اہم خبریں: یوپی قانون ساز کونسل کی چھ سیٹوں کے لئے کانگریس کے امیدواروں کا اعلان

نئی دہلی: کانگریس نے اتر پردیش قانو ن ساز کو نسل کے انتخابات کے لئے چھ امیدواروں کا اعلان کیا ہے ۔ کانگریس الیکشن کمیٹی کے سربراہ مکل واسنک نے جمعہ کے روز یہاں یہ اطلاع دیتے ہوئے بتایا کہ مسٹر راجیش دویدی کو آگرہ گریجویٹ سیٹ سے، جتیندر کمار گوڑ کو میرٹھ سے اور ڈاکٹر مہدی حسن کو بریلی مرادباد ٹیچر سے امیدوار بنایا گیا ہے ۔ انہوں نے بتایا کہ الہ آباد گریجویٹ سیٹ سے اجے کمار سنگھ، لکھنؤ گریجویٹ سیٹ سے برجیش کمار سنگھ اور گورکھپور-فیض آباد ٹیچر سیٹ سے ناگیندر دت ترپاٹھی کو امیدوار بنایا گیا ہے ۔

مظاہرین کا کہنا ہے کہ اگر کوئی ایمبولینس آتی ہے تو اس کو نکالنے کا راستہ دیا جاتا ہے۔ انہوں نے کہا کہ یہاں گولی چلائی گئی، تو دہلی پولیس کیسے ایسے ماحول میں ہمیں تحفظ فراہم کرسکے گی۔ مظاہرین نے کہا کہ آسام میں این آر سی نافذ ہوا تو جن کے پاس کاغذات نہیں تھے ان کی زمین ہاتھ سے چلی گئی۔

مذاکرات کاروں نے شاہین باغ کی خاتون مظاہرین سے مطالبہ کیا ہے کہ وہ ایک طرف کا راستہ چھوڑ دیں۔ اس پر مظاہرین نے کہا کہ ان کی حفاظت کو یقینی بنایا جائے۔ موقع پر موجود ایس ایچ او نے حفاظت کی یقین دہانی کرائی لیکن مظاہرین نے کہا کہ دہلی پولیس پر انہیں بھروسہ نہیں ہے اور تحریری طور پر یقین دہائی کرائی جائے۔

سپریم کورٹ کی طرف سے مقرر کئے گئے مذاکرات کار سنجے ہیگڑے اور سادھنا رام چندر آج لگاتار تیسرے دن شاہین باغ مظاہرے میں پہنچ گئے ہیں۔ تازہ اطلاعات کے مطابق احتجاج کے مقام سے تمام مردوں کو جانے کے لئے کہا گیا ہے۔ سنجے ہیگڑے اور سادھنا رام چندرن خاتون مظاہرین سے بات کر رہے ہیں۔

سڈنی میں ہندوستانی کرکٹ ٹیم نے بین الاقوامی ٹی-20 عالمی کپ کرکٹ کے اپنے پہلے مقابلے میں آسٹریلیا کو 17 رنوں سے شکست دے دی۔ ہندوستان نے آسٹریلیائی ٹیم کے سامنے 133 رنوں کا ہدف دیا تھا لیکن پوری ٹیم 115 رن پر آؤٹ ہو گئی۔

مہاراشٹر کے وزیر اعلیٰ ادھو ٹھاکرے کی دہلی آمد ہوئی ہے۔ وہ پی ایم نریندر مودی اور کانگریس صدر سونیا گاندھی سے ملاقات کرنے کے ارادہ سے دہلی آئے ہیں۔

کانگریس کے سینئر لیڈر آنند شرما میڈیا سے خطاب کے دوران دہلی میں کہا کہ ’’احمد آباد میں ٹرمپ کے استقبال کے لیے غریبوں کی بے عزتی کی جا رہی ہے۔ دیوار بنا کر غریبی کو چھپانے کی کوشش کی گئی، یہ عمل بی جے پی حکومت کی ذہنیت ظاہر کر رہا ہے۔ لیکن جب ملک باپو کی 150ویں جینتی منا رہا ہے اور باپو تو سادگی کی علامت تھے اور غریبوں کو ’نارائن مانتے‘ رہے ہیں، ایسی صورت میں بی جے پی نے جو کچھ کیا وہ باپو کے لیے عزت کی بات نہیں ہوگی۔‘‘

بھیم آرمی چیف چندرشیکھر نے کہا کہ میں کل 2 بجے ریشم باغ ناگپور آ رہا ہوں۔ فرضی قوم پرستوں کی تنظیم آر ایس ایس جس نے آج تک ترنگے کو عزت نہین دی، کل ہم ان کے ہیڈ کوارٹر کے سامنے ترنگا لہرائیں گے۔ میں چاہوں گا کہ کل سبھی ساتھی ریشم باغ ترنگا لے کر پہنچے اور بتا دیں کہ ان کے زعفرانی پرچم پر ہمارا ترنگا بھاری ہے۔

مہاراشٹر کے سولاپور ضلع کے ویراگ علاقہ میں آج بس اور جیپ کے درمیان زبردست ٹکر ہو گئی۔ اس واقعہ میں 4 لوگوں کی ہلاکت کی خبریں موصول ہو رہی ہیں۔ میڈیا ذرائع سے موصول ہو رہی خبروں کے مطابق حادثہ میں کم از کم 10 لوگ زخمی بھی ہوئے ہیں۔

بائیں ہاتھ کے ہندوستانی اسپن گیندباز پرگیان اوجھا نے کرکٹ کے سبھی فارمیٹ کو الوداع کہہ دیا ہے۔ جمعہ کو سوشل میڈیا میں فینس کے نام شیئر ایک جذباتی پیغام میں انھوں نے بین الاقوامی اور گھریلو کرکٹ سے فوری طور پر ریٹائرمنٹ لینے کا اعلان کیا۔ انھوں نے کہا کہ اب زندگی کے اگلے مرحلے کی طرف بڑھنے کا وقت ہے۔ ساتھ ہی حیدر آباد کے لیے کھیل چکے اوجھا نے اپنے کیریر کے دوران مدد کے لیے اپنے شیدایئوں سے لے کر حیدر آباد کرکٹ ایسو سی ایشن اور سوروبھ گنگولی سے لے کر وی وی ایس لکشمن تک کئی کھلاڑیوں کا شکریہ ادا کیا۔

شاہین باغ مظاہرہ کے پیش نظر نوئیڈا پولس نے نوئیڈا کے مہامایا فلائی اوور سے کالندی کنج کا راستہ جو بند کیا تھا، اسے آج کھول دیا گیا۔ شاہین باغ مظاہرہ شروع ہونے کے بعد گزشتہ دو مہینے سے یہ راستہ بند تھا اور لوگ نوئیڈا پولس پر انگلی بھی اٹھا رہے تھے کہ مظاہرہ سے اتنی دور یہ راستہ کیوں بند کیا گیا ہے۔

امریکی صدر ڈونالڈ ٹرمپ کا دو دنوں بعد ہندوستان دورہ شروع ہونے والا ہے اور احمد آباد میں ان کے استقبال کی تیاریاں زور و شور سے ہیں۔ اس درمیان امریکی صدر نے کولوراڈو کی ایک ریلی میں کہہ دیا کہ احمد آباد میں ان کا استقبال کرنے کے لیے ایک کروڑ لوگ موجود ہوں گے۔ ٹرمپ کے اس بیان پر لوگ کافی مذاق بنا رہے ہیں۔ آر جے ڈی لیڈر منوج جھا نے بھی اس سلسلے میں ایک طنزیہ ٹوئٹ کیا ہے جس میں انھوں نے لکھا ہے کہ ’’کیا بھائی صاحب! بچے کی جان لو گے کیا؟ 7 ملین ہی نہیں بن پا رہا تھا اور اب آپ افسانہ کو 10 ملین پر لے گئے۔‘‘ دراصل ٹرمپ نے کچھ دنوں پہلے ایک بیان دیا تھا جس میں انھوں نے کہا تھا کہ ہندوستانی پی ایم مودی نے ان سے کہا ہے کہ احمد آباد میں 70 لاکھ لوگ ان کا استقبال کریں گے۔ حالانکہ بعد میں سرکاری ذرائع نے کہا تھا کہ استقبال کرنے والوں کی تعداد 1 لاکھ تک ہو سکتی ہے۔

اے آئی ایم آئی ایم سربراہ اسدالدین اویسی نے گزشتہ دنوں سی اے اے مخالف ایک ریلی نکالی جو تنازعہ کا شکار ہو گیا۔ اس ریلی میں امولیہ لیونا نامی ایک لڑکی نے مائک پر جا کر ’پاکستان زندہ باد‘ کا نعرہ لگا دیا جس کے بعد ریلی میں کافی ہنگامہ دیکھنے کو ملا۔ نعرہ لگانے والی امولیہ لیونا کو 14 دنوں کی عدالتی حراست میں بھیج دیا گیا ہے۔

دہلی کے شاہین باغ میں خواتین کا دھرنا و مظاہرہ جاری ہے۔ شہریت ترمیمی قانون، این آر سی و این پی آر کے خلاف دو مہینے سے زیادہ عرصہ سے جاری اس دھرنا و مظاہرہ کو ختم کرنے کی لگاتار کوششیں ہو رہی ہیں، لیکن دہلی پولس و مرکزی حکومت اس میں اب تک ناکام ثابت ہوئی ہے۔ سپریم کورٹ کے ذریعہ مقرر کردہ مذاکرہ کار وکیل سنجے ہیگڑے اور سادھنا رام چندرن 19 فروری سے شاہین باغ جا کر مظاہرین سے لگاتار بات کر رہی ہیں، لیکن فی الحال کوئی حل نہیں نکل سکا ہے۔ آج ایک بار پھر دونوں شاہین باغ جائیں گے اور تیسرے راؤنڈ کی بات چیت ہوگی۔