اہم خبریں: افغانستان کے لیے 64 ملین ڈالر کی مالی امداد کا امریکہ نے کیا اعلان

افغانستان میں طالبان کے قبضے اور عبوری حکومت کی تشکیل کے بعد امریکہ نے پیر کے روز ایک اہم اعلان کیا۔ امریکہ نے افغانستان کے لوگوں کے لیے مالی امداد کا اعلان کیا ہے۔ ’آج تک‘ کی خبر کے مطابق امریکہ افغانستانی عوام کے لیے تقریباً 64 ملین ڈالر کی مدد کرنے جا رہا ہے۔

اتراکھنڈ میں کورونا کیسز پر کنٹرول کے لیے ریاستی حکومت نے 14 ستمبر کی صبح 6 بجے سے 21 ستمبر کی صبح 6 بجے تک کورونا کرفیو نافذ کرنے کا اعلان کیا ہے۔

کیرالہ میں کورونا نے اپنی تباہی کچھ زیادہ ہی پھیلائی ہوئی ہے، لیکن اچھی بات یہ ہے کہ گزشتہ 24 گھنٹوں میں 15058 نئے کیسز درج کیے گئے ہیں، اور 28439 لوگ اس مرض سے صحت یاب بھی ہوئے ہیں۔ کئی دنوں تک 30 ہزار اور پھر 20 ہزار سے زائد نئے کیسز روزانہ درج کیے جانے سے ریاستی حکومت کی فکر میں بہت زیادہ اضافہ ہو گیا تھا، لیکن آج تقریباً 15 ہزار نئے کیسز سامنے آئے اور 99 لوگوں کی اس مرض سے موت ہوئی۔

نئی دہلی: وزیر اعظم نریندر مودی نے پیر کے روز گجرات کے سبکدوش ہونے والے وزیر اعلیٰ وجے روپانی کی تعریف کرتے ہوئے کہا کہ انہوں نے سماج کے تمام طبقات کے لیے کام کیا۔ وزیر اعظم نے پیر کے روز ٹوئٹ کیا کہ "وزیر اعلیٰ کے طور پر اپنی پانچ مدت کار کے دوران، وجے روپانی نے لوگوں کی فلاح و بہبود کے لیے بہت سے کام کیے ہیں۔ انہوں نے معاشرے کے تمام طبقات کے لیے انتھک محنت کی۔ میں یقین سے کہہ سکتا ہوں کہ وہ مستقبل میں بھی عوام کی خدمت جاری رکھیں گے۔ قابل ذکر ہے کہ وجے روپانی نے اتوار کے روز گجرات کے وزیر اعلی کے عہدے سے استعفیٰ دے دیا تھا۔ ان کی جگہ بھوپندر پٹیل کو ریاست کی باگ ڈور سونپی گئی ہے۔

نئی دہلی. کانگریس کے سینئر تجربہ کار رہنما آسکر فرنانڈیز کا پیر کو کرناٹک میں 80 سال کی عمر میں انتقال ہوگیا۔ اس سال جولائی میں ف آسکر فرنانڈیز کو سر میں چوٹ لگنے کے بعد اسپتال میں داخل کرایا گیا تھا۔ سرجری کے بعد وہ منگلورو کے ینی پویا اسپتال میں زیر علاج تھے۔

نئی دہلی: دلی پولیس نے پیرول توڑکر تقریباً ساتھ ماہ سے فرار ایک قاتل کو اترپردیش سے گرفتار کیا ہے۔ پولیس کے ذرائع نے پیر کو بتایا کہ راج کمار (39) کو اترپردیش میں بستی ضلع کے چاہنی گاؤں سے اس کے گھر سے گرفتار کیا گیا۔ اسسٹنٹ پولیس کمشنر راجیش تیاگی کی قیادت میں شمالی دلی کے روہلہ تھانہ کے سربراہ شیو پال اور ہیڈ کانسٹبل کرشنا نندن کی ٹیم نے ایک اطلاع کی بنیاد پر چھاپہ مارکر اسے گرفتار کیا۔ راج کمار کو سرائے روہلہ تھانہ علاقے میں ایک شخص کے قتل کے معاملے میں عدالت نے عمر قید کی سزا سنائی تھی۔ وہ جیل میں سزا کاٹ رہا تھا۔ اس دوران عدالت نے اسے ہنگامی صورتحال کے تحت 8 ہفتے کی پیرول پر رہا کرنے کا حکم دیا تھا۔ عدالت کے حکم پر ضلع انتظامیہ نے اسے رہا کردیا تھا۔ حکم کے مطابق قیدی کو 20 فروری 2021 سے قبل جیل انتظامیہ کے سامنے پیش ہونا تھا، لیکن وہ واپس نہیں آیا۔ اس کے بعد پولیس نے اس کی تلاش شروع کر دی تھی۔

نئی دہلی: دہلی کے ملکہ گنج علاقے میں پیر کے روز ایک منزلہ عمارت منہدم ہوگئی جس میں دو بچوں کے دبے ہونے کا خدشہ ہے۔ فائربریگیڈ کے ایک افسر نے یواین آئی کو بتایا کہ تقریباً 11 بجکر50 منٹ پر فائر بریگیڈ کو عمارت منہدم ہونے کی اطلاع ملی تھی۔ انہوں نے بتایا کہ دو بچوں کے ملبے تلے دبے ہونے کا خدشہ ہے۔ انہوں نے بتایا کہ فائربریگیڈ کی پانچ گاڑیاں راحت وبچاؤ کے کاموں میں مصروف ہیں۔ انہوں نے کہا کہ عمارت میں گراؤنڈ اور پہلی منزل بنی ہے اور پہلی منزل کی چھت پر ایک چھوٹا سا کمرہ ہے۔

تہران: ترکمانستان سے متصل ایران کی شمال مغربی سرحد کے نزدیک پیر کے روز زلزلے کے شدید جھٹکے محسوس کیے گئے۔ ریکٹر سکیل پر زلزلے کی شدت 5.1 ریکارڈ کی گئی۔ امریکی جیولوجیکل سروے نے آج یہ اطلاع دی۔ ایران کے شہر کوچان کے شمال مشرق سے 38 کلومیٹر دور زلزلے کے جھٹکے محسوس کیے گئے۔ زلزلے کا مرکز زمین کی سطح سے 10 کلومیٹر کی گہرائی میں واقع تھا۔ ابھی تک زلزلے سے کسی جانی ومالی نقصانات کی کوئی اطلاع موصول نہیں ہوئی ہے۔