اہم خبریں: ممبئی میں بی جے پی کی ’جَن آشیرواد یاترا‘ کے خلاف 17 ایف آئی آر درج

ممبئی پولیس نے بی جے پی کی ’جَن آشیرواد یاترا‘ کے خلاف کورونا پروٹوکول کی خلاف ورزی کرنے پر 17 مزید ایف آئی آر درج کی ہیں۔ اب تک ’جَن آشیرواد یاترا‘ کے خلاف مجموعی طور پر 36 ایف آئی آر درج ہو چکی ہیں۔

نئی دہلی: وزیراعظم نریندر مودی نے اونم کے موقع پر عوام کو مبارکباد دی ہے۔ وزیراعظم نے ہفتے کے روز ایک ٹویٹ پیغام میں کہا کہ ’’اونم کے خاص موقع پر مبارکباد۔ یہ تیوہار مثبت جوش، بھائی چارے اورنیک نیتی سے وابستہ ہے۔ اس موقع پر میں ہر کسی کی اچھی صحت اور خوشحالی کی دعا کرتا ہوں۔‘‘ قابل ذکر ہے کہ اونم کیرالہ کا ایک اہم تیوہار ہے۔ یہ تیوہار ہر سال ستمبر میں راجا مہابلی کے خیر مقدم میں منعقد کیا جاتا ہے اور 10 دنوں تک چلتا ہے۔

براسیلیا: برازیل میں گذشتہ 24 گھنٹوں میں کورونا کیسز میں 33887 کا اضافہ ہونے کے بعد کل کیسز 20528099 ہو گئے ہیں۔ قومی وزارت صحت نے جمعہ کی دیر شام یہ اطلاع دی ہے۔ وزارت کے مطابق اس دوران 870 لوگوں کی موت بھی ہوئی جس کے بعد کل اموات کی تعداد 573511 ہو گئی ہے۔ کورونا سے اب تک تقریباً دو کروڑ افراد صحتیاب ہو گئے ہیں۔ دنیا میں کورونا سے ہوئے اموات کے معاملے میں امریکہ کے بعد برازیل کا مقام دوسرا ہے۔

مشہور و معروف شاعر منور رانا کے خلاف لکھنؤ واقع حضرت گنج کوتوالی پولیس نے ایف آئی آر درج کی ہے۔ دراصل منور رانا نے طالبان کا موازنہ رامائن کے مصنف والمیکی سے کی جس کے بعد ان کے خلاف ایف آئی آر درج کی گئی ہے۔ حضرت گنج کوتوالی کے انچارج شیام شکلا نے جانکاری دیتے ہوئے بتایا کہ والمیکی سماج کے لیڈر پی ایل بھارتی کی تحریر پر منور رانا کے خلاف مذہبی جذبات مشتعل کرنے اور دیگر کئی دفعات میں مقدمہ درج کیا گیا ہے۔