کرناٹک انتخابی نتائج LIVE: ’کانگریس لگن کے ساتھ عوام کو دی گئی گارنٹیوں کو نافذ کرنے کے لیے کام کرے گی‘، پرینکا گاندھی

کرناٹک میں کانگریس کی جیت پر پارٹی جنرل سکریٹری پرینکا گاندھی نے بھی خوشی کا اظہار کیا ہے اور عوام کو مبارکباد دی ہے۔ انھوں نے اپنے ایک ٹوئٹ میں لکھا ہے کہ ’’کانگریس پارٹی کو تاریخی مینڈیٹ دینے کے لیے کرناٹک کی عوام کا تہہ دل سے شکریہ۔ یہ آپ کے ایشوز کی جیت ہے۔ یہ کرناٹک کی ترقی کے نظریات کو ترجیح دینے والی جیت ہے۔ یہ ملک کو جوڑنے والی سیاست کی جیت ہے۔‘‘ اس ٹوئٹ میں وہ مزید لکھتی ہیں کہ ’’کرناٹک کانگریس کے تمام محنتی کارکنان و لیڈران کو میری نیک خواہشات۔ آپ سب کی محنت رنگ لائی۔ کانگریس پارٹی پوری لگن کے ساتھ کرناٹک کی عوام کو دی گئی گارنٹیوں کو نافذ کرنے کا کام کرے گی۔‘‘

کرناٹک اسمبلی انتخابات میں جیت کے بعد راہل گاندھی نے کہا کہ کرناٹک کے عوام کانگریس کے لیڈران اور پارٹی کارکنان کو شکریہ اور مبارک باد پیش کی۔ انہوں نے کہا کہ کرناٹک کے انتخابات میں ایک طرف سرمایہ داروں کی طاقت تھی اور دوسری طرف غریبوں کی طاقت تھی اور غریبوں نے سرمایہ داروں کو ہرا دیا۔ انہوں نے یہ کہ ایسا ہر ریاست میں ہوگا۔ راہل گاندھی نے کہا کہ کرناٹک کے لوگوں نے ظاہر کر دیا ہے کہ اس ملک کو محبت اچھی لگتی ہے۔

کرناٹک میں ووٹوں کی گنتی جاری ہے۔ کانگریس بڑی جیت کی طرف بڑھ رہی ہے۔ پارٹی نے تین سیٹیں جیتی ہیں اور 129 سیٹوں پر آگے ہے۔ دوسری طرف بی جے پی کو بڑا جھٹکا لگا ہے۔ بی جے پی صرف 64 سیٹوں پر آگے ہے۔

کرناٹک میں بی جے پی نے اپنی شکست تسلیم کر لی ہے۔ کرناٹک کے وزیر اعلیٰ بومئی نے کہا کہ وزیر اعظم اور بی جے پی کارکنوں کی بہت کوششوں کے باوجود ہم جیت نہیں سکے۔ مکمل نتائج آنے کے بعد ہم تفصیلی تجزیہ کریں گے۔ ہم اس نتیجہ کو لوک سبھا انتخابات میں واپس آنے کی کوشش کے طور پر لے رہے ہیں۔

الیکشن کمیشن نے تمام 224 اسمبلی حلقوں کے رجحانات کا اعلان کر دیا ہے۔ کانگریس 121 سیٹوں پر، بی جے پی 72 سیٹوں پر اور جے ڈی ایس 25 سیٹوں پر آگے ہے۔ جبکہ 6 سیٹوں پر دیگر امیدوار آگے چل رہے ہیں۔

کرناٹک میں حکمراں بی جے پی کو بڑا جھٹکا لگا ہے۔ ووٹوں کی گنتی کے دوران ان کے چھ وزراء پیچھے چل رہے ہیں۔ کرناٹک کانگریس کے صدر ڈی کے شیوکمار نے ریاستی وزیر محصولات آر کے اشوک سے تیسرے راؤنڈ کے بعد 15,098 ووٹوں کی واضح برتری حاصل کر لی ہے۔ دوسرے دور کی گنتی کے بعد حزب اختلاف کے لیڈر سدارمیا نے ہاؤسنگ منسٹر وی سومنا کے خلاف ورنا سیٹ پر 1224 ووٹوں کی برتری حاصل کی ہے۔

کرناٹک اسمبلی انتخابات کے بعد ووٹوں کی گنتی کے ابتدائی رجحانات کے بعد کانگریس نے دعویٰ کیا ہے کہ پارٹی قطعی اکثریت کے ساتھ ریاست میں آ رہی ہے۔ کانگریس لیڈر پون کھیڑا نے کہا کہ لوگوں نے بی جے پی خاص طور پر وزیر اعظم نریندر مودی کی منفی مہم کو مسترد کر دیا ہے۔ انہوں نے کہا کہ وہ ریاست میں واضح اکثریت کے ساتھ آ رہے ہیں۔

ادھر، کانگریس کی ترجمان الکا لامبا نے کہا ’’ہم نے اپنی غلطیوں سے سبق سیکھا ہے۔ چند ماہ قبل ہماچل کے نتائج اور کرناٹک اسمبلی انتخابات کی گنتی کے تازہ ترین رجحانات سے پتہ چلتا ہے کہ لوگوں کے مسائل حل نہیں ہو رہے ہیں، اس لیے وہ قدیم ترین پارٹی کے حق میں ووٹ دے رہے ہیں۔‘‘

کرناٹک میں کانگریس جیت کی طرف بڑھ رہی ہے اور وہ رجحانات میں 117 سیٹوں پر آگے چل رہی ہے۔ وہیں بی جے پی محض 77 سیٹوں پر آگے ہے۔ کانگریس کو مل رہی جیت کے پیش نظر لیڈر ڈی کے شیوکمار فون پر ایک ایک کرکے الیکشن لڑنے والے امیدواروں سے رابطے میں ہیں۔ پارٹی کو مل رہی ممکنہ جیت کے پیش نظر کانگریس پارٹی نے جشن منانا شروع کر دیا ہے۔

کرناٹک میں اسمبلی انتخابات کے ووٹوں کی گنتی لگاتار جاری ہے اور کانگریس کو واضح اکثریت حاصل ہو گئی ہے۔ کانگریس فی الحال 118 سیٹوں پر آگے ہے جبکہ بی جے پی محض 82 سیٹوں پر آگے ہے۔ جے ڈی ایس 23 اور دیگر 1 سیٹ پر آگے ہے۔

کرناٹک میں اسمبلی انتخابات کے ووٹوں کی گنتی لگاتار جاری ہے اور کانگریس کو واضح اکثریت حاصل ہو گئی ہے۔ کانگریس فی الحال 115 سیٹوں پر آگے ہے جبکہ بی جے پی محض 83 سیٹوں پر آگے ہے۔

کرناٹک میں کانگریس کی برتری لگاتار بڑھ رہی ہے۔ کانگریس فی الحال 112 سیٹوں پر آگے چل رہی ہے۔ جبکہ بی جے پی کی برتری 88 سیٹوں تک پہنچ گئی ہے۔ جے ڈی ایس 21 اور دیگر امیدوار 3 سیٹوں پر آگے ہیں۔

کرناٹک میں کانگریس نے رجحانات میں سنچری مکمل کر لی ہے اور فی الحال 107 سیٹوں پر آگے چل رہی ہے۔ جبکہ بی جے پی کی برتری 90 سیٹوں تک سمٹ گئی ہے۔

کرناٹک کی 224 میں سے 222 سیٹوں کے رجحانات سامنے آ گئے ہیں۔ اور کانگریس نے سبقت حاصل کر لی ہے۔ کانگریس 101 سیٹوں پر آگے چل رہی ہے۔ بی جے پی 91 سٹوں پر جبکہ جے ڈی ایس 26 سیٹوں پر اور دیگر 2 سیٹوں پر آگے چل رہے ہیں۔

کرناٹک کی 224 میں سے 219 سیٹوں کے رجحانات سامنے آ گئے ہیں۔ فی الحال بی جے پی 100 سیٹوں پر اور کانگریس 91 سیٹوں پر آگے چل رہی ہے۔ جبکہ جے ڈی ایس 25 سیٹوں پر اور دیگر 2 سیٹوں پر آگے چل رہے ہیں۔

کرناٹک اسمبلی انتخابات کے ووٹوں کی گنتی شروع ہوئے تقریباً 25 منٹ گزر چکے ہیں اور 224 میں سے 202 سیٹوں کے رجحانات سامنے آ گئے ہیں۔ فی الحال بی جے پی 95 سیٹوں پر اور کانگریس 83 سیٹوں پر آگے چل رہی ہے۔ جبکہ جے ڈی ایس 22 سیٹوں پر اور دیگر 2 سیٹوں پر آگے چل رہے ہیں۔

کرناٹک میں اسمبلی انتخابات کے ووٹوں کی گنتی شروع ہو گئی ہے۔ فی الحال پوسٹل بیلٹ کی گنتی کی جا رہی ہے۔ تازہ ترین اطلاعات کے مطابق 119 سیٹوں کے رجحانات سامنے آ گئے ہیں اور بی جے پی 50، کانگریس 55 اور 13 سیٹوں پر جے ڈی ایس آگے چل رہی ہے۔

کرناٹک میں 2615 امیدواروں کی قسمت کا فیصلہ الیکٹرانک ووٹنگ مشین (ای وی ایم) میں بند ہے۔ ان 2615 امیدواروں میں سے 2430 مرد اور 184 خاتون ہیں، جبکہ ایک امیدوار بائی سیکسوئل بھی ہے۔

کرناٹک اسمبلی انتخابات کے لیے تمام 224 سیٹوں کے لیے 10 مئی کو ووٹنگ ہوئی تھی۔ جس کے دوران 72.67 فیصد پولنگ درج کیا گیا تھا۔ ایگزٹ پول میں کانگریس کے سب سے بڑی پارٹی بننے یا اکثریت حاصل ہونے کی پیشن گوئی کی گئی ہے۔

کرناٹک میں کس کی حکومت بنے گی، یہ آج واضح ہو جائے گا، کیونکہ اسمبلی انتخابات کے نتائج آج جاری کیے جائیں گے۔ ووٹوں کی گنتی صبح 8 بجے سے 36 مراکز پر شروع ہوگی۔ رجحانات کچھ ہی وقت میں آنا شروع ہو جائیں گے۔ دوپہر تک تصویر واضح ہو جائے گی۔ پورے ملک کی نظریں نتائج پر لگی ہوئی ہیں۔ نتائج سے متعلق لمحہ بہ لمحہ اپ ڈیٹس کے لیے قومی آواز سے جڑے رہیں۔