اہم خبریں LIVE: ’ہم سب ایک رہیں گے تو کامیاب ہوں گے‘، نتیش کے اپوزیشن لیڈران سے ملاقات پر تیجسوی کا رد عمل

بہار کے وزیر اعلیٰ نتیش کمار لگاتار اپوزیشن لیڈران سے ملاقات کر رہے ہیں تاکہ بی جے پی کے خلاف اپوزیشن کو متحد کر ایک مضبوط محاذ تیار کیا جائے۔ اس سلسلے میں رد عمل ظاہر کرتے ہوئے بہار کے نائب وزیر اعلیٰ تیجسوی یادو نے کہا کہ ’’یہ (نتیش کمار کی اپوزیشن لیڈران سے ملاقات) اچھی پیش رفت ہے۔ ہم سب ایک رہیں گے تو کامیاب ہوں گے۔‘‘

برطانوی ملکہ الزبتھ دوئم کے احترام میں ملک میں اتوار کو سرکاری سوگ منایا جائے گا اور اس دن قومی پرچم سرنگوں رہے گا۔ مرکزی وزارت داخلہ نے جمعہ کو ایک بیان جاری کرکے کہا کہ برطانوی ملکہ الزبتھ دوم کا جمعرات کو انتقال ہوگیا ہے اس لئے حکومت نے ان کے احترام میں ملک بھر میں ایک دن کے سرکاری سوگ کا اعلان کیا ہے۔ وزارت داخلہ نے کہا ہے کہ اتوار کو ملک بھر کی تمام عمارتوں پر قومی پرچم سرنگوں رہے گا اور اس دن کوئی سرکاری تفریحی پروگرام منعقد نہیں کیا جائے گا۔

آئی سی سی نے ایشیا کپ میچ کے دوران ایک دوسرے سے الجھنے والے پاکستانی کرکٹر آصف علی اور افغان کرکٹر فرید احمد کرکٹ کونسل کے ضابطہ اخلاق کے لیول-1 کی خلاف ورزی کا مرتکب پایا گیا ہے۔ دنوں کھلاڑیوں پر میچ فیس کے 25 فیصد کا جرمانہ عائد کیا گیا ہے۔

صدر جمہوریہ ہند دروپدی مرمو نے آج ویڈیو کانفرنس کے ذریعے ’پردھان منتری ٹی بی مکت بھارت ابھیان‘ کی شروعات کی۔

قومی دارالحکومت کے آزاد مارکیٹ علاقے میں جمعہ کو ایک زیر تعمیر عمارت گرنے سے کم از کم 5 افراد زخمی ہو گئے۔ فائر سروس کے مطابق شیش محل کے قریب ملبہ تلے چھ سے سات افراد دبے ہو سکتے ہیں۔ فائر ڈپارٹمنٹ کو اس سلسلے میں صبح 8.30 بجے اطلاع ملی جس کے بعد چار فائر بریگیڈ گاڑیاں موقع پر روانہ کی گئیں۔ مقامی لوگوں نے بتایا کہ یہ عمارت چار منزلہ ہے اور اس وقت کوئی نہیں رہتا تھا۔ دہلی پولیس نے بتایا کہ زخمیوں کو ملبہ سے نکال کر انہیں اسپتال میں داخل کرایا ہے۔

ریاست سطحی اور مرکزی کے زیر انتظام تقابلی امتحانات میں نقل روکنے کے لئے انٹر نیٹ بند کرنے کے خلاف سپریم کورٹ میں داخل کی گئی عرضی سماعت کرتے ہوئے سپریم کورٹ نے مرکز کی الیکٹرانکس اور آئی ٹی کی وزارت کو نوٹس جاری کر کے جواب طلب کیا ہے۔ یہ عرضی لیگل سروسز سے متعلق تنظیم سافٹویئر فریڈم لا سینٹر کی جانب سے دادخل کی گئی ہے۔

نئی دہلی میں برطانوی ہائی کمیشن پر لگے پرچم (یونین جیک) کو ملکہ الزبتھ ثانی کے انقال پر ان کے اعزاز میں سر نگوں کر دیا گیا ہے۔ ہندوستان میں برطانوی ہائی کمشنر ایلکس ایلز نے کہا ’’ملکہ معظمہ نے خدمت اور مستقل مزاجی کی زندگی بسر کی اور عزت و احترام اور پیار حاصل کیا۔ اس اداس دن مجھے یاد آ رہا کہ انہوں نے میرے ملک اور دنیا بھر کے بہت سے لوگوں کو کیا دیا۔‘‘

سونالی پھوگاٹ کی موت سے متعلق گوا کے کرلیز ریستراں کے خلاف گوا کوسٹل زون منیجمنٹ کی انہدامی کارروائی شروع کر دی گئی ہے۔ جس کے خلاف ریستراں کی طرف سے سپریم کورٹ سے رجوع کیا گیا۔ عدالت عظمیٰ نے اس معاملہ میں حکم امتناعی (اسٹے آرڈر) جاری کر دیا ہے۔

خیال رہے کہ گوا حکومت نے جمعہ کی صبح اصولوں کی خلاف ورزی کے الزام میں اس ریستراں کے خلاف انہدامی کارروائی شروع کر دی تھی۔ اس ریستراں کو کوسٹل ریگولیشن زون (سی آر زیڈ) کی خلاف ورزی کا مرتکب پایا گیا ہے۔

مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا وائرس کے 6093 نئے کیسز کی تصدیق کی گئی۔ ملک بھر میں اب کورونا کے 49636 کیسز فعال ہیں۔

ملکہ الزبتھ ثانی کے انتقال کے بعد برطانیہ میں آج سے سرکاری سوگ منایا جائے گا۔ ریاستی سوگ 10 سے 12 دن تک جاری رہے گا۔ کہا جا رہا ہے کہ جب تک ملکہ کی تدفین مکمل نہیں ہو جاتی، ریاست میں سوگ کا سلسلہ جاری رہے گا۔ دریں اثنا، بکنگھم محل کے باہر لوگوں کا ہجوم امنڈ پڑا ہے۔

ریاستی سوگ کے دوران تمام سرکاری عمارتوں پر پرچم سرنگوں کر دیا جائے گا اور آخری رسومات تک وہ اسی حالت میں رہے گا۔ دریں اثنا، سرکاری کاروبار معطل رہے گا اور انتہائی اہم چیزوں کے علاوہ وزرا کے دورے، انٹرویوز، پریس کانفرنس وغیرہ بھی بند رہیں گی۔