زلزلہ کے جھٹکوں سے ہل گئی اروناچل، انڈونیشیا، افغانستان اور سنگاپور کی زمین

گزشتہ کچھ ہفتوں میں ہندوستان سمیت کئی ممالک نے زلزلہ کے کئی جھٹکوں کو محسوس کیا ہے۔ گزشتہ کچھ گھنٹوں میں بھی کئی جگہ زلزلہ محسوس کیا گیا جن میں ہندوستان کی ریاست اروناچل پردیش، انڈونیشیا، کابل (افغانستان) اور سنگاپور شامل ہیں۔ میڈیا ذرائع سے موصول ہو رہی خبروں کے مطابق جہاں اروناچل پردیش کے توانگ میں 3.4 شدت کا زلزلہ آیا وہیں انڈونیشیا میں زلزلہ کی شدت زیادہ تھی اور ریکٹر اسکیل پر اس کی پیمائش 6.3 کی گئی ہے۔ انڈونیشیا اور سنگاپور میں زلزلے کی شدت زیادہ تھی، اس لیے کئی لوگ گھبراہٹ میں گھروں سے باہر نکل گئے تھے۔

انڈونیشیا میں آئے زلزلہ سے متعلق امریکی جیولوجیکل سنٹر کے مطابق 6 سے زیادہ شدت کا یہ زلزلہ مقامی وقت کے مطابق رات 10 بج کر 54 منٹ پرآیا۔ محکمہ کے مطابق زلزلہ کا مرکز بتانگ سے 93 کلو میٹر دور 5.6368 ڈگری جنوبی طول البلد اور 110.6783 ڈگری مشرقی طول البلد میں واقع تھا۔ زلزلہ سے کسی جانی و مالی نقصان کے حوالہ سے کوئی رپورٹ درج نہیں کی گئی ہے۔

اسی طرح سنگاپور کے قریب بھی شدید زلزلہ کے جھٹکے محسوس کیے گئے لیکن کسی جانی و مالی نقصان کی خبر نہیں ملی ہے۔ بتایا جاتا ہے کہ ریکٹر اسکیل پر 6.1 شدت کا زلزلہ سنگاپور کے تقریباً 1102 کلو میٹر ساؤتھ ایسٹ میں اس کا مرکز تھا۔نیشنل سنٹر فار سسمولوجی نے اس زلزلہ سے متعلق جانکاری دی اور ساتھ ہی بتایا کہ اس سے کسی طرح کے نقصان کی کوئی خبر نہیں ہے۔

افغانستان کی راجدھانی کابل میں بھی گزشتہ شب زلزلہ آیا۔ امریکی محکمہ موسمیات کے مطابق پیر کے روز 4.6 شدت کے زلزلے کے جھٹکے محسوس کئے گئے۔ افغانستان کے قدرتی آفات انتظامیہ اور انسانی حقوق کی وزارت نے ابھی تک ا س سلسلہ میں کوئی بیان جاری نہیں کیا ہے۔ زلزلے سے حالانکہ کسی بھی طرح کے نقصان کی کوئی رپورٹ درج نہیں کی گئی ہے۔