اہم خبریں: عمان کے نئے سلطان بنے ہیثم بن طارق، حلف برداری مکمل

عمان کے سلطان قابوس بن سعید کے انتقال کے بعد ملک کے نئے سلطان کا اعلان ہو گیا ہے۔ ہیثم بن طارق بن تیمور السعید نے نئے سلطان کا عہدہ سنبھالا ہے اور اس کا حلف بھی انھوں نے لے لیا ہے۔ واضح رہے کہ قابوس بن سعید کا انتقال جمعہ کی شب ہوا تھا جس کے بعد ملک میں تین دنوں کے غم کا اعلان کیا گیا ہے۔ غم کے ان تین دنوں میں سرکاری اور پرائیویٹ دفاتر بند رہیں گے۔

جے این یو میں ہنگامہ آرائی جاری ہے اور فیس اضافہ کے ساتھ ساتھ کیمپس میں طلبا پر نقاب پوش غنڈوں کے ذریعہ کیے گئے حملے کو لے کر احتجاجی مظاہرے بھی جاری ہیں۔ اس درمیان جواہر لال نہرو یونیورسٹی انتظامیہ نے میڈیا کو بتایا ہے کہ یونیورسٹی میں تعلیمی سرگرمیاں 13 جنوری سے شروع ہو جائیں گی۔

جے این یو طلبا یونین نے آج شام 4.30 بجے سابرمتی لان میں پریس کانفرنس بلائی ہے۔ اس پریس کانفرنس میں جے این یو طلبا یونین کیمپس میں طلبا پر نقاب پوش غنڈوں کے ذریعہ ہوئے حملے سے جڑے ثبوت پیش کر سکتا ہے۔ قابل غور ہے کہ آج یونیورسٹی وائس چانسلر نے طلبا سے خصوصی ملاقات کی ہے۔ 4.30 بجے ہونے والی پریس کانفرنس اس لحاظ سے کافی اہمیت کی حامل سمجھی جا رہی ہے۔

گجرات کے وڈودرا واقع پادرا تعلقہ میں انڈسٹریل اور میڈیکل گیس بنانے والی کمپنی ایمس آکسیجن پرائیویٹ لمیٹڈ میں دھماکہ کی خبریں موصول ہو رہی ہیں۔ اس دھماکہ میں کم از کم پانچ افراد کے ہلاک ہو جانے کی اطلاع ہے۔ یہ بھی بتایا جا رہا ہے کہ اس واقعہ میں 12 سے زائد افراد زخمی بھی ہوئے ہیں جنھیں علاج کے لیے اسپتال میں داخل کرایا گیا ہے۔

ممبئی: بالی ووڈ کے دبنگ اسٹار سلمان خان نے اپنی نئی فلم ’کبھی عید، کبھی دیوالی‘ کا اعلان کیا ہے۔
سلمان جہاں اس سال عید پر اپنی فلم ’رادھے‘ لے کر آ رہے ہیں، وہیں انہوں نے اگلے سال کی فلم ’کبھی عید، کبھی دیوالی‘ کا اعلان بھی کر دیا ہے۔ سلمان نے ٹوئٹ کر کے بتایا ہے کہ ہر سال کی طرح اگلے سال کی عید بھی انہوں نے بک کروا لی ہے اور اس دن ریلیز ہوگی ان کی اگلی فلم ’کبھی عید، کبھی دیوالی‘۔
انہوں نے بتایا ہے کہ اس فلم کی ہدایت کاری فرہاد سامجی کریں گے جب کہ اس کی کہانی ساجد ناڈياڈوالا لکھیں گے جو اس فلم کو پروڈیوس بھی کریں گے۔

نربھیا اجتماعی عصمت دری کیس میں موت کی سزا پانے والے ونے شرما اور مکیش کی کیوریٹیو یعنی نظرثانی عرضی پر 14 جنوری کو سماعت ہوگی۔ اس عرضی پر سپریم کورٹ کی 5 رکنی بنچ سماعت کرے گی۔ پانچ ججوں میں جسٹس این وی رمنّا، جسٹس ارون مشرا، جسٹس آر ایف نریمن، جسٹس آر بھانومتی اور جسٹس اشوک بھوشن شامل ہیں۔

جے این یو میں طلبا پر ہوئے حملے کی دہلی پولس کی کرائم برانچ جانچ کر رہی ہے۔ خبر رساں ادارہ اے این آئی نے دہلی پولس کے ذرائع کے حوالے سے کہا ہے کہ ایس آئی ٹی نے 37 لوگوں کی پہچان کی ہے۔ یہ لوگ اسی وہاٹس ایپ گروپ سے جڑے ہیں جس پر حملے کی سازش تیار کی گئی تھی۔ گروپ میں 60 رکن تھے۔

ایران میں ہوئے یوکرین طیارہ حادثہ سے متعلق ایران نے ایک بڑا انکشاف کیا ہے۔ اس نے اس بات کا اعتراف کر لیا ہے کہ یہ طیارہ ایرانی میزائل کی وجہ سے ہی حادثہ کا شکار ہوا تھا۔ لیکن ساتھ ہی اس نے یہ بھی کہا کہ ایسا جان بوجھ کر نہیں کیا گیا بلکہ یہ انسانی غلطی تھی۔

قابل ذکر ہے کہ یوکرین طیارہ حادثہ میں اس پر سوار 176 مسافروں کے ہلاک ہونے کی خبریں سامنے آئی تھیں۔ امریکہ نے پہلے ہی یہ بات کہا تھا کہ یہ طیارہ ایرانی میزائل کی وجہ سے تباہ ہوا۔ بعد ازاں کناڈا کے وزیر اعظم جسٹن ٹروڈو نے بھی کیا تھا کہ ان کے پاس جو جانکاریاں موصول ہو رہی ہیں اس سے پتہ چلتا ہے کہ یوکرین کا طیارہ ایرانی میزائل کا شکار ہوا ہے۔

اتر پردیش کے قنوج ضلع میں جی ٹی روڈ پر ایک اندوہناک حادثہ پیش آیا جس میں تقریباً دو درجن لوگوں کی ہلاکت کی اطلاع موصول ہو رہی ہے۔ خبروں کے مطابق جمعہ کی رات جی ٹی روڈ پر ایک ٹرک اور بس کے درمیان زبردست ٹکر ہو گئی جس کی وجہ سے بس میں آگ لگ گئی۔ بس میں کم و بیش 50 مسافر سوار تھے۔ امکان ظاہر کیا جا رہا ہے کہ اس حادثہ میں 20 مسافر ہلاک ہو گئے ہیں جبکہ 21 زخمی مسافروں کا علاج قریبی اسپتال میں چل رہا ہے۔

اس حادثہ کی خبر کے بعد کانگریس رکن پارلیمنٹ راہل گاندھی نے ٹوئٹر پر افسوس کا اظہار کیا ہے۔ انھوں نے مہلوکین افراد کے اہل خانہ کے تئیں ہمدردی کا اظہار کیا ہے اور ساتھ ہی ساتھ زخمیوں کی جلد صحت یابی کے لیے دعا بھی کی ہے۔