بنگلہ دیش میں چلے گی ’میڈ ان انڈیا‘ ٹرین، ہندوستان دے گا ’ایل بی ایچ‘ ریک، اے سی اور سلیپر کے ہوں گے 19 کوچ

ہندوستان اور بنگلہ دیش کے درمیان ریلوے کے شعبے میں تعاون کے حوالے سے 12 اگست کا دن اہم ہونے جا رہا ہے۔ وزارت ریل نے اطلاع دی ہے کہ بنگلہ دیش ریلوے کے لیے 19 کوچوں پر مشتمل پہلی ایل ایچ بی (لنک-ہوفمین-بش) براڈ گیج پیسنجر ریک بدھ کے روز ریل کوچ فیکٹری (آر سی ایف)، کپور تھلا سے روانہ ہوگی۔ یہ ریک بنگلہ دیش ریلوے کے لیے 200 براڈ گیج مسافر کوچوں کی اس سپلائی کا حصہ ہے، جس کا آرڈر 2024 میں ریل انڈیا ٹیکنالوجی اینڈ اکنامک سروس (رائٹس) کو دیا گیا تھا۔ اس پورے آرڈر کے تحت 7 مختلف اقسام میں 200 براڈ گیج مسافر کوچ تیار کیے جا رہے ہیں۔ اپریل 2026 میں بنگلہ دیش کے ریلوے وزیر شیخ ربیع العالم نے پارلیمنٹ کو بتایا تھا کہ بنگلہ دیش ہندوستان سے 200 براڈ گیج مسافر کوچ درآمد کرے گا۔ ان کوچوں کو جون 2026 سے دسمبر 2027 کے درمیان بنگلہ دیش ریلوے کے بیڑے میں شامل کیے جانے کا منصوبہ ہے۔ بنگلہ دیش کے لیے روانہ ہونے والی پہلی 19 کوچوں کی ریک میں مختلف اقسام کے کوچ شامل ہوں گے۔ اس میں 3 اے سی سلیپر کار، 3 اے سی چیئر کار، 11 نان اے سی چیئر کار اور 2 پاور کار شامل ہیں۔

وزارت ریل کے مطابق ایل ایچ بی کوچ بہتر سیکورٹی، کم دیکھ بھال کے اخراجات اور بہتر آپریشنل کارکردگی کے لیے جانے جاتے ہیں۔ بنگلہ دیش ریلوے کی ضروریات کو مدنظر رکھتے ہوئے ان کوچوں میں کئی نئے ’ڈیزائن الیمنٹ‘ اور تکنیکی تبدیلیاں کی گئی ہیں۔ ان میں سے کچھ خصوصیات پہلی بار ایل ایچ بی قسم کے کوچوں میں شامل کی گئی ہیں۔ ان کوچوں کو بنگلہ دیش ریلوے اور وہاں کے مسافروں کی ضروریات کے مطابق ڈیزائن کیا گیا ہے۔ ان میں اسٹین لیس اسٹیل آرم ریسٹ اور فٹ ریسٹ کے ساتھ ریک لائننگ سیٹیں دی گئی ہیں۔ مسافر اپنی سہولت کے مطابق سیٹ کو مختلف ریک لائننگ پوزیشن میں ایڈجسٹ کر سکیں گے۔ وزارت ریل کے مطابق کوچوں میں مسافروں کی سہولت اور حفاظت کو مدنظر رکھتے ہوئے کئی خصوصیات شامل کی گئی ہیں۔ اے سی کوچوں میں پنکھے، انٹیگریٹڈ سی سی ٹی وی سرویلنس سسٹم اور پیسنجر الارم سسٹم دیے گئے ہیں۔ اس کے علاوہ جزوی طور پر کھلنے والی کھڑکیاں، بیبی کیئر روم اور پریئر روم بھی دستیاب ہوں گے۔ بنگلہ دیش کے مخصوص آپریٹنگ حالات کو مدنظر رکھتے ہوئے کوچوں کے روف اسٹرکچر کو بھی مضبوط کیا گیا ہے۔ اس کا مقصد رش کے اوقات کے دوران چھت پر مسافروں کے چڑھنے سے پڑنے والے اضافی بوجھ کو برداشت کرنا ہے۔

ریلوے کے مطابق ان کوچوں کا ڈیزائن ’کریش وردی‘ ہے اور انہیں ’یورپین سیفٹی اسٹینڈرڈ‘ ای این 15227 کے مطابق تیار کیا گیا ہے۔ ٹکر کی صورت میں مسافروں کی حفاظت بڑھانے کے لیے کار باڈی شیل کو بھی دوبارہ ڈیزائن کیا گیا ہے۔ ان کوچوں کا الیکٹریکل سسٹم بھی بنگلہ دیش ریلوے کی ضروریات کے مطابق تیار کیا گیا ہے۔ یہ 415 وولٹ پر چلیں گے، جبکہ ہندوستانی ریلوے کے کوچوں میں عام طور پر 750 وولٹ کا سسٹم استعمال کیا جاتا ہے۔ رائٹس لمیٹڈ اس سے قبل بھی بنگلہ دیش ریلوے کو 120 براڈ گیج ایل ایچ بی مسافر کوچ، 36 براڈ گیج لوکوموٹیو اور 10 میٹر گیج کے 10 لوکوموٹیو فراہم کر چکا ہے۔ کمپنی نے بنگلہ دیش ریلوے کے ساتھ کئی دیگر ریلوے انفراسٹرکچر پروجیکٹس پر بھی کام کیا ہے۔ مئی 2026 میں رائٹس کے سی ایم ڈی راہل متل نے کہا تھا کہ پہلی ریک کی ڈیلیوری کے بعد موجودہ مالی سال میں کم از کم 3 سے 4 مزید ریک بھیجے جانے کی امید ہے۔ انہوں نے کہا تھا کہ پہلی ریک کی ڈیلیوری کے بعد پیداوار کی رفتار بڑھائی جائے گی۔