ہاتھرس معاملہ: ملزموں کا سر قلم کرنے پر انعام دینے والا نظام ملک گرفتار

اترپردیش کی بلند شہر پولیس نے ہاتھرس ملزموں کا سر قلم کرنے پر ایک کروڑ روپیے کے انعام کا اعلان کرنے والے کانگریس کے رہنما نظام ملک کو گرفتار کر لیا ہے۔ خرجہ علاقے کے پولیس سب انسپکٹر سریش کمار نے آج یہاں یہ اطلاع دی۔

انہوں نے بتایا کہ گزشتہ دنوں جب کانگریس کی رہنما پرینکا گاندھی اور راہل گاندھی ہاتھرس کے لیے نکل رہے تھے۔ اسی دوران خرجہ کے کانگریس کے رہنما نظام ملک نے ہاتھرس کے درندوں کا سر قلم کرنے والوں کو ایک کروڑ روپیے کا انعام دینے کا اعلان کیا تھا۔

یہ متنازعہ بیان سوشل میڈیا پر وائرل ہونے کے بعد خرجہ پولیس حرکت میں آئی اور اس بیان کا نوٹس لیتے ہوئے نظام ملک کو گرفتار کر لیا۔ انہوں نے بتایا کہ وائرل ویڈیو کا نوٹس لیتے ہوئے ملزم رہنما کو گرفتار کرکے ان کے خلاف قانونی کارروائی کی جا رہی ہے۔