اہم خبریں: شاہین باغ مظاہرہ کے خلاف ’کالندی کنج مارکیٹ ویلفیئر‘ نے اٹھائی آواز

شاہین باغ میں گزشتہ 84 دنوں سے سی اے اے اور این آر سی کے خلاف مظاہرہ چل رہا ہے۔ اس مظاہرہ کی وجہ سے یہاں کی سبھی دکانیں بند ہیں۔ کالندی کنج مارکیٹ ویلفیئر ایسو سی ایشن نے ہفتہ کے روز اس سلسلے میں ساؤتھ-ایسٹ کے ڈی سی پی آر پی مینا سے ان کے دفتر میں ملاقات کی۔ ایسو سی ایشن کے لوگوں نے ملاقات کے دوران ڈی سی پی کے سامنے کہا کہ ان کی دکانوں کو جلد سے جلد کھلوایا جائے تاکہ وہ روزگار کر سکیں۔

دہلی پولس کمشنر ایس این شریواستو نے عہدہ کی ذمہ داری سنبھالنے کے بعد پہلا سخت قدم اٹھاتے ہوئے جامعہ نگر تھانہ کے ایس ایچ او اوپیندر سنگھ کو ہٹا دیا ہے۔ گزشتہ سال دسمبر میں جامعہ نگر تشدد کے بعد مقامی پولس کے خلاف لوگ کافی ناراضگی کا اظہار کر رہے تھے۔ جامعہ نگر تھانہ ایس ایچ او کو دہلی پولس ’سیکورٹی وِنگ‘ میں بھیجا گیا ہے۔ قابل ذکر ہے کہ دہلی پولس میں سیکورٹی وِنگ کی پوسٹنگ خشک پوسٹنگ تصور کی جاتی ہے۔

دہلی پولس ذرائع کا کہنا ہے کہ عآپ کے معطل کونسلر طاہر حسین کی لائسنسی پستول سمیت کئی کارتوس ضبط کر لیے گئے ہیں۔ پستول کو فورنسک جانچ کے لیے بھیج دیا گیا ہے تاکہ یہ پتہ لگایا جا سکے کہ اس پستول سے ماضی قریب میں فائرنگ ہوئی تھی یا نہیں۔ طاہر کا موبائل بھی ضبط کر لیا گیا ہے۔

مہاراشٹر کے وزیر اعلیٰ ادھو ٹھاکرے آج رام للا کا درشن کرنے کے لیے ایودھیا پہنچے۔ اس موقع پر انھوں نے میڈیا سے خطاب کرتے ہوئے کہا کہ ’’میں بی جے پی سے الگ ہوا ہوں، ہندوتوا سے نہیں۔ بی جے پی کا مطلب ہندوتوا نہیں ہے۔ ہندوتوا الگ ہے، بی جے پی الگ ہے۔‘‘ اس موقع پر ادھو ٹھاکرے نے یہ بھی کہا کہ وہ رام مندر تعمیر کے لیے ایک کروڑ روپے کا عطیہ کریں گے اور یہ مہاراشٹر حکومت کی جانب سے نہیں بلکہ ان کے ٹرسٹ کی جانب سے دیا جائے گا۔

12 مارچ کو احمد آباد سے کانگریس کے ذریعہ ’گاندھی سندیش یاترا‘ کا آغاز کیا جائے گا۔ اس دن پارٹی کا 90واں یوم تاسیس ہے۔ ’گاندھی سندیش یاترا‘ کے دوران پدیاترا میں کانگریس صدر سونیا گاندھی، پرینکا گاندھی، راہل گاندھی سمیت کانگریس حکمراں ریاستوں کے وزرائے اعلیٰ بھی شامل ہوں گے۔

یَس بینک کے سابق چیف ایگزیکٹیو افسر رانا کپور انفورسمنٹ ڈائریکٹوریٹ (ای ڈی) دفتر پہنچ گئے ہیں۔ ای ڈی دفتر میں افسران ان سے کچھ اہم معاملوں میں پوچھ تاچھ کریں گے۔

دہلی تشدد معاملہ میں دہلی پولس نے آج شاہنواز نامی ایک شخص کو گرفتار کیا۔ پولس کا کہنا ہے کہ اس پر دلبر نیگی کے قتل کا الزام ہے اور گرفتار کر کے اس سے ضروری پوچھ تاچھ کی جا رہی ہے۔ دراصل دلبر نیگی ایک ہوٹل میں ویٹر کا کام کرتا تھا اور 26 فروری کو انل سوئٹ ہاؤس برج پوری میں اس کی لاش ملی تھی۔ دہلی پولس کی کرائم برانچ اس کی جانچ کر رہی تھی اور ایسا الزام لگایا جا رہا ہے کہ اس قتل میں شاہنواز کا ہاتھ ہو سکتا ہے۔

مدھیہ پردیش میں اراضی تجاوزات کا نوٹس دیے جانے کے بعد بی جے پی رکن اسمبلی سنجے پاٹھک کے باندھو گڑھ واقع ریسورٹ کو آج انتظامیہ نے منہدم کر دیا۔ سنجے پاٹھک کا کہنا ہے کہ حکومت کا یہ قدم بدلے کے جذبہ سے متاثر ہے۔

شمال مشرقی دہلی میں ہوئے تشدد کے معاملے میں پولس نے گولی چلانے والے شخص شاہ رخ کی پستول برآمد کر لی ہے۔ شاہ رخ نے تشدد کے دوران موج پور میں گولی چلائی تھی۔ دہلی پولس کرائم برانچ نے آج اس کی پستول اس کے گھر سے برآمد کی۔ پولس نے پستول کے ساتھ 3 کارتوس بھی برآمد کیے ہیں۔

بی جے پی لیڈر اور فلم اداکارہ جیہ پردا پر قانونی شکنجہ کستا ہوا نظر آ رہا ہے۔ 2019 میں انتخابی ضابطہ اخلاق کی خلاف ورزی کے ایک معاملے میں عدالت نے ان کے خلاف غیر ضمانتی وارنٹ جاری کر دیا ہے۔ اس معاملے کی آئندہ سماعت 20 اپریل کو ہوگی۔