ہم باریکی سے دیکھیں گے کہ معاشی پیکیج میں کسے کیا ملا... چدمبرم

پی ایم مودی کے ذریعہ 20 لاکھ کروڑ کے معاشی پیکیج کے اعلان کے بعد کانگریس کے سینئر رہنما اور ماہر معیشت پی چدمبرم نے کہا ہے کہ ہم دھیان سے اس بات کو دیکھیں گے کہ دیے گئے معاشی پیکیج میں کسے کیا کچھ دیا جاتا ہے۔ ہم دیکھیں گے کہ اس معاشی پیکیج میں غریبوں، بھوکوں اور پریشان حال مہاجر مزدوروں کے لیے کیا ہے جو پی ایم مودی سے امیدیں لگائے بیٹھے ہیں۔

لاک ڈاؤن کی وجہ سے اب بھی مجبور مہاجر مزدوروں کا پیدل اپنی ریاست کی طرف پیدل سفر جاری ہے۔ اس درمیان مہاراشٹر کے ناسک سے مدھیہ پردیش کے ستنا لوٹ رہی خاتون مزدور نے راستے میں بچے کو جنم دیا۔ خاتون مزدور کے شوہر نے اس سلسلے میں میڈیا کو بتایا کہ ”بچے کی پیدائش کے بعد ہم لوگ ایک جگہ پر 2 گھنٹے کے لیے رکے اور پھر اس کے بعد تقریباً 150 کلو میٹر کا پیدل سفر کیا۔“ گویا کہ خاتون مہاجر مزدور نے بچے کی پیدائش کے 2 گھنٹے بعد ہی دوبارہ پیدل سفر شروع کر دیا۔