اہم خبریں: لوک سبھا میں ’پب جی گیم‘ پر پابندی لگانے کا مطالبہ

تصویر سوشل میڈیا
تصویر سوشل میڈیا

قومی آوازبیورو

3 Dec 2019, 5:49 PM

لوک سبھا میں پب جی گیم پر پابندی کا مطالبہ

نئی دہلی: لوک سبھا میں آن لائن گیم پب جی ، بلیو وہیل اور دیگر کمپیوٹر گیمز کو بچوں کے لئے خطرناک بتاتے ہوئے ان پر پابندی عائد کرنے کا مطالبہ کیا گیا۔ کانگریس کے وسنت کمار نے وقفہ صفر میں یہ معاملہ اٹھایا اور کہا کہ پب جي، بلیو وہیل اور دیگر کو آن لائن کمپیوٹر گیمز بچوں کے لئے مہلک ہیں تو ان پر پابندی عائد کیا جانا چاہئے۔ انہوں نے کہا کہ ان کی وجہ سے چھوٹے بچوں کا ذہن متاثر ہو رہا ہے اور وہ جارح بنتے جا رہے ہیں اور ان کی ذہنی سوچ میں بھی تبدیلی آ رہی ہے۔

انہوں نے موبائل اور کمپیوٹر پر ان کھیلوں کو 'تباہ کن' قرار دیتے ہوئے کہا کہ حکومت کو ان پر پابندی لگانے پر سنجیدگی سے غور کرنا چاہئے کیونکہ نوجوانوں پر ان کھیلوں سے منفی اثر پڑ رہا ہے۔

3 Dec 2019, 5:06 PM

راجیہ سبھا سے ایس پی جی ترمیمی بل پاس، کانگریس کا واک آؤٹ

ایس پی جی ترمیمی بل راجیہ سبھا سے بھی پاس ہو گیا ہے۔ کانگریس پارتی نے اس بل کی مخالفت کرتے ہوئے ایوان سے واک آؤٹ کیا۔ یہ بل لوک سبھا سے پہلے ہی پاس ہو چکا ہے۔ بل کے پاس ہونے کے بعد اب صرف وزیر اعظم اور ان کے گھر والوں کو ہی ایس پی جی سیکورٹی دی جائے گی۔

3 Dec 2019, 4:14 PM

بھیما کوریگاؤں تشدد معاملہ میں دلتوں پر درج مقدمات ہٹانے کا مطالبہ

نیشنلسٹ کانگریس پارٹی کے رکن قانون ساز کونسل پرکاش گجبھیے نے مہاراشٹر کے وزیر اعلیٰ ادھو ٹھاکرے کو ایک خط لکھا ہے۔ اس خط میں انھوں نے مطالبہ کیا ہے کہ بھیما کوریگاؤں تشدد معاملہ میں دلتوں کے خلاف جو بھی مقدمات درج کیے گئے ہیں، انھیں ختم کیا جائے۔

3 Dec 2019, 3:11 PM

جموں و کشمیر: پولس نے دکان نذر آتش کرنے کے الزام میں 4 لوگوں کو گرفتار کیا

منگل کے روز جموں و کشمیر پولس نے چار لوگوں کو گرفتار کیا۔ پولس کا الزام ہے کہ یہ چاروں بارہمولہ میں کچھ دکانوں کو نذر آتش کرنے کا منصوبہ بنا رہے تھے۔ ایس ایس پی عبدالقیوم کا کہنا ہے کہ ’’گرفتار ملزمین کی شناخت معروف، عادل، بلال اور سمیر کے طور پر ہوئی ہے۔ ان کے مالک اپنا ہول سیل دکان رکھتے ہیں اور دکانوں کو نذر آتش کر کے وہ ان کا کاروبار بڑھانا چاہتے تھے۔‘‘

3 Dec 2019, 1:59 PM

یو پی میں بدحال تعلیمی نظام کی بی جے پی رکن پارلیمنٹ ہیما مالنی نے ہی کھول دی قلعی

اتر پردیش کے متھرا سے بی جے پی رکن پارلیمنٹ ہیما مالنی نے لوک سبھا میں کہا کہ میرے انتخابی حلقہ میں کئی مقامات پر اسکول کھلے میں چل رہے ہیں۔ گاؤوں میں بچے معیاری تعلیم حاصل نہیں کر پا رہے ہیں۔ انھوں نے مزید کہا کہ ایسے میں پبلک پرائیویٹ پارٹنرشپ ماڈل کو اسکولی تعلیم میں نافذ کیا جانا چاہیے۔

3 Dec 2019, 1:11 PM

پیاز کی ’آرتی اُتار کر‘ بڑھتی قیمتوں کے خلاف انوکھا احتجاج

وارانسی: اترپردیش کے ضلع وارانسی میں پیاز کی آسمانی چھوتی قیمتوں کے خلاف منگل کو لوگوں نے یہاں کی سب سے بری منڈی وشیشر گنج میں کپور سے پیاز کی آرتی اتار کر انوکھا احتجاج کیا۔

سماجی تنظیم ’صبح بنارس کلب‘ کی جانب سے منعقد اس احتجاجی مظاہرے میں بڑی تعداد میں مقامی افراد نے شرکت کی۔ اجتماع سے خطاب کرتے ہوئے تنظیم کے صدر مکیش جیسوال نے کہا کہ یہاں پیاز کی قیمت آسان چھورہی ہے۔ 105 سے 110 روپئے فی کلو کی شرح سے پیاز فروخت ہورہا ہے۔ اس وجہ سے عام لوگوں کی تھالی سے یہ غائب ہوگیا ہے۔ پیاز نے لوگوں کی رسوئی کا بجٹ بگاڑ دیا ہے۔

انہوں نے مہنگائی کے لئے بچولیوں کی ذمہ دار ٹھہراتے ہوئے کہا کہ حکومت کو ایسے افراد کے خلاف سخت کاروائی کرنی چاہئے تاکہ پیاز کی قیمتوں میں گراوٹ آئے۔ انہوں نے ضلع انتظامیہ سے اسٹال لگا کر مناسب قیمت پر عام شہریوں کو پیاز دسیتاب کرانے کا مطالبہ کیا۔

3 Dec 2019, 12:09 PM

عصمت دری کرنے والوں کو ہمیشہ کے لیے جیل میں ڈال دیا جانا چاہیے: ہیما مالنی

متھرا سے بی جے پی رکن پارلیمنٹ ہیما مالنی نے حیدر آباد میں ویٹرنیرین ڈاکٹر کی عصمت دری اور قتل معاملہ کو لے کر آج اپنا رد عمل ظاہر کیا۔ انھوں نے میڈیا سے بات چیت کرتے ہوئے کہا کہ ’’خواتین کے ساتھ اس طرح کے ظلم کی خبریں اب ہمیں روزانہ سننے کو مل رہی ہیں۔ خواتین کا استحصال ہو رہا ہے۔ میرا مشورہ ہے کہ قصورواروں کو پکڑ کر ہمیشہ کے لیے جیل میں ڈال دیا جانا چاہیے۔ ایک بار جب وہ جیل چلے جائیں تو انھیں بالکل بھی آزاد نہیں کرنا چاہیے۔‘‘

3 Dec 2019, 11:07 AM

ہندوستانی معیشت کو بھگوان بچائے: پی چدمبرم

لوک سبھا میں بی جے پی اراکین پارلیمنٹ کی جانب سے جی ڈی پی کو لے کر جو باتیں کہی گئیں اسے لے کر کانگریس کے سینئر لیڈر اور سابق وزیر مالیات پی چدمبرم نے اپنا رد عمل ظاہر کیا ہے۔ انھوں نے ٹوئٹ کر کے کہا ہے کہ ’’جی ڈی پی نمبر بے معنی ہے، نجی ٹیکس میں کٹوتی کی جائے گی، درآمدگی ٹیکس بڑھے گا۔ یہ بی جے پی کے اصلاحات کے متعلق نظریات ہیں۔ بھگوان ہندوستان کی معیشت کو بچائے۔‘‘

3 Dec 2019, 9:57 AM

کرناٹک: 9 سالہ بچی کے ساتھ حیوانیت، عصمت دری کے بعد قتل

کرناٹک کے کلبرگی میں سولیپیتھ تھانہ علاقہ میں 9 سال کی بچی سے عصمت دری کے بعد اس کا قتل کر دیا گیا ہے۔ کلبرگی کے ایس پی نے اس بات کی جانکاری دی ہے۔ انھوں نے کہا کہ کیس درج کر کے معاملے کی جانچ کی جا رہی ہے۔

3 Dec 2019, 8:36 AM

چندریان-2 کے وکرم لینڈر کا ملبہ نظر آیا، ناسا کو ’کریش سائٹ‘ سے 750 میٹر دور ملا 3 ٹکڑا

چندریان-2 کے وکرم لینڈر کا ملبہ چاند پر گرا ہوا نظر آ گیا ہے۔ ناسا نے ٹوئٹ کر کے اس کی جانکاری دی ہے کہ اس کے لونر ریکنیسنس آربیر نے چاند کی سطح پر چندریان-2 کے وکرم لینڈر کو ڈھونڈ لیا ہے۔ ناسا کے مطابق چندریان-2 کے وکرم لینڈر کا ملبہ اس کے کریش سائٹ سے 750 میٹر دور ملا۔ ملبہ کے تین سب سے بڑے ٹکڑے 2x2 پکسل کے ہیں۔ ناسا نے رات تقریباً 1.30 بجے وکرم لینڈر کے امپیکٹ سائٹ کی تصویر جاری کی اور بتایا کہ اس کے آربیٹر کو وکرم لینڈر کے تین ٹکڑے ملے ہیں۔