب 2022: بی جے پی نے دروپدی مرمو کو بنایا امیدوار

صدارتی انتخاب کے لیے بی جے پی کی طرف سے امیدوار کے نام کا اعلان کر دیا گیا ہے۔ پارٹی نے دروپدی مرمو کو اپنا امیدوار بنایا ہے۔ بی جے پی صدر جے پی نڈا نے دروپدی مرمو کے نام کا اعلان کرتے وقت اس بات پر زور دیا کہ اس بار ایک خاتون کو صدر جمہوریہ بننے کا موقع ملنا چاہیے۔ پریس کانفرنس کے دوران جے پی نڈا نے کہا کہ ملک کو پہلی بار قبائلی طبقہ سے ایک صدر جمہوریہ دینے کی تیاری ہے۔ ان کے نام کا اعلان کر پارٹی نے ایک طرف قبائلی طبقہ کو خوش کرنے کی کوشش کی ہے، تو وہیں دوسری طرف خواتین کی خود مختاری کو لے کر بھی ایک اہم پیغام دیا ہے۔

21 Jun 2022, 7:49 PM

’شیوسینا چھوڑنے کا میرا کوئی ارادہ نہیں‘، ایکناتھ شندے کا بیان

شیوسینا رکن اسمبلی ایکناتھ شندے نے مہاراشٹر کے وزیر اعلیٰ ادھو ٹھاکرے سے فون پر 15 منٹ بات چیت کی۔ ایکناتھ شندے سے ملنے گئے ملند نارویکر نے اپنے فون پر ان کی ادھو ٹھاکرے سے بات چیت کرائی۔ اس دوران ایکناتھ شندے نے ادھو ٹھاکرے سے کہا کہ شیوسینا اور بی جے پی مل کر حکومت بنائے، یہ ان کی خواہش ہے۔ ساتھ ہی ایکناتھ نے یہ بھی کہا کہ ’’میں نے پارٹی مخالف کوئی قدم نہیں اٹھایا، پھر مجھے گروپ لیڈر عہدہ سے کیوں ہٹایا گیا۔ میرا شیوسینا چھوڑنے کا کوئی ارادہ نہیں۔ میں ہمیشہ بالا صاحب ٹھاکرے کا سچا شیوسینک تھا اور رہوں گا۔‘‘

21 Jun 2022, 6:32 PM

اگنی پتھ اسکیم: پی ایم مودی نے تینوں افواج کے سربراہان کے ساتھ کی میٹنگ

تینوں افواج کے سربراہان کے ساتھ آج وزیر اعظم نریندر مودی نے الگ الگ میٹنگیں کیں۔ وزیر اعظم رہائش پر ہوئی اس میٹنگ میں اگنی پتھ اسکیم کو لے کر تبادلہ خیال ہوا۔ بری فوج کے چیف جنرل منوج پانڈے، بحریہ چیف ایڈمرل آر ہری کمار اور فضائیہ چیف ایئر چیف مارشل وی آر چودھری کے ساتھ میٹنگ ہوئی۔


21 Jun 2022, 4:59 PM

مہاراشٹر میں ہماری حکومت، تمام کانگریس ارکان اسمبلی اور ہمارا اتحاد مضبوط ہے، دیپندر ہڈا

کانگریس لیڈر دیپندر ہڈا نے کہا ’’مہاراشٹر میں ہماری حکومت مضبوط ہے اور تمام کانگریس ارکان اسمبلی کے علاوہ ہمارا اتحاد بھی مستحکم ہے۔ جہاں تک شیو سینا کا سوال ہے تو اس کے سربراہ ادھو ٹھاکرے کامیابی کے ساتھ اس مسئلہ کو حل کر لیں گے۔‘‘

21 Jun 2022, 3:16 PM

مہاراشٹر کی تازہ سیاسی ہلچل کے درمیان کمل ناتھ کانگریس کے مبصر مقرر

کانگریس پارٹی نے مہاراشٹر میں جاری سیاسی پیشرفتوں کے درمیان ایم پی کے سابق وزیر اعلیٰ کمل ناتھ پارٹی کا ریاستی مبصر مقرر کیا گیا ہے۔ خیال رہے کہ شیوسینا کے کچھ لیڈران کی باغی تیور اختیار کئے جانے کے بعد حکومت کو خطرہ قرار دیا جا رہا ہے۔ دریں ذرائع کے حوالہ سے خبر ہے کہ باغیوں کے قائد ایکناتھ شندے کو پارٹی کی قانون ساز پارٹی کی قیادت سے برطرف کر دیا گیا ہے۔ ان کی جگہ اجے چودھری کو قانون ساز پارٹی کا نیا قائمد مقرر کیا گیا ہے۔


21 Jun 2022, 1:13 PM

غلام نبی آزاد کورونا سے متاثر

کانگریس کے سینئر لیڈر اور جموں و کشمیر کے سابق وزیر اعلیٰ غلام نبی آزاد کورونا وائرس سے متاثر پائے گئے ہیں۔ آزاد نے یہ اطلاع ٹوئٹر پر فراہم کی۔ انہوں نے کہا کہ کورونا سے متاثر پائے جانے کے بعد وہ اپنے گھر میں آئسولیشن میں رہ رہے ہیں۔

21 Jun 2022, 11:33 AM

راہل گاندھی سوالات کا سامنا کرنے کے لئے پانچویں مرتبہ ای ڈی کے دفتر پہنچے

نیشنل ہیرالڈ معاملہ میں سوالات کا سامنے کرنے کے لئے راہل گاندھی ای ڈی کے دفتر پہنچ گئے ہیں۔ ای ڈی کی طرف سے راہل گاندھی کو آج پانچویں مرتبہ پوچھ گچھ کے لئے طلب کیا گیا ہے۔ گزشتہ روز ان سے 12 گھنٹے تک پوچھ گچھ کی گئی تھی جبکہ مجموعی طور پر راہل گاندھی 40 گھنٹے سے زیادہ ای ڈی کے سوالات کا سامنا کر چکے ہیں۔ کانگریس پارٹی کی جانب سے ای ڈی کی اس کارروائی کے خلاف پرزور احتجاج کیا جا رہا ہے۔


21 Jun 2022, 9:42 AM

ہندوستان میں کورونا کے 9923 نئے کیسز، 17 اموات

مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا وائرس کے 9923 نئے کیسز درج کئے گئے ہیں۔ اس دوران 74293 افراد نے شفایابی حاصل کر لی، جبکہ 17 افراد کی جان چلی گئی۔ ملک بھر میں اب فعال کیسز کی تعداد 79313 ہو گئی ہے جبکہ یومیہ پازیٹوٹی کی شرح 2.55 فیصد ہو گئی ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔