اہم خبریں: فسادیوں نے ہندوستان کا ’مستقبل‘ تباہ کر دیا، راہل گاندھی

تصویر سوشل میڈیا
تصویر سوشل میڈیا
user

قومی آوازبیورو

4 Mar 2020, 6:11 PM

تشدد انصاف کا دشمن ہے، راہل گاندھی

دہلی کے تشدد زدہ علاقوں کا دورہ کرنے پہنچے راہل گاندھی نے کہا کہ تشدد ترقی کا دشمن ہے۔ برج پوری کے ایک اسکول کا دورہ کرنے کے بعد راہل گاندھی نے کہا کہ یہ اسکول دہلی کا مستقبل ہے، نفرت اور تشدد نے اسے تباہ کردیا ہے۔ ’بھارت ماتا‘ کو اس تشدد سے کوئی فائدہ نہیں ہوتا۔ سب کو مل کر کام کرنا ہوگا اور ہندوستان کو آگے لے جانا ہوگا۔

4 Mar 2020, 7:15 PM

حسین دلوائی کا فساد زدہ علاقوں کا دورہ، ایک ہزار کروڑ معاوضہ کا مطالبہ

کانگریس رکن پارلیمنٹ حسین دلوائی نے آج یہاں ملک کی راجدھانی دہلی میں ہوئے فرقہ وارانہ فسادات کے متاثرہ علاقوں کا دورہ کیا اور مرکز کی نریندر مودی حکومت سے مطالبہ کیا کہ متاثرین کی بازآبادکاری کیلئےفوری طور پر ایک ہزار کروڑ روپیہ کا معاوضہ ادا کرے۔
ممبئی میں ان کے دفتر سے جاری ایک بیان کے مطابق حسین دلوائی نے دہلی کے جی ٹی بی اسپتال جا کر زخمیوں کی عیادت کی اور ان کے رونگٹے کھڑے کر دینے والے باتیں سن کر وہ خود اشک بار ہو گئے۔

بیان کے مطابق حسین دلوائی نے وزیر اعظم نریندر مودی کو ایک خط لکھ کر مطالبہ کیا ہے کہ فوری طور پر ایک ہزار کروڑ روپیہ کا معاوضہ دینے کے ساتھ ساتھ جن متاثرین کی دوکان اور مکان جلے ہیں انہیں فوری طور پر بلا سودی قرض دیا جائے ۔ انہوں نے مزید مطالبہ کیا ہے کہ بے گناہوں کو رہا کیا جائے اور اصل ملزمین کو جلدازجلد گرفتار کیا جائے ۔

4 Mar 2020, 4:58 PM

دہلی کے تشدد متاثرہ علاقوں کا دورہ کرنے نکلے راہل گاندھی

کانگریس لیڈر راہل گاندھی شمال مشرقی دہلی کے تشدد متاثرہ علاقوں کا دورہ کرنے کے لیے نکلے گئے ہیں۔ ان کے ساتھ کانگریس لیڈروں کا ایک وفد بھی بس سے روانہ ہوا ہے۔ میڈیا ذرائع کے مطابق راہل گاندھی اور وفد میں شامل لیڈران وہاں پہنچ کر تشدد کا شکار لوگوں سے بات چیت کریں گے۔

4 Mar 2020, 4:11 PM

اب کوئی بھی این آر آئی خرید سکے گا ائیر انڈیا میں 100 فیصد شراکت داری: پرکاش جاوڈیکر

مرکزی وزیر پرکاش جاوڈیکر نے کہا ہے کہ اب این آر آئی ائیر انڈیا میں 100 فیصد شراکت داری خرید سکے گا۔ انھوں نے کہا کہ ’’10 بینکوں کا جو 4 بینکوں میں انضمام ہوا تھا، اس پر آج میٹنگ میں فیصلہ لیا گیا کہ اس کو یکم اپریل سے عمل میں لانے کے لیے بہت اہم فیصلے ہوئے ہیں۔ ان بینکوں میں گزشتہ سالوں میں 40 ہزار کروڑ روپے حکومت نے ری-کیپٹلائز کیا ہے۔‘‘

4 Mar 2020, 3:10 PM

شمال مشرقی دہلی میں تشدد متاثرہ علاقوں کا آج دورہ کریں گے راہل گاندھی

کانگریس لیڈر راہل گاندھی شمال مشرقی دہلی کے ان علاقوں کا آج دورہ کریں گے جہاں گزشتہ دنوں تشدد کے واقعات سامنے آئے تھے۔ کانگریس رکن پارلیمنٹ ادھیر رنجن چودھری نے اس سلسلے میں جانکاری دیتے ہوئے میڈیا کو بتایا کہ راہل گاندھی اپنے دورہ کے دوران تشدد متاثرہ علاقوں میں ان لوگوں سے ملاقات کریں گے جو تشدد کی وجہ سے بری طرح متاثر ہوئے ہیں۔

4 Mar 2020, 2:06 PM

نربھیا معاملہ: پون کی رحم کی عرضی بھی صدر جمہوریہ نے کی خارج

نربھیا کیس میں قصوروار پون گپتا کی رحیم کی عرضی خارج ہو گئی ہے۔ صدر جمہوریہ رام ناتھ کووند نے پون کے ساتھ کسی طرح کے رحم سے انکار کرتے ہوئے اس کی عرضی کو خارج کر دیا۔ امکان ظاہر کیا جا رہا ہے کہ جلد ہی پٹیالہ ہاؤس کورٹ پھانسی کے لیے ڈیتھ وارنٹ جاری کرتے ہوئے نئی تاریخ کا اعلان کرے گا۔

4 Mar 2020, 12:59 PM

طاہر حسین کی پیشگی ضمانت پر سماعت جمعرات 2 بجے تک ملتوی

دہلی تشدد کے الزام کا سامنا کر رہے کونسلر طاہر حسین کی پیشگی ضمانت عرضی پر بدھ کے روز کڑکڑڈوما کورٹ میں سماعت ہوئی۔ عدالت نے طاہر کی عرضی پر سماعت جمعرات دوپہر 2 بجے تک کے لیے ملتوی کر دی ہے۔ ساتھ ہی عدالت نے دہلی تشدد معاملہ کی جانچ کے لیے تشکیل ایس آئی ٹی سے طاہر کی عرضی پر جواب بھی طلب کیا ہے۔

اس سے قبل کڑکڑڈوما عدالت میں طاہر حسین کے خلاف نعرہ بازی ہوئی۔ ساتھ ہی طاہر حسین کے وکیل نے پولس پر منمانے طریقے سے معاملے کی جانچ کرنے کا الزام عائد کیا ہے۔ سماعت کے دوراب فریق دفاع کے وکیل نے الزام عائد کیا کہ دہلی پولس ان کے موکل کا بیان درج نہین کر رہی ہے۔

4 Mar 2020, 12:10 PM

ہولی ملن تقریب میں شامل نہیں ہوں گے پی ایم مودی، کورونا وائرس کا اثر

ہندوستان میں کورونا وائرس کے بڑھتے معاملے کو دیکھتے ہوئے وزیر اعظم نریندر مودی نے کہا ہے کہ وہ اس سال کسی بھی ہولی ملن تقریب میں شامل نہیں ہوں گے۔ پی ایم مودی نے ٹوئٹ کر کے اس بات کی جانکاری دی ہے۔ پی ایم مودی نے کہا ہے کہ ماہرین نے لوگوں کو ایک جگہ زیادہ تعداد میں جمع ہونے سے بچنے کی صلاح دی ہے، اس لیے وہ کسی بھی ہولن ملن تقریب میں شامل نہیں ہوں گے۔

4 Mar 2020, 11:07 AM

اٹلی سے دہلی آئے 15 سیاحوں میں کورونا وائرس کی تصدیق

اٹلی سے دہلی آئے 15 سیاحوں میں کورونا وائرس کی تصدیق ہونے کے بعد ہنگامہ برپا ہو گیا ہے۔ دہلی واقع ایمس نے ان سیاحوں میں کورونا وائرس کی تصدیق کی ہے۔ ان سیاحوں کو ہندوستان آنے کے بعد سے ہی الگ رکھا گیا تھا۔ سیاحوں کے خون کا نمونہ جانچ کے لیے بھیجا گیا تھا جس کی رپورٹ آ چکی ہے اور اب سبھی 15 سیاحوں کو چھاؤلہ کے آئی ٹی بی پی کیمپ میں رکھا گیا ہے۔ خبروں کے مطابق ان سیاحوں کو منگل کی دوپہر سے آئسولیشن میں رکھا گیا ہے۔

4 Mar 2020, 10:11 AM

اتر پردیش: میرٹھ میں سوائن فلو کے 81 معاملے آئے سامنے

میرٹھ کے چیف میڈیکل افسر نے اپنے ایک بیان میں کہا ہے کہ ’’میرٹھ میں سوائن فلو کے 81 معاملے سامنے آئے ہیں، اس میں پی اے سی کے جو جوان بھرتی تھے ان میں سے 11 کو ڈسچارج کر دیا گیا ہے جب کہ 9 اب بھی علاج کرا رہے ہیں۔ میرٹھ میڈیکل کالج میں کل 387 جانچ ہوئی ہیں، جن میں سے 97 معاملے پازیٹو آئے، ان میں سے 81 میرٹھ کے ہیں باقی آس پاس کے اضلاع کے ہیں۔‘‘

4 Mar 2020, 9:29 AM

مدھیہ پردیش: بی جے پی پر کئی کانگریس اراکین اسمبلی کو یرغمال بنانے کا الزام

مدھیہ پردیش میں بی جے پی پر جمہوریت کے قتل کی سازش کرنے کا الزام عائد کیا جا رہا ہے۔ کانگریس کا کہنا ہے کہ بی جے پی نے تقریباً 8 اراکین اسمبلی کو یرغمال بنا لیا ہے۔ ان اراکین اسمبلی میں 4 کانگریس کے ہیں اور ایک آزاد ہے، جب کہ دیگر اراکین اسمبلی سماجوادی پارٹی اور بہوجن سماج پارٹی سے ہیں۔ کانگریس لیڈر دگ وجے سنگھ کا اس سلسلے میں کہنا ہے کہ ’’تقریباً 11 لوگوں کو بی جے پی نے یرغمال بنا کر ایک ہوٹل میں رکھا تھا جن میں سے کچھ واپس آ گئے ہیں۔ باقی اراکین اسمبلی بھی جلد واپس آ جائیں گے۔‘‘

4 Mar 2020, 8:40 AM

کورونا وائرس کے خوف سے لوگ ہولی پر نہیں خرید رہے چین کا سامان

اتر پردیش کے غازی آباد میں کورونا وائرس کا خوف اس قدر لوگوں پر طاری ہے کہ وہ ہولی کا کوئی بھی ایسا سامان نہیں خرید رہے ہیں جو چین میں تیار ہوا ہو۔ چین کے سامانوں سے لوگوں نے ایسی دوری بنائی ہے کہ بازار سے چینی مصنوعات غائب نظر آ رہی ہیں۔ خریدار لوکل پروڈکٹس ہی خریدنا پسند کر رہے ہیں۔

next