چھتیس گڑھ: محمد اکبر سمیت بھوپیش بگھیل کے 9 وزراء نے لیا حلف

چھتیس گڑھ میں کانگریس کی حکومت تشکیل ہو چکی ہے اور 25 دسمبر کو محمد اکبر سمیت بھوپیش بگھیل کے 9 وزراء نے عہدے اور رازداری کا حلف بھی لے لیا۔ آج چھتیس گڑھ کی گورنر آنندی بین پٹیل نے رائے پور میں بھوپیش بگھیل حکومت کے وزراء کو عہدے اور رازداری کا حلف دلایا۔ جن وزراء نے منگل کے روز حلف لیا ان میں رویندر چوبے، پریم سائے سنگھ، محمد اکبر، کباسی لکھما، شیو ڈہیریا، محترمہ انیلا بھیڑیا، جے سنگھ اگروال، گرورودر کمار اور اومیش پٹیل شامل ہیں۔ سینئر کانگریس لیڈران اور افسران کی موجودگی میں ان وزراء نے پولیس پریڈ میدان پر منعقد باوقار تقریب میں عہدے اور رازداری کا حلف لیا۔ اس موقع پر وزیر اعلیٰ بھوپیش بگھیل بھی موجود تھے۔

قابل ذکر ہے کہ بھوپیش بگھیل نے 17 دسمبر کو چھتیس گڑھ کے وزیراعلی کے عہدے کا حلف لیا تھا۔ اسی دن بگھیل کے علاوہ ٹی ایس سنگھ دیواور تامر دھوج ساہو نے کابینہ کے وزیر کے عہدے کا حلف لیا تھا۔ آج چونکہ 9 وزراء نے حلف لیا تو اب مجموعی طور پر وزیراعلی اور 11 وزراء چھتیس گڑھ کی کابینہ کے وزیر ہو گئے ہیں۔ طے شدہ ضوابط کے مطابق اب وزیر کا صرف ایک عہدہ خالی ہے۔ واضح رہے کہ 90 رکنی اسمبلی میں کانگریس نے 68 سیٹوں پر شاندار جیت حاصل کر کے 15 برس بعد اقتدار میں واپسی کی ہے۔

(یو این آئی ان پٹ کے ساتھ)