اہم خبریں LIVE: اتر پردیش میں سڑک پر روز ایک شخص کی جان لیتا ہے سانڈ، اور وہ کہتے ہیں کہ نندی ہے... اکھلیش یادو

اتر پردیش کے سابق وزیر اعلیٰ اکھلیش یادو نے آج یوپی حکومت کو تنقید کا نشانہ بناتے ہوئے کہا کہ اتر پردیش میں ٹریفک پولیس میں نئی بھرتی ہوئی ہے، جو کہ ہر سڑک پر دکھائی دے رہے ہیں۔ یہ نئی بھرتی ہے جس کی وجہ سے ہر دن ایک شخص کی جان جا رہی ہے۔ اکھلیش نے مزید وضاحت کرتے ہوئے کہا کہ ایک بھی دن ایسا نہیں ہے جس دن اتر پردیش میں کسی کسان کی، کسی غریب کی جان سانڈ کی وجہ سے نہ جاتی ہو، اور یہ (بی جے پی والے) ہیں کہ اسے نندی کہتے ہیں۔ ہم کیسے مان لیں کہ یہ نندی ہے جو روزانہ ایک شخص کی جان لے گا۔

ہماچل پردیش کے وزیر اعلیٰ سکھوندر سنگھ سکھو نے اپنے ایک بیان میں کہا کہ راجستھان حکومت نے 15 کروڑ روپے اور چھتیس گڑھ حکومت نے 11 کروڑ روپے بطور چندہ دیے ہیں۔ ساتھ ہی انھوں نے کہا کہ بڑی بات یہ ہے کہ قدرتی آفت سے پریشان ہماچل پردیش کو ریاستوں کے ساتھ ساتھ ملک کے ذی ہوش افراد بھی چندہ دے رہے ہیں۔ مرکزی حکومت نے ٹیم بھیجی تھی اور اس ٹیم نے اپنی رپورٹ دے دی ہوگی۔ ہمیں امید ہے کہ عبوری راحت کی پہلی قسط جاری ہو جائے گی۔ اس آفت سے تقریباً 10 ہزار کروڑ روپے کا نقصان ہوا ہے جس کے ازالہ میں ایک سال کا وقت لگے گا۔

کانگریس لیڈر پون کھیڑا نے آج اپنے ایک بیان میں کہا کہ پورے ملک کو یہ جاننے کا حق ہے کہ پی ایم کیئر فنڈ میں پیسہ کہاں سے آ رہا ہے۔ پی ایس یو اور کمپنیوں سے سی ایس آر کے ذریعہ پیسہ لیا جا رہا ہے اور اسے آر ٹی آئی ایکٹ سے باہر رکھنا آپ کے (بی جے پی) ارادوں پر سوال اٹھاتا ہے۔

بہار کے ارریہ میں صحافی کے قتل معاملہ میں چار ملزمین کو پولیس نے 24 گھنٹے کے اندر گرفتار کر لیا ہے۔ جنتا دل یو لیڈر نیرج کمار نے کہا کہ 24 گھنٹے کے اندر پولیس نے ملزمین کو گرفتار کیا ہے۔ انھوں نے مزید کہا کہ مہلوک کے اہل خانہ کے ذریعہ مشتبہ افراد کے نام بتانے کے بعد جیل تک میں چھاپہ ماری کی گئی۔ ہم اپوزیشن سے یہ امید کرتے ہیں کہ مجرمانہ واقعہ کی تنقید کیجیے لیکن حکومت کے ذریعہ کی گئی کارروائی کے بارے میں بھی تذکرہ کیجیے۔

کرناٹک کے سنگولی راینا ریلوے اسٹیشن پر کھڑی اُدیان ایکسپریس میں اچانک آگ لگنے سے افرا تفری کا ماحول پیدا ہو گیا ہے۔ یہ حادثہ مسافروں کے ٹرین سے اترنے کے 2 گھنٹے پیش آیا۔ اچھی بات یہ ہے کہ اس آگ کی وجہ سے کوئی ہلاک یا زخمی نہیں ہوا ہے۔ آگ کی خبر ملنے کے فوراً بعد فائر بریگیڈ کا دستہ موقع پر پہنچا اور آگ بجھانے میں مصروف ہو گیا ہے۔

دہلی میں آج صبح بارش کے بعد لوگوں کو گرمی سے کچھ راحت ضرور ملی، لیکن کئی علاقوں میں آبی جماؤ کا منظر بھی دیکھنے کو مل رہا ہے۔ بدرپور علاقے میں بارش کی وجہ سے کئی جگہ سڑکوں پر پانی بھر گیا ہے۔ اس سے لوگوں کو آمد و رفت میں پریشانی کا سامنا کرنا پڑ رہا ہے۔

آسام میں بی جے پی کے سرکردہ لیڈر اور چار بار رکن پارلیمنٹ رہ چکے راجین گوہین نے حد بندی کو لے کر وزیر اعلیٰ ہیمنت بسوا سرما کے خلاف محاذ کھول دیا ہے۔ انھوں نے کابینہ سطح کے آسام فوڈ اینڈ سول سپلائی کارپوریشن لمیٹڈ کے چیئرمین عہدہ سے استعفیٰ دے دیا ہے۔