’35 خوش نصیب زائرین کو رامائن یاترا پر سری لنکا لے کر جائے گا آئی آر سی ٹی سی‘، آئندہ سال 8 جنوری سے سفر کا ہوگا آغاز

نئے سال کے موقع پر آئی آر سی ٹی سی مسافروں کے لیے ایک پیکج لے کر آیا ہے، جو مسافروں کو سری لنکا کی ’رامائن یاترا‘ پر لے جائے گا۔ اس پیکج کا نام ’سری لنکا، دی رامائن یاترا‘ ہے۔ اس یاترا میں زائرین کئی تاریخی اور مذہبی مقامات کی زیارت کر پائیں گے، لیکن یہ موقع ہر کسی کو نہیں ملے گا۔ اس کے لیے پہلے آؤ اور پہلے پاؤ کا حساب ہے۔ یعنی اگر آپ کو آئی آر سی ٹی سی کے اس پیکج میں شامل ہونا ہے تو آپ کو پہلے ہی اس کے لیے بکنگ کرنی ہوگی، کیونکہ اس میں صرف 35 لوگوں کو ہی شامل کیا جائے گا۔

یہ سفر جے پور سے ایئر انڈیا کی فلائٹ سے شروع ہوگی جو سری لنکا کے کولمبو تک جائے گی۔ اس دوران زائرین کو قدیم مذہبی مقامات کی زیارت کے مواقع فراہم ہوں گے۔ ان میں ایک سیتا امَّن مندر ہے، جس کے بارے میں یہ مانا جاتا ہے کہ ماں سیتا کو آگ کے امتحان سے گزرنا پڑا تھا۔ اسی طرح اشوک واٹیکا ہکگلا گارڈن، وہ جگہ جہاں راون نے ماں سیتا کو رکھا تھا۔ راون غار، روایت کے مطابق یہی راون کی رہائش گاہ سمجھا جاتا ہے۔ اس کے علاوہ کولمبو کا وبھیشن مندر، جو بھگوان رام کے عقیدت مند اور لنکا کے راجہ وبھیشن کو وقف ہے۔ رامبوڈا کا ہنومان مندر، جس کے بارے میں کہا جاتا ہے کہ ہنومان جی نے لنکا کو جلانے سے قبل یہاں قدم رکھا تھا۔ ساتھ ہی منیشورم مندر، مناوری مندر، گایتری پیڈم اور ڈیورومپولا مندر جیسے کئی اہم مذہبی مقامات کی بھی زیارت کرائے جائیں گے۔

واضح رہے کہ سری لنکا کے اس مذہبی سفر کے لیے زائرین کو 71440 روپے خرچ کرنے ہوں گے۔ اسی میں مسافروں کی واپسی کا ٹکٹ بھی شامل ہوگا۔ اس کے علاوہ 3 اسٹار ہوٹل میں ٹھہرنے کا انتظام، انڈین اسٹائل کا مزیدار کھانا، تمام سیاحتی مقامات کا داخلہ فیس، تجربہ کار گائیڈ کی خدمات اور یہاں تک کہ سری لنکا کا ویزا اور ٹریول انشورنس بھی اسی میں شامل ہوگا۔ سری لنکا کے اس سفر کے لیے زائرین کو آئی آر سی ٹی سی کی ویب سائٹ www.irctctourism.com  کے ذریعہ بکنگ کرنی ہوگی۔

یہ مذہبی سفر آئندہ سال 8 جنوری سے شروع ہوگا اور 13 جنوری تک چلے گا۔ یعنی 6 روز اور 5 رات کے لیے 71 ہزار کے پیکج میں کھانے، پینے، رہنے اور آنے جانے کا مکمل انتظام ہے۔ اس کے علاہ بھی متبادل ہے، مثلاً ایس جی ایل شیئرنگ (ایک کمرہ ایک آدمی) والوں کو 89980 روپے، ڈی بی ایل شیئرنگ (ایک کمرہ 2 آدمی) والوں کو 71440 روپے اور ٹی پی ایل شیئرنگ (ایک کمرہ 3 آدمی) والوں کو 70070 روپے ادا کرنے ہوں گے۔ بچوں کے لیے بھی مختلف کرایے مقرر کیے گئے ہیں۔ بیڈ کے ساتھ بچے کا کرایہ 54765 روپے، جبکہ بغیر بیڈ والے بچوں کا کرایہ 51905 روپے ہیں۔ اسی طرح 2 سے 4 سال تک کے چھوٹے بچوں کے لیے پیکج کی قیمت 35480 روپے رکھی گئی ہے۔