تہور رانا کو لے کر خصوصی طیارہ امریکہ سے آ رہا ہندوستان، پہنچتے ہی این آئی اے کرے گی گرفتار!

طویل انتظار کے بعد تہوّر رانا ہندوستان پہنچنے والا ہے۔ ممبئی کے 11/26 دہشت گردانہ حملے کا ملزم تہور کے بارے میں بتایا جا رہا ہے کہ ایک خصوصی طیارہ سے اسے ہندوستان لایا جا رہا ہے، جو کہ کچھ گھنٹوں میں لینڈ ہونے والا ہے۔ امریکہ سے ایک خصوصی طیارہ مین ہندوستانی افسران تہور رانا کو لے کر ہندوستان آ رہے ہیں۔

موصولہ اطلاع کے مطابق آج شام تقریباً 7 بجے اس طیارہ نے امریکہ سے پرواز بھری ہے۔ بتایا جا رہا ہے کہ جیسے ہی رانا ہندوستانی زمین پر قدم رکھے گا، این آئی اسے رسمی طور سے گرفتار کر لے گی۔ اس ماحول میں پاکستان پر بین الاقوامی دباؤ بڑھنے کا امکان ہے، کیونکہ رانا کا نام لشکر طیبہ اور آئی ایس آئی سے جوڑا جاتا رہا ہے۔

قابل ذکر ہے کہ این آئی اے نے اس کیس کو ممبئی سے دہلی منتقل کروایا ہے اور اب اس کی پوری سماعت دہلی میں ہی ہوگی۔ ذرائع کا کہنا ہے کہ وزارت قانون کی رائے کے بعد آج ہی یہ کیس دہلی واقع این آئی اے ہیڈکوارٹر میں منتقل کیا گیا ہے۔ وزارت داخلہ کے ذریعہ این آئی اے نے وزارت قانون سے کیس کی اس منتقلی کے لیے منظوری لی تھی۔

بتایا جا رہا ہے کہ تہور رانا کے ہندوستان پہنچتے ہی اسے ابتدائی طور پر حراست میں این آئی اے کے پاس ہی رکھا جائے گا، جہاں اس سے پوچھ تاچھ ہوگی۔ اسے دہلی کے تہاڑ جیل میں رکھا جا سکتا ہے، اور اس کے لیے تہاڑ میں تیاری پوری بھی کر لی گئی ہے۔ تہوّر رانا کو ہندوستان لانے کی سرگرمی نے دہلی میں سیاسی ہلچل بھی تیز کر دی ہے۔ 9 اپریل کو قومی سلامتی مشیر (این ایس اے) اجیت ڈبوال اور وزیر خارجہ ایس جئے شنکر نے مرکزی وزیر داخلہ امت شاہ سے ملاقات کی۔ یہ اہم میٹنگ نارتھ بلاک واقع وزارت داخلہ کے دفتر میں ہوئی۔ میڈیا نے ذرائع کے حوالے سے بتایا ہے کہ میٹنگ میں تہور رانا کی ہندوستان آمد سے متعلق حکمت عملی پر بات چیت ہوئی اور یہ تقریباً 22 منٹ تک چلی۔